Si Thomas nga Tigpundok

Ang akong ngalan si Thomas, ug usa ako ka tigpundok.

Karong tuiga sa Primary nagkat-on mi kon unsaon sa pagpundok. Ang among mga lider mihangyo namo sa pagpundok sa among mga pamilya alang sa pag-ampo ug pagtuon sa kasulatan. Gusto sila nga magpraktis mi sa pagpundok aron mahibalo kon unsaon pagpundok karon ug kon modako na mi—sa mga misyon, sa eskwelahan, o gani kon mag-inusara mi. Nianang paagiha makapundok mi kanunay sa espirituhanong paagi uban sa Langitnong Amahan ug ni Jesukristo ug makakaplag og kalinaw diha Kanila.

Ang akong buluhaton mao ang pagpundok sa akong pamilya alang sa buntag nga pag-ampo. Mohangyo ko, “Mahimo bang dunganan ko ninyo sa pag-ampo?” Ang akong igsoon nga si Henry mopundok namo alang sa panggabii nga pag-ampo ug pagtuon sa kasulatan.

Usa ka Sabado sa buntag, milakaw mi og sayo aron magdula og basketball. Pagkahuman, mihimo mi sa among mga buluhaton. Sa kalit lang nahinumdoman nako ug misulti, “Ma, nakalimot ta sa pagpundok aron mag-ampo.” Gisultihan ko niya nga magpundok mi inig abot namo sa balay. Apan miingon ko, “Kinahanglang magpundok ta og mag-ampo karon dayon.” Gihangyo ko niya nga maoy mosulti sa pag-ampo, apan wala siya mopiyong kay nag-drayb siya.

Si Mama ug Papa misulti namo ni Henry nga mapasalamaton kaayo sila nga among gipundok ang among pamilya alang sa pag-ampo ug sa pagtuon sa kasulatan. Miingon sila nga ang among gagmayng mga tingog nakahimo og dakong kausaban sa among panimalay. Nagsulti sila namo nga tungod kay nagpundok mi, napanalanginan ang among pamilya.

Mga paghulagway pinaagi ni Augusto Zambonato