15,100 ka Sivia Yani

Mai vei Josué E., yabaki 10, Piura, Peru

O Josué E. kei na dua na kompiuta ka solia tiko e dua na ivakatakilakila ni idovidovi ni kakana

Niu a yabaki walu, sa qai dua na noqu akaude ni FamilySearch vakai au ga! Ni se qai tekivu au lomaleqa, ia rau a vakavulica vei au na noqu itubutubu kei ira na taciqu na tuvatuva vakamatanivola ka bulia na noqu vunikau ni matavuvale me rawa niu vukei ira noqu qase e liu. Ni oti oya, au sega tale ni qai lomaleqa. Au a vakila na veitokoni kei na vakavakarau.

Dua na gonetagane kei ganena kei tamana ratou raica tiko e dua na kompiuta

Au vakila na gagadre meu yaco me dua na daurailesu ni tuvakawa me vakataki ratou na noqu itubutubu kei ira na taciqu. Au digia me dua na noqu takete me baleta na parokaramu ni Gonelalai kei na iTabagone. Me yacovi na lalawa oqo, meu na vakamatanivolataka e 1,000 na itukutuku.

So na gauna au a vakila niu vakadrukai. Ia erau a vakananuma vei au na noqu itubutubu niu na sega ni cakava taucoko ena dua na siga. Ia, e dodonu me’u vakanamata ena kena caka e tolu walega na itukutuku ena dua na siga, ka ni bera e dua na yabaki au sa na sotava na noqu lalawa. Erau kaya kevaka me dredre na noqu kila na iyaloyalo, erau na vukei au.

Dua na gonetagane e masu tiko, kei na liga e kotiva tiko na kadi ni cakacaka vakalotu ni valetabu

Au masu vua na Tamada Vakalomalagi me vukei au o Koya me sotava na noqu lalawa. Au a loma vinaka cake ni oti na noqu masu.

Au a sega ni soro ka tomana tiko na noqu ituvatuva vakamatanivola e veisiga. Ni oti e dua na yabaki, ni bera niu yabaki ciwa, au a tuva matanivolataka oti tu e sivia ni 1,000 na ivolatukutuku ka soli vei au na itutu ni daurailesu. Au marautaka sa!

Dua na gonetagane e dabe tiko ena co e taudaku ni valetabu

Oqo au dau gole vata kei rau na noqu itubutubu kina Valetabu e Trujillo Peru. Au dau veivuke ena kena tabaki na kadi ni cakacaka vakalotu, kotiva tani, ka solia vei ira yadua na lewe ni matavuvale me rawa ni ra cakava na cakacaka vakalotu niu wawa voli ena lomanibai ni valetabu. Sega ni dede sa na rawa ni’u curu ki loma meu laki caka papitaiso.

Au sa yabaki 10 qo au sa cakava rawa e 15,100 na itukutuku vakamatanivolataki! Au marau vakalevu ka maqusa meu tomana meu yacova rawa na noqu lalawa meu vakataki Jisu Karisito vakalevu cake.