“Tuvakarau mo Tubu Tikoga,” iTokani, Noveba 2025, 36–37.
Tuvakarau mo Tubu Tikoga
A sega ni vinakata o Jewel me biuti ira na nona itokani ena Lalai!
Dua na italanoa dina mai Palau.
A dabe toka o Jewel ena idabedabe ena soqoni ni sakaramede vata kei rau na nona itubutubu kei na ganena. A droinitaka toka o koya na iyaloyalo ni italanoa vakaivolanikalou. A tovolea me vakarorogo vei koya e vosa tiko, ia a vakila ni ketena e vaka me sinai tu ena rere ni ririko!
Nikua na imatai ni siga me gole kina o Jewel kina kalasi ni Goneyalewa ka sega ena Lalai. A sega ni via biuti ira tu mai na nona itokani ena Lalai. A dau taleitaka me lagasere ka wili ivolanikalou vata kei ira.
Ia sa yabaki 12 tiko o Jewel ena yabaki oqo. Sa kena gauna me toso yani kina ki na parokaramu ni Goneyalewa.
A bobo na matana ka cabora e dua na masu lo. Tamaqu Vakalomalagi, yalovinaka vukei au me’u na tiko vinaka ena kalasi ni Goneyalewa.
Ni oti na masu ni suka ena soqoni ni sakaramede, a cegu levu o Jewel ka taubale yani ki na rumu ni kalasi. Era a tiko rawa kina na goneyalewa qase cake. E ratou e lewe va. E ratou veivosaki ka veidredrevaki tiko.
“Bula,” a kaya yani o Jewel.
Eratou a matadredredre mai. “Bula,”
A curu mai na qasenivuli ka kidavaki Jewel sara. A qai tekivuna o koya na lesoni.
Ena vuqa na gauna ni kalasi, a galili voli o Jewel. A madua o koya me vosa baleta ni se sega ni kilai ira na vo ni goneyalewa. Me na tiko o koya ena Goneyalewa ena dua na gauna balavu. E vaka beka me na tawamudu! Ena dau galili beka tu ga eke o koya?
A qai yaco mai e dua na domo lailai kina nona vakanananu. O na sega ni tiko tawamudu ena Goneyalewa. O sa qase cake ga mai mo toso yani kina ka vulica e levu tale na ka me baleta na bula vakatisaipeli i Jisu Karisito.
A vakila o Jewel ni a vakacegui mai na vosa oqori. A kila o koya ni oqori na Yalo Tabu e vukei koya tiko. E dina ga ni se sega ni levu na nona itokani ena Goneyalewa, ia e sega ni tiko duadua o koya. A tiko vua na Yalo Tabu.
Ni oti na kalasi, a raica o Jewel na nona matavuvale.
“A bau vakacava tu na kalasi ni Goneyalewa?” A taroga mai o Na.
A mokoti koya yani o Jewel. “E a vinaka. Au calata sara na Lalai, ka’u se sega ni kilai ira na goneyalewa. Ia, au vakila na Yalo Tabu ni vakacegui au.”
A matadredre sara o Na. “E rogo vinaka oqori! Ka rairai ena vinaka cake beka na gauna e tarava.”
A deguvacu o Jewel. A nuitaka ni dina o Na.
Ena gauna ni kalasi tarava ni Goneyalewa, a vakabula tale yani o Jewel vei ira na goneyalewa.
“Bula, Jewel,” a kaya mai e dua vei ira. “Mai dabe vata kei au!”
A matadredredre o Jewel ka dabe sara e yasana. Na yacana o Ellie. Erau a veitalanoa vakalevu ni bera ni tekivu na lesoni. A yalovinaka o Ellie ka vakila o koya ni ciqomi.
Ena gauna ni lesoni, a taroga na qasenivuli ke dua a sotava e dua na ka vakilai kei na Yalo Tabu.
A laveliga o Jewel. “Au a vakila ni vukei au na Yalo Tabu ni’u lomaleqa voli meu lewena na Goneyalewa,” a kaya o koya. “E dau vukei au na Yalo Tabu niu tubu ka sotava na bolebole.”
A vakasamataka tiko o Jewel na sala e vakacegui koya kina na Yalo Tabu ni a galili voli. A vakila ni taleitaka me wasea na veika a sotava vei ira na goneyalewa.
Ni sa wasea oti o koya, era a veiwasei talega e vica tale na goneyalewa. A taleitaka o Jewel me rogoca na veika era tukuna.
Eso na gauna e se dau calata tikoga o Jewel na Lalai. Ia ena vuku ni Yalo Tabu, sa tuvakarau o koya me toso tikoga ki liu.
Droini mai vei Liz Brizzi