O Le Faafitauli o le Uati
“Ua e le toe taalo lava ma matou!” Na fai atu ai Liam.
O se tala moni mai le ISA.
Sa tatala e Viliamu le afῑfῑ ma uu i luga lana uati fou iila. Ua oo lava ina i ai ii! Sa matuai fiafia o ia. Sa galue malosi o ia ina ia maua le tupe e faatau ai, ma sa aoga tele.
Sa ia faamauina le uati i lona tapulima ma amata ona faasolo i luga o lona lau. Sa matuai tele naua taaloga mananaia! Sa ia taina se taaloga tainasoa ma amata ona taalo.
O le aso na sosoo ai i le malologa, na faaali ai e Viliamu lana uati i lana uo o Liam. “Oka, manaia!” Na fai atu ai Liam. Sa ia matamata i le taalo ai o Viliamu i taaloga mo sina taimi. Ona ia fesili lea, “E te fia taalo nei i le kikipolo?”
“Masalo i se taimi mulimuli ane,” o le tala lea a Viliamu. Sa tamoe ese atu Liam e taalo, ae sa nofo Viliamu i lalo o se laau e taalo i le taaloga tainasoa.
I le malologa o le aso na sosoo ai, na toe taalo ai foi Viliamu i lana uati. Sa tamoe atu Liam ia te ia. “E te sau e te taalo?”
Na tilotilo mai i luga Viliamu mai lana uati. “Leai, ou te fia taalo pea i le taaloga lenei. Atonu o se isi taimi.”
Sa faanonou atu le pupula a Liam. “Ae e masani lava ona tatou taaalo i le kikipolo i le malologa!”
“Na o lou fia faaumaina lava o le taaloga lenei,” o le tala lea a Viliamu.
Sa liliu atu Liam ma savali ese.
O le mea lava lea e tasi na tupu i le aso na sosoo ai. Ma le isi aso. I luga o le pasi e agai i le fale, sa nofo Liam i autafa o Viliamu. “Aisea na e le taalo ai ma i matou i le asō?”
“Sa na ona ou taalo lava i se taaloga vave i la’u uati,” o le tala lea a Viliamu. “Ua ou latalata lava i le pasia o le isi tulaga.”
Sa piilima ia Liam. “E te taalo i taimi uma i lau uati. “Ua e le toe taalo lava ma matou!”
Sa lagona e Viliamu le vevela o ona foliga. ”O le malologa ua na o le pau lea o le taimi i le aoga e mafai ai ona ou taalo i la’u taaloga,” o lana tala lea. Sa amata ona leotele lona leo. “E pule lava a’u i mea ou te manao ai i le malologa!”
Sa foliga le fiafia Liam. ”Ia, ua ta le toe uo la!”
Sa le toe i ai se tala a Viliamu. Sa ia liliu atu i le faamalama ina ia le mafai ona iloa e Liam ona foliga. Sa loimatā ona mata.
Ina ua taunuu le pasi i le fale o Viliamu, sa tamoe vave atu o ia i le fale i le vave na te mafaia. Sa ia faapau ifo i luga o le nofoa ma amata ona tagi. Sa moomoo maimau pe ana le faatauina lava lana uati.
“O le a se mea ua tupu?” O le fesili lea a Tina.
Sa fogifogi le isu o Viliamu. ”Na fai mai Liam e le mafai ona ma toe uo ona ou te taalo i la’u uati i taimi uma.”
Sa nofo a’e Tina i ona autafa. ”E foliga mai e manatu o ia e sili atu lou popole i lau uati nai lo lou popole ia te ia.”
“E le sa’o lena mea!”
“Ou te iloa e te popole ia Liam.” Sa opo o ia e Tina. “Ae o le ala tatou te faaaluina ai o tatou taimi e mafai ona faaalia ai mea tatou te manatu e sili ona taua.”
Sa mafaufau Viliamu mo sina taimi. “E sili atu ona taua tagata. Ae e mafai foi ona ou taalo i la’u uati?”
“E mafai ona e mafaufau i se auala e fai ai lena mea?” O le fesili lea a Tinā.
Sa luelue le ulu o Viliamu. ”Atonu e mafai ona ou taalo kikipolo ma Liam i le malologa, ae taalo i la’u uati mo sina taimi pe a ou sau i le fale mai le aoga.”
“O se manatu lelei lena.”
O le aso na sosoo ai i le aoga, na maua ai e Viliamu ia Liam i le malologa. “Faamagalo mai a’u ona ua tele lo’u taalo i la’u uati,” o lana tala lea. “E mafai ona ou toe taalo ma oe i le kikipolo?”
Sa ataata Liam. “Ioe!”
Ina ua oo i lona taimi, sa kiki e Viliamu le polo ma tamoe i le vave na te mafaia. Sa mafai ona ia faalogoina le faamalosiau mai o Liam.
E mafai ona faatali lana uati. Na manaia le lagona o le faatasi ma lana uo.
Ata na tusia e Melissa Manwill Kashiwagi