Fesoasoani i Tusipese

Saunia e Savannah L. Tanner

O se tala moni mai Tenimaka.

Sa fiafia Amalie e avea ma se fesoasoani. Sa fesoasoani o ia ia Tina e tuu ipu i luga o le laulau. Sa ia fesoasoani ia Tama e sue ona seevae. Ma sa ia faia le tatalo i le taimi o suesuega i tusitusiga paia faaleaiga.

Tamaitai talavou o loo faafeiloaia teineiti e toalua i le lotu

O Aso Sa uma lava, e o ai le aiga o Amalie i le lotu. Sa taina e Tina le piano. Sa uu e lona uso matua o Ema le faitotoa mo tagata uma. Sa faia e Tama faasilasilaga. Sa tufaina atu e lona tuagane matua o Alesana le faamanatuga. Sa tatau ona fesoasoani tagata uma i le lotu.

Tagata uma lava se’i vagana ai o ia!

Sa iloa e Amalie sa fesoasoani Iesu Keriso i tagata uma sa Ia feiloai i ai. Sa manao o ia e fesoasoani e pei ona sa Ia faia! Ae sa le mafai ona ia taina le piano. Sa le mafai foi ona ia fesoasoani i faasilasilaga. Sa lagona e ia sina faanoanoa laitiiti. Atonu e mafai ona ia fesoasoani atu pe a matua o ia.

O se alii o loo ofuina se suti o loo talanoa i se teineitiiti i le lotu

I se tasi aso a o lumanai le lotu, na sau ai le peresitene o le paranesi ia Amalie. Sa ataata o ia “E mafai ona e tufaina atu tusipese?” na ia fesili ai.

Sa ataata atu Amalie. “Ioe!”

O se teineitiiti o loo tauaveina se faaputuga o tusipese

Sa ia aveesea ma le faaeteete se faaputuga o tusipese lanumeamata mai se fata. Sa ia tuuina se tusi i nofoa taitasi.

O se alii, tamaitai, ma se teineitiiti o loo nonofo i se nofoa o le lotu ma faaaoga tusipese e usu ai

Ina ua amata le lotu, sa tatala e tagata uma a latou tusipese. Sa lagonaina e Amalie le fiafia tele. Sa ia fesoasoani ia i latou uma ina ia mafai ona latou pepese faatasi!

Mai lava i lena taimi, sa fesoasoani tagata uma o le aiga o Amalie i le lotu. Sa taina e Tina le piano. Sa uu e Ema le faitotoa. Sa faia e Tama faasilasilaga. Na tufaina e Alesana le faamanatuga. Ma sa tuu e Amalie tusipese i luga o nofoa.

Sa lagona e Amalie le fiafia ona e mafai ona ia fesoasoani i le Tama Faalelagi. Sa ia iloaina sa finagalo o Ia ia te ia e fesoasoani e pei ona sa faia e Iesu.