Na Vakacegu e kunei ena Masu

“Cecere cake, Tamaqu!” A kailavaka mai o Mary.

E dredre o tamana ka biliga vakalevu tale yani na siso. A vesu tu na siso kina dua na vunikau levu ka kala tu yani ena uciwai na Mississippi. E dau taleitaka o Mary na cagina kei na vakasakirikiria ni ketena ni cawiri uabaleta yani na wai ka qai suka lesu mai na siso.

“O au me tarava!” A kaya mai o Ilisapeci.

A lade tani mai na siso o Mary me laiva me vuke na tacina.

Eratou a vakaitikotiko e Nauvu na matavuvale nei Mary. Erau a lewena na Lotu na nona itubutubu ena vica na yabaki sa oti, ka rau a volitaka na ka kecega me rau toki mai kina ki kea me tomani ira na Yalododonu tale eso.

O Nauvu a dua na vanua osooso sara. Era yaco yani kina e veisiga na tamata vou. Na tara ni dua na siti vou e a cakacaka vakaukauwa, ka ra veivuke sara mada ga kina o ira na gone. Na veivuke qori a vakila kina o Mary nio koya sa tubu cake ka bibi talega. Ena so na gauna a veivuke okoya ena nona kauta mai na vakasigalevu kei Tamana ni cakacaka tiko ena valetabu vou.

Ena Sigatabu, a tokara o Mary na nona isulu vinaka duadua ka vukei ira na tacina kei na ganena me vakavakarau kina lotu. Era dau soqoni vata kece ena ruku ni vunikau me ra vakarorogo vua na Parofita o Josefa Simici ni vakavulica na veika baleti Jisu Karisito. Dau taleitaka o Mary me vulica na sala e rawa ni rau bula vata tale kina kei na Tamada Vakalomalagi ena dua na siga. Na parofita a sa raica ka rogoca e vuqa sara na veika totoka.

Ia, eso tale na tamata era a sega ni taleitaki koya na Parofita. A sa rogoca o Mary na kedra italanoa na tamata era via vakararawataki koya.

Dua na bogi ni vulaikatakata, a vukei Tinana voli o Mary ena sasamaki ni oti na ivakayakavi. A qai lesu mai vale o Tamana. E tuturu na wai ni matana.

“Na cava a yaco?” A taroga o yani tinana.

“Sa vakamatei na Parofita o Josefa,” a kaya o Tamana.

A tekivu me tagi talega o tinana. “E rawa vakacava me toso tikoga na Lotu ke sega o koya?” a taroga.

A rarawa sara ga o Mary ka rere. A kila o koya ni sa italai digitaki ni Kalou na Parofita. E rawa vakacava ni vakatara na Tamada Vakalomalagi me yaco na ka oqo?

A tekivu me tagi o koya ka cici yani ki tautuba ki na were. Ni sa tekiduru volekata e so na veikau, a tekivu me masu o Mary. “Isa, Tamaqu Vakalomalagi, na cava me keimami cakava? Sa vakamatei na neimami parofita.” A drodro sobu na wainimatana.

A qai rogo mai e dua na domo malumu kina vakasama nei Mary. Au na vakatubura cake e dua tale na parofita me liutaki ira na noqu tamata.

Na cakacegu, ka vakasinaiti ena marau. A quwata na matana ka cici lesu ivale ena kena totolo duadua e rawata.

“Tinaqu! Tamaqu!” A kaya o Mary. “Au a masu, ka sauma mai vei au na Tamada Vakalomalagi.” A tukuna vei rau me baleta na domo kei na yalo veivakacegui a vakila.

Ni rau mokoti koya o Tinana kei Tamana, a kila o Mary ni na lako vinaka na veika kece. A se rarawa voli ga o koya, ka kila tu ni na dredre na veigauna mai muri. Ia ena tomana tikoga na Tamada Vakalomalagi me dusimaki ira ka vukei ira.

Droinitaka o Kristin Sorra