“Digidigi ni iKatini nei Logan,” iTokani, Noveba 2025, 8–9.
Digidigi ni iKatini nei Logan
“O sa vakarau tu li mo talairawarawa ki na ivakaro ni saumi ikatini?” A taroga o Na.
E dua na italanoa dina mai Amerika.
Ena gauna se yabaki lima kina o Logan, a nanuma o koya ni ikatini e vakasama rerevaki!
Ena lotu vakamatavuvale, a biuta o Na e 10 na dola ena teveli. “Raitayaloyalotaka mada nio rawata e 10 na dola.”
A matadredredre o Logan. “Sa donu!”
“Na iKatini sa ikoya e 10 na pasede. O koya mo na qai solia kina e dua na dola kina Lotu ni Turaga.” A vakasisiya tani sara o Na e dua na dola mai na ibinibini.
A kidroa o Logan. “Solia laivi e dua na dola? Ia au vinakata me’u maroroya kece na noqu ilavo!”
“De na qai duidui beka nomu nanuma ni o sa qase cake,” a kaya o Na. “Na Tamada Vakalomalagi e dau vakalougatataki keda ena veika kecega. Na saumi ikatini e dua na sala eda vakaraitaka kina vua na Kalou ni da lomani Koya ka vakavinavinakataka na Nona veivakalougatataki.”
Ni se yabaki ono o Logan, era vakavulica vua na nona qasenivuli ni Lalai ni dau vakayagataki na ikatini me tara kina na valetabu. E dau taleitaka o Logan na valetabu. E rairai ni vakasama vinaka beka vei ira eso na tamata na saumi ikatini. Ia vei koya e sega.
Ni sa yabaki vitu o Logan, a dau raica ni ra matadredredre na tamata nira solia na nodra waqanivola ni ikatini vei bisopi. E rawa beka ni vakamarautaki iko nio solia tani na nomu ilavo?
Ni sa yabaki walu, a tarogi koya o Na, “Logan, na cava o digitaka kina mo papitaiso?”
Oqori e a dua na taro rawarawa! “Meu muria na ivakaro ka muri Jisu Karisito,” a kaya o Logan.
“Ia o sa tu vakarau li mo talairawarawa ki na ivakaro ni saumi ikatini?” A taroga o Na. “E vakatau ga vei iko.”
Ea luvuci na lomai Logan. Oya a sega ni taro rawarawa. A se sega tikoga ni via solia tani na nona ilavo. Ia a vinakata o koya me muria na ivakaro. A vakasamataka o Logan na valetabu kei ira na tamata matadredredre era dau saumi ikatini. A qai taura e dua na icegu levu ka kaya mai, “Io.”
“Oqori e dua na digidigi vinaka!” A kaya o Na.
A qai loma vinaka cake mai o Logan. “Au kila ni bibi cake na muri ni ivunau mai na noqu maroroya kece tiko na noqu ilavo.”
Ena Sigatabu, ni solia na imatai ni nona waqanivola ni ikatini vua na bisopi, a vakila o Logan ni matadredredre voli. A yalo mamarau o koya! E se sega tikoga ni kila na veika kece me baleta na ikatini. Ia a lomana na Kalou, ka kila tu ni na vakalougatataki koya na Kalou ena nona talairawarawa kina ivakaro.
Droini mai vei Shawna J. C. Tenney