“Ko e hā ʻOku Tau Fai ʻi he Temipalé?” Ko e Kaumeʻá, ʻOkatopa 2025, 38–39.
Ko e hā ʻOku Tau Fai ʻi he Temipalé?
Ko e hā ʻoku lahi pehē ai ʻa e talanoa ʻa e kau palōfitá fekauʻaki mo e temipalé? ʻOku ʻikai ko ha fale fakaʻofoʻofa pē ia. Ko e temipalé ko e fale māʻoniʻoni ia ʻa e ʻOtuá. ʻOku tau fakahoko ʻi loto ʻa e ngaahi palōmesi mo e ʻOtuá mo maʻu ʻEne ngaahi tāpuaki makehé. ʻOku tau fai ʻa e meʻa tatau maʻá e kau mēmipa hotau fāmilí kuo pekiá. Ko e temipalé foki ko ha feituʻu makehe ia te ke lava ʻo ongoʻi ai ʻa e Laumālie Māʻoniʻoní mo maʻu ʻa e nongá mo e fiefiá.
Ko ha ngaahi aʻusia ʻeni te ke maʻu ʻi he temipalé ʻi ha ʻaho!
Ngaahi Papitaiso mo e Hilifakinima ʻi he Temipalé
Naʻe akoʻi ʻe Sīsū Kalaisi ʻoku fiemaʻu ke tau papitaiso ka tau toe nofo fakataha mo e ʻOtuá (vakai, Sione 3:5). Kapau ʻe mate ha taha naʻe teʻeki ke papitaiso, ʻe lava ke papitaiso mo hilifakinima ha taha ʻo fakafofongaʻi ia ʻi he temipalé. ʻE lava ke fili ʻa e tokotaha naʻe pekiá ke ne tali ʻa e ngaahi ouaú, kau ki he Siasi ʻo e ʻEikí, mo maʻu ʻa e Laumālie Māʻoniʻoní. Te ke lava ʻo fakahoko ʻa e papitaiso mo e hilifakinima ʻi he temipalé ʻi he taʻu ʻe hoko ai ho taʻu 12.
Ko e ʻEnitaumení
ʻI he lolotonga ʻo e ʻenitaumení, te ke ako ai fekauʻaki mo e palani ʻo e fakamoʻui ʻa e Tamai Hēvaní mo Sīsū Kalaisí. Te ke fai ha ngaahi palōmesi ke muimui ʻia Sīsū Kalaisi mo tauhi ʻEne ngaahi fekaú. ʻI he taimi ʻokú ke fai ai ha ngaahi palōmesi mo e ʻOtuá, ʻokú Ne talaʻofa atu ha ngaahi tāpuaki makehe. He toki meʻaʻofa fakaofo ia!
Ko e Silá
ʻI he sila ʻi he temipalé, ʻoku talaʻofa ai ki he ngaahi fāmilí te nau lava ʻo fakataha ʻo taʻengata. Kapau te tau talangofua ki he ʻOtuá, te tau lava ʻo toe nofo mo hotau fāmilí hili ʻetau maté.
Tā fakatātaaʻi ʻe Bryan Beach