“Nabunyagan na Diay Ka. Unsay Sunod Buhaton?” Higala, Enero 2026, 36–37.
Nabunyagan na Diay Ka. Unsay Sunod Buhaton?
Nabunyagan ka na ba? Nindot kana! Ang Langitnong Amahan ug si Jesukristo malipayon kaayo nga mihimo ka niana nga pagpili aron mosunod Nila.
Ang bunyag usa lamang sa unang mga lakang sa imong panaw ngadto sa maanindot nga relasyon sa pakigsaad ngadto sa Langitnong Amahan ug sa imong Manluluwas. Ania ang pipila ka butang nga imong mabuhat kanunay o masugdan sa pagbuhat karon nga nabunyagan ka na.
Maminaw sa Espiritu Santo
Nahinumdom ka dihang nadawat nimo ang gasa sa Espiritu Santo human sa imong bunyag? Karon kanunay Siya nga magauban nimo samtang pilion nimo ang sakto. Ang Espiritu Santo kasagaran makigsulti nato pinaagi sa mga hunahuna ug mga pagbati. Ang pagpaminaw sa Espiritu Santo makatabang nimo sa paghimo og maayo nga mga pagpili ug pagkaplag og tinuod nga kalipay.
Hunahunaa Kini: Kanus-a ang panahon nga gibati nimo ang Espiritu Santo? Pwedeng dako kini nga kasinatian o gamay ra!
Maghinulsol
Sa dihang miula si Jesukristo sa atong mga sala, gihimo Niyang posible alang natong tanan aron makahinulsol. Ang paghinulsol nagpasabot nga mopalayo sa sayop nga mga pagpili ug mopadulong ngadto sa Langitnong Amahan ug ni Jesukristo. Malipay kaayo sila kon pilion nato nga maghinulsol kay makatabang ni nato nga mas mapaduol ngadto Kanila.
Hunahunaa Kini: Unsa ang usa ka butang nga imong mahimo nga makatabang nimo aron mopaduol ngadto sa Langitnong Amahan ug ni Jesukristo?
Moambit sa Sakramento
Human sa imong bunyag, ang sakramento mahimong labaw pa ka espesyal. Karon kon moambit ka sa sakramento, imong gibag-o ang pakigsaad nga imong gihimo atol sa bunyag nga motuman sa mga sugo ug mosunod ni Jesukristo. Kon dili nimo matuman sa hingpit kini nga mga saad, ang sakramento mao ang senemana nga pahinumdom nga tungod ni Jesukristo, makahinulsol kita ug mapasaylo.
Hunahunaa Kini: Unsa ang usa ka paagi nga mahimo nimong espesyal ang sacrament karong semanaha?
Mangandam para sa Templo
Ang templo mao ang balaan nga balay sa Dios. Sa tuig nga ikaw mag-12 anyos na, makaadto ka na sa templo ug motabang sa uban pinaagi sa pagpahigayon og mga bunyag alang sa mga patay. Sa kadugayan, makahimo ka og dugang mga pakigsaad ngadto sa Langitnong Amahan para sa imong kaugalingon. Ang imong makat-onan sa templo makatabang nimo nga mas mahimong sama sa Langitnong Amahan ug ni Jesukristo!
Hunahunaa Kini: Unsa ang usa ka butang nga imong mahimo karon aron maandam nga moadto sa templo?
Mga paghulagway pinaagi ni Alyssa Petersen