“Na iOtioti ni Tiki ni Lewenimanumanu,” iTokani, Noveba 2025, 18–19.
Na iOtioti ni Tiki ni Lewenimanumanu
Sega ni dodonu! E sega ni dua e wasea tiko vei Alex!
E dua na italanoa dina mai Amerika.
A vakabutubutu sobu yani na ikabakaba o Alex ena dua na icegu rogolevu.
A rai cake mai o Na mai na nona wilivola. “Na cava e leqa?”
“E sega ni dua ena wasea vei au!” A kaya o Alex. “Au cata niu gone e loma.” Erau dau rawata tu ga na taci Alex na veika erau vinakata. E sega sara ga ni dodonu.
“Au kila ke o kerea vakavinaka, erau na wasea vata kei iko na tacimu,” a kaya o Na.
A mataruburubu o Alex. “Au a kerea vakavinaka!”
“Vakacava mo tovolea mo vakayagataka e dua na ivakarau ni gauna? Na sala oqori ena tautauvata kina na levu ni gauna mo dou qito kina.”
“Au a vakayagataka e dua na ivakarau ni gauna!” A kaya o Alex. “Ia au na biuta beka e rua na ivakarau ni gauna me vakadeitaki vinaka kina.” A yaluma mai e dua tale na ivakarau ni gauna mai na vatavata ni valenikuro ka cabeta cake na ikabakaba. Na tacina gone, o David, a qito tiko ena TV.
“E kaya o Na mo wasea,” a kaya yani o Alex. A vakarautaka sara o koya na ivakarau ni gauna me lima na miniti. “Ni sa cariba ga qo, oya sa noqu gauna.”
Ena siga ka tarava, ni rau a vinakata ruarua o Alex kei tuakana, o Jake, me rau qito, rau a vakarautaka na ivakarau ni gauna me 30 donu na miniti yadua. Ni rau qito buloko ruarua o David kei Jake, rau a wilika na iwiliwili vata sara ga vei rau yadua. Ia ni rau vinakata ruarua o David kei Alex na iotioti ni bisikete jokeliti kamica, erau a wasea sara vakatautauvata. A qai tekivu me vakilai ni sa dodonu mai.
Ia a qai yaco mai na gauna ni vakayakavi
Ena bogi o ya, eratou a vakayakavi spaghetti kei na tikitiki ni lewenimanumanu! A tekivu taqea o Jake na pasta ena nona peleti ni bera mada ga ni kukuva yani na itaki o Alex.
“Ei, sega ni dodonu,” a kaya o Alex. “Au sa viakana talega!”
A tavia yani o Ta na tabana. “Alex, e levu tu na kakana me baleti keda kece. Raica, au na taqea mai na kemu me tautauvata ga na kei Jake.” A taqea sara o Ta eso na pasta ena peleti nei Alex.
Ni ratou sa masulaka oti na kakana, ratou sa tekivu kana kece. Ni sa otiva na kena o Alex, a se viakana ga o koya. A irova sara yani na kuro ena loma ni teveli. A vo toka kina na iotioti ni tiki ni lewenimanumanu ena dela ni ibinibini pasta. A taqea sara mai o koya ki na nona peleti.
“Sega ni dodonu! A kaya mai o David. “Oqori na kena iotioti.”
A dusia sara o Jake na tiki ni lewenimanumanu ena nona icula. “Au vinakata talega eso. Tou tikica.”
“Tikica?” A kaya o Alex. “Vei kedatou tolutolu? Ia e sa rui ka lailai sara.”
Erau a deguvacu o Jake kei David. “Ena dodonu ga kina.”
A taura mai o Jake na peleti nei Alex ka tekivu tikica tolu vakavinaka na tiki ni lewenimanumanu. E vakaraica toka o Alex ni sa lailai sobu sara na tiki ni lewenimanumanu.
A dredre o Na. “Oqori sa tikina lalai sara ga!”
A dredre talega o Ta. “E sega ni bibi me dau dodonu vinaka tu ga,” a kaya o koya. “E rawa beka ni tou tovolea me vinaka cake na nodatou dau veiwasei ena veika kece ka sega ni dau tikitikica na ka kecega.”
A raica sobu o Alex na tiki ni lewenimanumanu lalai. A vaka me ka vakalialia. A kauwaitaka dina beka vakalevu o koya me baleta e dua na tiki ni lewenimanumanu? E rairai a gadreva beka me vulica me dau wasea vakalevu cake.
Ena siga ka tarava, ni rau vinakata o Jake kei Alex me rau qito buloko, rau a nanuma me rau tara vata ga e dua na ka. Ni rau tiko e tautuba o David kei Jake, a vakatara o Alex me rau vodoka nona basikeli. Ni ratou vinakata kece me qito ena TV, a sega ni vakarautaka o Alex e dua na ivakarau ni gauna. A vakilai ni vinaka cake na veiwasei kei na yalovinaka mai na dodonu vinaka sara.
Ena bogi o ya, ni rau vinakata ruarua o Jake kei Alex na iotioti ni tiki ni vakayakavi, a kaya o Alex vei Jake me vakayagataka taucoko.
“Vinaka!” A bobo mataidua yani o Jake. “O sega dina ni via tikica tolu?”
Erau a dredre o David kei Alex. “Sega saraga!”
iVakaraitaki mai vei Alyssa Petersen