5 բան, որ պետք է հիշել մարմնի անվտանգության մասին

Ձեր մարմինը պարգև է Երկնային Հորից։ Նա ցանկանում է օգնել ձեզ լինել ապահով ու երջանիկ: Եթե որևէ մեկը փորձում է ցավ պատճառել ձեզ խոսքով կամ ֆիզիկապես, դա ՆՈՐՄԱԼ չէ։ Մենք պետք է բարի և հարգալից լինենք ուրիշների հանդեպ, և պետք է ակնկալենք, որ նրանք նույնպես բարի և հարգալից լինեն մեր հանդեպ:

1. Ոչ ասելը ՆՈՐՄԱԼ է՝ նույնիսկ մեծահասակին: Դուք եք պատասխանատու ձեր մարմնի համար: Դա նշանակում է, որ դուք եք որոշում՝ արդյոք ինչ-որ մեկը կարող է ձեզ դիպչել, գրկել կամ համբուրել: Դուք կարող եք վարժվել՝ տալով հետևյալ պատասխանները՝ «Ոչ», «Ինձ մի դիպչեք» և «Ինձ հանգիստ թողեք»։ Եթե ձեզ դիպչում են կամ խնդրում են անել մի բան, որը ձեզ անհարմարություն է պատճառում, լավ է ասել՝ ոչ և հեռանալ, եթե կարող եք։

2. Իմացեք, թե որ հպումներն են անվտանգ կամ ոչ անվտանգ: Անվտանգ հպումն օգնում է ձեզ զգալ սիրված (օրինակ՝ գրկախառնություն կամ մեկ ձեռքով ծափ տալ դիմացինի հետ) կամ մնալ մաքուր և առողջ (ինչպես ծնողն օգնում է ձեզ լոգանք ընդունել կամ բժիշկը օգնում է ձեզ, երբ դուք հիվանդ եք): Երբեմն անվտանգ հպումը կարող է ցավ պատճառել, օրինակ՝ սրսկումը, բայց դա անվտանգ է, քանի որ դա ձեզ առողջ է պահում: Վտանգավոր հպումը վնասում է ձեր մարմինը կամ զգացմունքները, օրինակ՝ հարվածելը, հրելը կամ դիպչելը ինչ-որ մեկի ինտիմ մասերին: Այդ ցավոտ կամ անհարմար հպումները ՆՈՐՄԱԼ չեն:

3. Ձեր մարմնի որոշ մասեր ինտիմ են, և այլ անձ չպետք է դիպչի դրանց: Ինտիմ մասերը ներառում են ձեր մարմնի մասերը, որոնք ծածկված են լողազգեստով: Ուրիշների համար ՆՈՐՄԱԼ չէ դիպչել ձեր ինտիմ մասերին (ձեր հագուստի տակ կամ հագուստի վրայից) կամ խնդրել ձեզ դիպչել իրենց ինտիմ մասերին: Եթե դա պատահի ձեզ հետ, հնարավորինս շուտ խոսեք վստահելի մեծահասակի հետ։

4. Հիշեք գաղտնիքների և անակնկալների տարբերությունը: Անակնկալը ուրախալի բան է, որը հաճելի է բոլորի համար, ինչպես ծննդյան նվերը: Գաղտնիքն այն է, երբ ինչ-որ մեկը ձեզ ասում է, որ ոչ ոքի չասես: Եթե ձեզ խնդրում են գաղտնիք պահել այն մասին, որ ինչ-որ մեկը ձեզ դիպչում է կամ ցավեցնում է, դուք պետք է այդ մասին անմիջապես ասեք նրան, ում վստահում եք։ Շարունակեք ասել վստահելի մեծահասակներին, մինչև ինչ-որ մեկը օգնի ձեզ ապահով դառնալ:

5. Եթե ինչ-որ մեկը դիպչում է ձեզ կամ ցավեցնում է, դա ձեր մեղքը չէ։ Մարդը, որը ցավեցրել է ձեզ, կարող է փորձել ստիպել ձեզ կամ ուրիշներին հավատալ, որ ինչ-որ բան սխալ եք արել, բայց դուք դա չեք արել: Երկնային Հայրը և Հիսուս Քրիստոսը գիտեն և սիրում են ձեզ կատարյալ սիրով: Օգնություն խնդրեք վստահելի մեծահասակից և հիշեք, որ դուք միշտ կարող եք աղոթել Երկնային Հորը՝ նույնպես օգնության համար:

Բացել PDF-ը

Նկարները՝ Մայք Մուլանի