“Foʻi Maka ʻe Nima ʻa Tēvitá,” Ko e Kaumeʻá, ʻOkatopa 2025, 20–21.
Foʻi Maka ʻe Nima ʻa Tēvitá
Toʻo mei he “Tui Faivelenga ʻo Aʻu ki he Ngataʻangá,” Liahona, Mē 2024, 59–61.
ʻI he Fuakava Motuʻá, naʻe loto-fiemālie ʻa Tēvita ke tau mo ha saianiti ko Kolaiate (vakai, 1 Samuela 17). Naʻe ʻikai ilifia ʻa Tēvita koeʻuhí he naʻá ne ʻiloʻi ʻe maluʻi mo tokoniʻi ia ʻe he ʻOtuá.
Naʻe tānaki ʻe Tēvita ha ngaahi foʻi maka hamolemole ʻe nima, toʻo ʻene maka-taá, pea ʻalu ke fehangahangai mo e saianití. Fēfē kapau naʻe fakafofongaʻi ʻe he ngaahi foʻi maka takitaha ʻa Tēvitá, ha mālohi ʻoku tau fiemaʻu ke tau ikunaʻi ʻaki ʻa e ngaahi faingataʻa ʻi heʻetau moʻuí? Naʻá ku fakakaukau ki he ngaahi meʻa ko ʻení:
-
Ko e foʻi maka ʻo ʻeku ʻofa ki he ʻOtuá.
-
Ko e foʻi maka ʻo ʻeku tui ki hotau Fakamoʻui ko Sīsū Kalaisí.
-
Ko e foʻi maka ʻo e ʻiloʻi hoku tuʻunga totonú.
-
Ko e foʻi maka ʻo ʻeku fakatomala fakaʻahó.
-
Ko e foʻi maka ʻo ʻeku maʻu ʻa e mālohi ʻo e ʻOtuá.
Ko e mālohi ʻo e ʻOtuá ko ha mālohi moʻoni ia ʻoku tokoni ke tau fehangahangai mo e ngaahi faingataʻá mo fai ha ngaahi fili ʻoku leleí. Ko e hā te tau lava ʻo fai ke lahi ange ai ʻa e mālohi ʻo e ʻOtuá ʻi heʻetau moʻuí?
ʻOku fakamatalaʻi ʻe he tohi fakahinohino Ki Hono Fakamālohia ʻo e Toʻu Tupú ʻo pehē: “ʻOku fakafehokotaki koe ʻe he ngaahi fuakavá ki he Tamai Hēvaní mo e Fakamoʻuí. ʻOku nau fakatupulaki ʻa e mālohi ʻo e ʻOtuá ʻi hoʻo moʻuí.”
Te ke lava ʻo ikunaʻi ʻa e Kolaiate kotoa pē ʻi hoʻo moʻuí, fakataha mo Sīsū Kalaisi.
ʻAati Foʻi Maká
Ko koe leva ʻeni! Faʻu ha foʻi maka fakamanatu ke tokoni atu ke ke ikunaʻi hoʻo ngaahi Kolaiaté.
-
Kumi ha foʻi maka molemole.
-
Tohi ʻi hoʻo foʻi maká ha ngaahi founga ʻoku tāpuekina ai koe ʻe he ʻOtuá.
-
Tā pe vali ʻi he foʻi maká ke teuteuʻi ia.
-
Tuku hoʻo foʻi maká ʻi ha feituʻu te ne fakamanatu atu ʻa e ʻofa mo e mālohi ʻo e ʻOtuá ʻi hoʻo moʻuí.
Ngaahi tā fakatātā ʻa Hollie Hibbert