Eli ma le Laulaau

Sa faalagolago atu Eli i lana salu ma tilotilo ae i luga i lala o le aruna. Sa ia saluina laulaau i le fanua o lona tinamatua ma ua uma ona ia faia se faaputuga tele. Sa ataata o ia. O le tautoulu e masani lava ona mafaufau ai o ia i le pipī tao ma le pai maukeni.

O le taimi lava lena na sau ai Tinamatua i fafo o le fale.

“Faafetai lava, Eli!” o lana tala lea. “Ua foliga matagofie le fanua. Ua ou fiafia ua mafai ona e saluina laulaau a o lei sau le kiona muamua.” Sa ia fusimau lona ofu mafanafana faataamilo ia te ia. “O le a ou asiasi i se uo i le fale mo tagata matutua. E te fia sau?”

“Ioe!”

Sa tuu e Eli lana salu i le laau. Sa lele mai i lalo se lau lanu moli tele ma pau i luga o lona vae.

Oka se lau aulelei! sa ia mafaufau ai.

Sa ia lagonaina e tatau ona ia aveina faatasi ma ia. O lea na ia pikiina ai ma le faaeteete le laulaau.

“O ai ta te o e asi?” sa ia fesili ai.

“Mrs. Overly,” o le tala lea a Tinamatua. “Faatoa siitia mai o ia i le masina ua tea.”

A o la savavali, sa faataamilo e Eli le au o le laulaau i le va o ona tamatamailima. O le fale mo tagata matutua sa na o se poloka mai le fale o Tinamatua. Sa fiafia Eli e faatasi ma ia i ana asiasiga. Sa foliga fiafia lava tagata iina e vaai ia te ia.

Sa matala faitotoa. Na vaaia e Eli Mr. Hansen o loo nofo i lona nofoa faataavalevale i tafatafa o le laulau i luma.

“Talofa, Heber,” o le tala lea a Tinamatua.

O Mr. Hansen e lei fai mai lava se upu, ae sa sii i luga lona lima, ma sa tuu atu e Eli ia te ia se po i lona lima.

Sa la o atu i le potu o Mrs. Overly. Sa ataata o ia ina ua la savavali atu i totonu.

“Ia, talofa!” Sa aapa atu o ia i le lima o Tinamatua. “E ese le manaia o le vaai atu ia te oe. Ma o ai na e aumaia i le asō?”

“O le atalii lenei o lo’u atalii o Eli,” o le tala lea a Tinamatua. “Sa ia saluina laulaau mo au i lenei taeao.”

Sa manatua e Eli le laulaau sa ia uuina. Sa ia tuuina atu ia Mrs. Overly. “Sa ou aumaia se tasi mo oe!” na ia fai atu ai.

“Oka!” O le ata a Mrs. Overly sa faateleina a o ia aveina le laulaau. “Na faapefea ona e iloa ou te fiafia i laulaau? Sa masani ona i ai sau faaputuga matagofie o laulaau, ae sa le mafai ona ou aumaia ina ua ou siitia mai iinei. O lea ua mafai nei ona ou amataina se isi!”

O le lagona na tatau ona ave e Eli le laulaau atonu na sau mai le Agaga Paia! Sa lei iloa e Eli e manaomia e se tasi se laulaau i le asō, ae na silafia e le Tama Faalelagi.

Sa ataata Eli. Ou te mafaufau po o ai se isi e mafai ona ou fesoasoani i ai pe afai ou te faalogologo ma le totoa i le Agaga Paia! sa ia mafaufau ai.

Tatala le PDF

Ata na tusia e Lucie Bee