“ʻOku Fononga ʻa Seini Mēningi ki Nāvū,” Ko e Kaumeʻá, ʻOkatopa 2025, 26–28.
Ngaahi Talanoa mei he Folofolá
ʻOku Fononga ʻa Seini Mēningi ki Nāvū
ʻI he feituʻu naʻe nofo ai ʻa Seini Mēningí, naʻe angakovi ha kakai ʻe niʻihi ki ai koeʻuhí ko e lanu hono kilí. ʻI ha ʻaho ʻe taha, naʻe fanongo ʻa Seini ki ha faifekau ʻoku faiako. Naʻe taimi nounou mei ai kuó ne papitaiso.
Naʻe papitaiso foki mo e fāmili ʻo Seiní. Naʻa nau fiemaʻu kotoa ke nau fakataha mo e Kāingalotu ʻi Nāvuú. Ko ia, naʻe kamata leva ʻenau fonongá.
Naʻe fie folau vaka ʻa e fāmili ʻo Seiní ʻi he konga ʻo e fonongá, ka naʻe ʻikai ke nau maʻu ha paʻanga feʻunga. Ko ia naʻe pau ke nau lue lalo ʻi ha maile ʻe 800 (kilomita ʻe 1,300).
Naʻe pau ke nau kolosi ʻi ha vaitafe loloto mo mohe ʻi tuʻa ʻi he momokó. Ka naʻa nau fakapapauʻi te nau aʻu ki Nāvū. Naʻa nau fakafiefiaʻi pē kinautolu ʻaki ʻenau hiva pē mo lue.
Naʻe lue ʻa Seini mo hono fāmilí ʻo aʻu ki he mahaehae honau suú mo mamahi honau vaʻé. Ka ʻi heʻenau lotu ki he ʻOtuá ke maʻu ha tokoní, naʻá Ne fakamoʻui honau vaʻé.
Naʻa nau tokoniʻi ʻa e kakai naʻa nau fetaulaki mo ia ʻi heʻenau fonongá. Naʻe aʻu ʻo nau tokoni ke fakamoʻui ha kiʻi tamasiʻi naʻe puke, koeʻuhí ko ʻenau tuí.
Naʻe faifai pea aʻu ʻa Seini mo hono fāmilí ki Nāvū! ʻI he fanongo ʻa Siosefa Sāmita ki he meʻa kotoa naʻa nau fouá, naʻá ne talaange kia Seini, “Ke tāpuekina kimoutolu ʻe he ʻOtuá. ʻOku mou ʻi he lotolotonga ʻo ha ngaahi kaungāmeʻa ʻi he taimí ni.”