Popole i le Aoaoga
Tama Faalelagi e, sa ia tatalo, faamolemole fesoasoani mai ia te au ia ou to’a.
O se tala moni mai Aferika i Saute.
Sa tatavale le fatu a Allyson. Na toetoe lava o lona taimi lea e tuuina atu ai lana aoaoga o le talafaasolopito. Sa ia faataitai pea lava pea ma lona tina i le po na muamua atu. Ae sa ia lagonaina pea le popole tele. Sa inoino o ia e talanoa i luma o tagata!
”O le isi e sosoo ai o Allyson,” o le tala lea a Mrs. Tanner. “Faamolemole sau e tuuina mai lau lipoti.”
Sa tu i luga Allyson mai lana kesi ma savali atu ma le popole i luma o le potuaoga. Sa tilotilo atu o ia i foliga o ana uo i le vasega ma manava lē mautonu. Sa afugia ona lima. Sa ia soloina i luga o lona toniga aoga.
Sa ia tatalaina lona gutu e amata ai. Ae sa faafuasei ona ia le iloa po o le a le tala e fai. Sa sioa atu tagata uma ia te ia, ma faatalitali mo ia e tautala. Sa pei o upu uma sa ia taulotoina sa mau i lona faai. Sa lagona le femilosa’i o lona manava.
Ona manatuaina lea e Allyson o se mea. I ni nai vaiaso ua mavae, sa faamatala ai e lona tama ia te ia se tala e uiga i le auala na ia tatalo ai mo le Agaga Paia e fesoasoani ia te ia.
Sa vave ona faia e Allyson se tatalo i lona mafaufau. Tama Faalelagi e, sa ia tatalo, faamolemole fesoasoani mai ia te au ia ou to’a ma ia lelei la’u aoaoga. I le suafa o Iesu Keriso, amene.
O le taimi lava na uma ai le tatalo a Allyson, na amata ona liusuavai ese le popolevale. Sa toamalie ona tauau, ma sa manino lona mafaufau.
O le taimi lea ina ua ia tatalaina lona gutu, sa faigofie ona oo mai upu. “O la’u lipoti o loo i ai i uluai tagata na nonofo i Aferika i Saute i le vaitau o le 1600,” o lana tala lea. Sa ia faasoa mai mea moni sa ia taulotoina. A o taunuu atu o ia i le faaiuga o lana aoaoga, sa salalau atu se lagona o le fiafia ia te ia. Sa uma lava ona ia faia!
Sa nofo i lalo Allyson ma se ataata lapoa i ona foliga. Sa le atoatoa lana lipoti, ae sa matuai mitamita lava o ia i le auala na ia faia ai.
“Ei,” o le musumusu mai lea a lana uo o Emily mai le kesi i ona tafatafa. “Manaia tele lau mea na fai! Sa ou faapea e te le fiafia e talanoa i luma o tagata.”
Sa ata filemu Allyson. “O lo’u manatu foi lena! Sa na ona ou tatalo lava ma ole atu i le Atua mo se fesoasoani, ma sa Ia fesoasoani mai ia te au.”
Sa filemu Emily mo se sekone. Ona ia musumusu mai lea, “Oka, atonu e tatau foi ona ou tatalo atili.”
A o amata le isi tamaitiiti aoga, sa mafaufau Allyson i le mea na faatoa tupu. Sa matuai ese lava ona lagona ina ua uma ona fai lana tatalo. Sa fesoasoani moni lava le Agaga Paia ia te ia e lagona le toafilemu ma le lototoa!
Sa faia e Allyson se isi tatalo puupuu i lona mafaufau. Faafetai lava, Tama Faalelagi, sa ia tatalo ai. Faafetai atu ia te Oe mo le auina mai o le Agaga Paia e fesoasoani mai ia te au.
Ata na tusia e Silvia Provantini