Ko ha Fepōtalanoaʻaki mo ʻĀsahala fekauʻaki mo e Temipalé

Fakamatala mai fekauʻaki mo koe.

ʻOku ʻi ai hoku taʻokete mo ha tuongaʻane lahi. Ko e ngaahi meʻa ʻoku ou manako aí ko e fakamālohisino siminesitikí (rhythmic gymnastics) mo e tā pianó, pea ko e lanu ʻoku ou saiʻia taha aí ko e lanu vāleti.

Kuo hoko ʻa e temipalé ko ha tāpuaki lahi kiate au, ʻo aʻu pē ki he teʻeki ai ke u lahi feʻunga ke hū ki lotó. ʻI heʻeku sio pē ki ai mei tuʻá, naʻá ku lava ʻo ongoʻi ʻa e ʻofa ʻa e Tamai Hēvaní.

ʻOku toe mahuʻinga foki ʻa e temipalé ki hoku fāmilí. ʻOku pehē ʻe heʻeku ongomātuʻá ko e taimi ʻokú na ʻi he temipalé aí, ʻokú na ongoʻi hangē kuó na foki mai ki ʻapí. ʻOkú na pehē ko ha feituʻu ia te na lava ʻo ongoʻi ofi ai ki he kau mēmipa ʻo e fāmilí kuo pekiá. Ko ha toe feituʻu foki ia te tau lava ai ʻo tokoni ke tānaki fakataha ʻa ʻIsileli.

Naʻá ke teuteu fēfē ke ʻalu ki he temipalé?

Naʻá ku teuteu ʻaki ʻeku feinga ke muimui ki he sīpinga ʻa Sīsū Kalaisí. Naʻá ku lau ʻa e folofolá, lotu, peá u ʻalu ki he lotú. ʻOku ʻikai ke u haohaoa peseti ʻe 100, ka ʻi he tokoni ʻa e Tamai Hēvaní, te u lava ai ʻo moʻui taau.

Ko e fuofua taimi ʻeku ʻalu ki he temipalé ko e taha ia ʻo e ngaahi meʻa fakaʻofoʻofa taha kuó u fai ʻi heʻeku moʻuí. Naʻá ku ongoʻi ʻa e ʻofa ʻa e Tamai Hēvaní ʻi he taimi kotoa pē. Naʻá ku ʻalu mo hoku fāmilí mo ha niʻihi ʻo e toʻu tupu mei hoku uōtí. Naʻe papitaiso au ʻe heʻeku tangataʻeikí maʻa ha niʻihi ʻo ʻeku ngaahi kuí. Naʻá ku saiʻia ʻi heʻeku ʻiloʻi naʻá ku tokoniʻi kinautolu ʻi ha meʻa naʻe ʻikai ke nau lava ʻo fai pē ʻe kinautolu.

Ko e hā ha faleʻi te ke fai ki he fānau kehe ʻoku teuteu ki he temipalé?

Ko e taha ʻo e faleʻi te u faí ko hono lau ʻo e folofolá. ʻI he taimi ʻoku tau ako ai fekauʻaki mo Sīsū Kalaisí pea hoko ko ha kau ākonga lelei angé, te tau fiefia lahi ange ʻi he hū ki he temipalé.

ʻI hoʻo fuofua fakahoko ʻa e papitaiso ʻi he temipalé, fiefia ʻi he sekoni kotoa pē! Tohi fekauʻaki mo hoʻo aʻusiá ʻi ha tohinoa koeʻuhí ke ʻoua naʻa teitei ngalo ia ʻiate koe.