O le Meatuu Ata Ta’e

Sa savali atu Erica i totonu o le potu o ona matua ma tilotilo atu i le ata o loo i luga o le puipui. O se ata o Iesu Keriso. Sa tele taimi na ia vaai ai muamua i ai, ae o le taimi lenei sa ia matauina ai se mea.

“Ei, Tama? O fea na sau ai lenei ata? Aisea ua ta’e ai le meatuu ata?”

Sa tilotilo ae Tama i luga mai le faia o le moega. “O lena ata o le ata a Oma.”

O Oma o lona tinamatua sa nofo i Holani. E fiafia lava Erica e faalogo i le faamatala mai e Tama o tala e uiga i lona olaga.

Sa saofai Tama i autafa o Erica i luga o le moega. “Ina ua tuputupu ae Oma ma tuua le aiga e avea ma se tausimai, sa tuuina atu e lona tina ia te ia le atavali lenei,” o lana tala lea. “Sa ia tautaua i totonu o lona potu. I se tasi aso na pau ai mai le puipui, ma ta’e ai le tulimanu. Sa le mafai ona ia faaleleia, ma ua tae lava talu mai lena taimi. Ona ou tuputupu ae lea ma siitia ese mai le aiga, na tuuina mai e Oma ia te au.”

Na fesili Erica, “Aisea e te le’i faaleleia ai?”

“E mafai ona ou faaleleia,” o le tala lea a Tama. “Ae o se faamanatu lelei. E fesoasoani ia te au e manatua ai e ui lava atonu tatou te lagonaina i nisi taimi le tiga po o le nutimomoia, ae e mafai lava e Iesu Keriso ona fesoasoani ia i tatou. Ma e faamanatu mai ai ia te au e silafia ma alofa o Ia i lo tatou aiga.”

Sa lagona e Erica le mafanafana i totonu a o ia toe tilotilo i luga i le ata. Sa manaia le lagona o le iloaina sa tausia e le Alii lona aiga.

I ni nai aso mulimuli ane, sa sauni ai Erica e moe. Sa fufulu ona nifo ma ofu lona ofu moe. I ni nai minute, na sau Tama e faalogologo i lana tatalo moe ma faaafu o ia.

Ae na faalogoina e Erica se leo. O lona tuagane o Tate i lona potumoe i talaane. Sa talanoa o ia ia Tama, ma sa foliga mai o loo tagi o ia.

“E leai se tasi e fiafia ia te au,” sa ia faalogoina ai le tala a Tate i le va o le tagi masusu.

Sa mafaufau Erica i le ata o Iesu Keriso i le faavaa ua tae. Sa mafaufau o ia i le mea na fai mai ai Tama e uiga i le auala e mafai ai e le Faaola ona fesoasoani ia i tatou pe a tatou lagona le tiga pe nutimomoia. E foliga mai ua tiga Tate i le taimi nei, sa ia mafaufau ai.

“Ou te alofa ia te oe. E mafai ona sili atu taeao,” sa ia faalogo ai o fai atu Tama ia Tate. “O le a ou fai atu manuia i le po ia Erica. Ou te toe vave mai lava.”

Ina ua savali atu Tama i totonu o lona potu, sa fesili atu Erica, “Aisea ua tagi ai Tate?”

“Sa fai atu e nisi o ana uo i le aoga ni mea leaga ia te ia,” o le tala lea a Tama.

Sa faauu Erica. Ona oso a’e lea o sona manatu. “E mafai ona tatou faia faatasi se tatalo ma ia?”

Sa ataata Tamā. “Ou te manatu e manao o ia i lena mea.”

Sa tuitui lemu atu Erica i le faitotoa o le potumoe o Tate ma autilo atu i totonu. “Tate? E mafai ona ma tatalo faatasi ma oe?”

Sa masῡsῡ Tate ma solo ona mata. “Ioe.”

Sa tootutuli i lalo Erica, Tate, ma Tama, ma sa faia e Erica le tatalo. “Tama Faalelagi,” sa ia fai atu ai, “faamolemole faamanuia ia Tate. Fesoasoani ia te ia ia iloa e alofagia o ia ma e taua o ia.”

Ina ua uma, sa matuai opo e Erica ma Tate le tasi ma le isi. “Faafetai,” na ia musumusu mai ai.

Ona toe foi lea o Erica ma Tama i lona potumoe. A o ia faa’afu o ia, sa ia fai mai, “Ou te fiafia na e fesili mai pe mafai ona ta tatalo faatasi ma Tate. O le a le mea na e maua ai le manatu e fai se tatalo faatasi ma ia?”

“Sa ou lagona le faanoanoa ina ua ou faalogoina o tagi o ia,” o le tala lea a Erica. “Ma sa ou mafaufau i le ata o Oma o Iesu ma le faavaa ua tae. Sa ou manatu e manaomia ona manatua e Tate e ui lava ina lagona e ia le tiga, ae e alofa Iesu ia te ia ma popole ia te ia.”

“O se faamanatu manaia tele lena,” na fai atu ai Tamā. “Ou te iloa e alofa ma popole foi o Ia ia te oe, lau pele.”

Sa sogi atu Tama i lona ulu ma tape le moli. Sa faapupuu atu Erica i totonu o ona palanikeke. Sa faafetai o ia ona o le a i ai pea Iesu Keriso e fesoasoani i lona aiga.

Åbn PDF

Ata na tusia e Alyssa Tallent