O Le Tatalo Filemu a Kimber

Sa tusi atu lona lima i iputi i luga o le laulau. Sa ia tatu vae, oi, ma toe faasino atu.

Sa toe liliu atu Tinā. “E te manaomia se mea?”

Sa toe faasino atu Kimber i iputi. I le faia o se moto ma lona tamatamailima o faasino atu, sa ia faia ai se laina pio i lona gutu, o le faailoga lea mo le vaiinu i le Gagana Faailoga faaAmerika.

“Oi. E te manao i le vaiinu,” o le tala lea a Tinā.

Sa luelue le ulu o Kimber, ma faatalitali a o sasaa atu e Tinā se ipu mo ia.

O le tuai o le tautala a Kimber na faigata ai ia te ia ona tautala leotele. Sa le fiafia o ia i lona leo pe a ia faia ni mea sese. Na tiga ai ona taliga! Pe a faasa’oina o ia e isi tagata, e tiga ai ona lagona. Sa ia faaaogaina le gagana fai faailoga ma Tinā i le fale, ae sa faasolo ina faigata mea uma i le aoga ma le lotu ona o le toatele o tagata e le iloa le gagana fai faailoga.

Sa ia vaai i se fomai mo le tautala i nai aso uma e fesoasoani ia te ia e faataitai le tautala. Ae sa faigata pea. Sa ia lagonaina le faanoanoa.

I ni nai aso mulimuli ane i le Peraimeri, sa nofo ai Kimber ma faalogologo i le lesona. Sa latou aoao e uiga i le tatalo. “E mafai ona e talanoa i le Tama Faalelagi e uiga i soo se mea,” o le tala lea a Sister Dees. “O le a tali mai pea o Ia.”

E fiafia Kimber e mafaufau e tali mai le Tama Faalelagi i tatalo. Ae e faapefea ona ia talanoa atu ia te Ia? Sa faigata ona faaaoga le tele o upu.

I le taimi o tusitusiga paia faaleaiga i lena po, sa faalogologo ai Kimber ma ona uso laiti a o feauauai Tina ma Tama e faitau. Sa fiafia Kimber e faalogo i le leo malu o Tama a o faasino atu e Tinā upu o loo i le itulau ina ia mafai ona mulimuli atu Kimber.

“Valaau atu i lona suafa paia, ina ia alofa mutimutivale o ia ia te outou,” o le faitau lea a Tama. Ioe, tagi atu ia te ia mo le alofa mutimutivale; ona ua malosi o ia e faaola.”

“Tagi ia te ia?” o le fesili lea a lona tuagane o Hunter. “O le a le uiga o lena mea?”

“O lona uiga o le tatalo,” o le tala lea a Tama. “Afai e te i ai i se faafitauli, o le a e tagi atu mo se fesoasoani. O le ole atu i le tatalo o le tagi atu lea i le Tama Faalelagi mo se fesoasoani.”

Na luelue le ulu o Kimber. Sa masani ona ia lagonaina e pei sa ia manaomia se fesoasoani. Ae e faapefea ona ia tagi atu i le Tama Faalelagi e aunoa ma le tautala leotele?

“O nei fuaiupu e sosoo ai e faatatau uma lava i le tatalo,” o le tala lea a Tinā. “E mafai ona tatou tatalo e uiga i soo se mea—o lo tatou aiga, a tatou meaai, ma soo se mea tatou te ono manaomia.” Ona ia faitau pea lea. “‘Pe a outou lē tagi atu i le Alii, ia tumu o outou loto, ma tosina atu i le tatalo e le aunoa ia te ia.’”

Sa taofi Tinā ma tilotilo atu ia Kimber. “O lona uiga afai e te tatalo i lou loto ma lou mafaufau, e faafofoga mai le Tama Faalelagi ia te oe.”

Sa lagona e Kimber se faamoemoe, ma se lagona fiafia. Atonu e mafai moni lava ona faafofoga mai le Tama Faalelagi i ana tatalo, e tusa lava pe na te le faaaogaina leotele upu. E mafai ona ia tatalo i lona loto.

O lena po, sa tootuli ai Kimber i tafatafa o lona moega ma Tina e faia le tatalo moe. E masani lava ona faia e Tinā le tatalo a o faalogologo Kimber. Ae o le taimi lea, sa manao ai Kimber e taumafai e tatalo i lona loto.

O lo’u taimi, sa ia faailo atu ai, ma faasino atu ia te ia lava ma piilima. Sa moeiini ona mata ma mafaufau i mea uma sa ia manao ia iloa e le Tama Faalelagi. I lona mafaufau, sa ia ta’u atu ai ia te Ia le mea sa ia faafetai ai. Sa ia ta’u atu ia te Ia le faigata tele ona tautala. Ma ole atu mo Lana fesoasoani.

E le’i umi ae ia lagonaina se lagona o le filemu mai lona ulu e oo i ona tamatamaivae.

Ina ua uma, sa pupula mata o Kimber.

Sa opo o ia e Tinā. “Lelei le tatalo, Kimber.”

Sa ataata Kimber. Sa ia iloa na faafofogaina e le Tama Faalelagi lana tatalo. Ma sa ia iloaina o le lagona toafilemu i lona loto o Lana tali lea.

Tatala le PDF

O Ata na tusia e Brooke Smart