Faatumauina o le Latalata Mai o Tama

Sa faalogologo Edith i le patia-patā o le timu i le faamalama. Tulutulu, Tulutulu, Tulutulu.

Sa faauu o ia. Sa timu i le aso atoa, ma sa puaoa le lagi. Sa pogisa ma foliga faanoanoa fafo. E pei lava o ia.

Sa nofo o ia i luga o se nofoa i se tulimanu filemu, ma toso lona ofu uliuli mageso. Sa uliuli foi ona seevae fou iila. Sa moomoo maimau pe ana i ai o ia i le fale nai lo le falelauasiga.

Sa nofo i lalo lona tausoga matua o Savannah i ona autafa. “O a mai oe?” Na fesili ai Savannah. Sa malaga mai lona aiga i le falelauasiga i le taeao nei. Sa ofuina e tagata uma lavalava uli ma foliga faanoanoa.

Sa faamimigi tauau o Edith. “Atonu lava o lo o lelei.” Sa le’i fia talanoa moni lava o ia. Na maliu lona tama i ni nai aso ua mavae i se faalavelave faafuasei. Sa ia lagonaina le femilosai i lona mafaufau i ai. Sa ia matua misia lava o ia.

Sa aapa atu Savannah faataamilo ia te ia, ae faalagolago atu Edith. Sa ia faafetai mo lona tausoga. Ae aiseā na aveesea ai e le Atua lona tamā mai ia i latou?

“Pe ita ea le Atua ia te a’u?” na fesili ai Edith.

Sa faanono’u Savannah. Aisea e te manatu faapena ai?

Sa autilo ifo Edith i lalo i ona seevae. “Sa Ia aveesea lo’u tama.”

Sa melotagi Edith. Sa tilotilo ae o ia i luga ma vaaia ai Savannah o soloiesea ni nai ona lava loimata.

“Edith,” o le tala lea a Savannah, “E le o ita le Tama Faalelagi ia te oe. E alofa tele o Ia ia te oe ma lou aiga. O nisi taimi e tutupu ai mea tatou te le malamalama i ai, ae e alofa pea o Ia ia i tatou.”

“E mo’i?” na fesili ai Edith.

Sa luelue le ulu o Savannah. “E mo’i. E mafai ona fesoasoani le manatua o le a e toe vaai i lou tama! Ona sa toetu Iesu Keriso, o le a tatou toetutu uma foi. Sa ataata o ia. “Ma e mafai ona tatou taumafai e manatua mea uma tatou te fiafia i ai e uiga i lou tama ina ia faalatalata atu ai ia te ia.”

Sa mafaufau Edith i lona tama. Sa fiafia o ia e talanoa e uiga ia Iesu. Sa ia te ia se ataata sili ona lelei ma se ata sili ona malie. Sa ia tuuina mai ni opo e sili ona lelei. Ma sa ia faafiafiaina o ia i taimi uma pe a lagona e ia le faanoanoa. Na faafuasei lava ona ia lagonaina le mafanafana, e pei o loo fusi tonu mai lona tama.

Sa ea a’e o ia i luga. “Ua maua sina fesoasoani i lena mea. Ae o loo ou faanoanoa pea.”

“E le afaina le faanoanoa. O loo ou matua faanoanoa foi,” o le tala lea a Savannah. “Matou te misia uma lava lou tama.”

Sa mafaufau Edith i se mea sa ia aoaoina i le Peraimeri. “E mafai ona fesoasoani mai le Tama Faalelagi ia i tatou pe a tatou faanoanoa,” o lana tala lea. “E mafai ona ta faia nei se tatalo?”

Sa luelue le ulu o Savannah, ma sa la piilima.

“Tama Faalelagi e, faafetai atu ia te Oe mo Iesu ma Lona Toetu,” o le tala lea a Edith. “Faafetai ia te Oe mo lou alofa pea ia i matou. Faamolemole ia tausia lou tama. Faamolemole fesoasoani mai ia i tatou ia manatua o ia ma ia faalatalata mai o ia i o tatou fatu. I le suafa o Iesu Keriso, amene.”

Sa pupula ona mata ma mānava tele lava.

Ina ua latou savavali ese mai le fale, sa malulu ma timuga lava. Ae o lenei ua i ai sina susulu laitiiti o le la o loo autilo mai i ao puaoa. Sa foliga faanoanoa lava fafo, ae o le taimi nei, sa lagona foi sina faamoemoe. E pei lava o ia.

Tatala le PDF

O Ata na tusia e Zhen Liu