Ang Milagro sa may Pultahan

Gihuman ni Gracie og kaon ang iyang pancake, gibutang ang iyang mga hugasan sa lababo, ug gikuha ang iyang backpack.

“Oras na alang sa pag-ampo sa pamilya,” miingon si Papa.

Miluhod ang tanan didto sa sala. Ang kaluha ni Gracie nga lalaki, si George, misulti sa pag-ampo. “Palihog tabangi mi nga makabaton og maayo nga adlaw sa eskwelahan,” miingon siya. “Ug palihog panalangini sa Mama nga ma-OK ra siya. Palihog panalangini ang mga doktor aron mahibalo kon unsaon nga matabangan siya.”

Ang mama ni Gracie adunay tumor sa utok. Gikinahanglan siyang operahan. Ang mga doktor nanghinaot nga ma-OK ra ang tanan, apan dili sila segurado.

Pagkahuman sa pag-ampo, gigakos sa iyang Mama ang tanan. “Moadto na sad ako sa doktor karong adlawa. Hinaot nga makakuha mi og dugang pa nga mga tubag.”

Unsa kaha kon mamatay si Mama ug dili na ko makaistorya niya? Naghunahuna si Gracie. Nahadlok kaayo siya. Dili siya makahunahuna nga dili na makagakos sa iyang Mama o makakita niya inig pauli gikan sa eskwelahan.

Nianang adlawa, miadto si Gracie sa klase, sa recess, ug sa paniudto sama sa naandan. Apan nagsige siya og hunahuna mahitungod sa iyang Mama. Kon mobati siya og kahadlok, maghunahuna siya mahitungod sa iyang paborito nga awit sa Primary. Pamilya mahimong manag-uban ngadtos kahangtoran, mikanta siya sa iyang hunahuna.

Sa dihang miabot sila sa balay gikan sa eskwelahan, si Gracie ug George midagan sa sulod ug migakos sa ilang Mama og maayo. “Kumusta man ang imong pakigkita sa doktor?” Nangutana si Gracie.

“Maayo man,” miingon si Mama. “Gamay ra gihapon mi og nahibaloan. Duna pa koy pipila ka appointment sa sunod semana sa wala pa ang operasyon.”

Nalipay si Gracie nga nakakita sa iyang mama. Pero nabalaka gihapon siya.

Pipila ka adlaw human niana, mibagting ang doorbell. Sa dihang giablihan sa Mama ang pultahan, nakadungog si Gracie og mga nanganta.

Nagbarog siya uban sa Mama sa may pultahan ug nagtan-aw sa pundok sa mga higala sa pamilya gikan sa Simbahan ug sa eskwelahan. Nagkanta sila og mga awit sa Primary. “Nagsige mi og hunahuna nimo ug gusto mi nga modala og kahupayan,” misulti ang usa nila. Dayon misugod na usab sila sa pagkanta.

Si George miduol usab sa pultahan. Milingi siya ni Gracie. “Moapil ta nila og kanta!”

Gikuha ni Gracie ug George ang ilang kupo ug midagan sa gawas aron moapil sa uban. Mikanta sila og lanog kutob sa ilang mahimo:

Nakita ni Gracie iyang Mama nga mipahid sa iyang mga luha. Ang iyang manghod nga igsoon, si Rosie, migunit sa mga paa sa iyang Mama ug naminaw usab.

Usa ka malinawon nga pagbati milibot ni Gracie. Nabalaka gihapon siya mahitungod sa iyang Mama. Apan nahibalo siya nga si Jesukristo naghigugma nila. Siya maoy usa ka Dios sa mga milagro. Ug sa paagi nga wala niya mahibaloi, nahibalo si Gracie nga ma-OK ra ang tanang butang.

Paghulagway pinaagi ni Bethany Stancliffe