Molimau i le Taimi o Meaai Mama

Saunia e Kate Anderson

Na oo mai se manatu i le mafaufau o Zoe: Tu atu mo mea e te talitonu i ai.

O se tala moni mai Ausetalia.

O se teineitiiti o loo tauaveina se sanuisi o loo savali pasi ni teineiti e toalua o loo nonofo i se laulau o le potu’ai.

O le taimi lea o meaai mama i le aoga. Sa uu mai e Zoe lana sanuisi ma savali atu i le laulau. Na oo mai le susulu o le la i le faamalama ma susulu ifo i ona luga. O se aso mafanafana, ma sa lagona e Zoe le fiafia.

Sa talanoa tagata uma, ma sa tumu le potuaoga i le leo o tamaiti fiafia. Sa nonofo i lalo i se nofoa lata ane se teineitiiti e igoa ia Luna ma lana uo o Jesse.

“O oe o se Kerisiano?” Na faalogo Zoe o fesili atu Luna ia Jesse.

Sa lagona e Zoe le magoto o lona fatu. E masani lava ona fai atu e Luna ni tala le lelei! O le a se tala o le a ia fai atu ai? Sa filemu le potuaoga atoa a o latou faalogologo.

“Ou te le talitonu ia Iesu,” o le tala lea a Luna.

Sa faia taitoatasi e le toatele o tamaiti i le vasega a Zoe le mea lava lea e tasi.

O se teineitiiti o loo foliga fefe, o loo saofai i se laulau ma uu se sanuisi

Sa tatavale le fatu o Zoe. Sa manao o ia ia lototele ma fai atu sa talitonu o ia ia Iesu Keriso, ae sa fefe o ia i le mea o le a tupu. O le a se manatu o isi tagata uma? Pe o le a leai ni ana uō?

Na faafuasei lava ona ia lagonaina se lagona mafanafana, ma le toafilemu. Na oo mai se manatu i lona mafaufau: Tu atu mo mea e te talitonu i ai. O le a ou puipuia oe. Na iloa e Zoe na sau mai le Agaga Paia.

Teineitiiti o loo nofo i le potu’ai ma talanoa i teineiti e toalua

Sa manava loloa o ia. “Ou te talitonu ia Iesu Keriso,” na ia fai atu ai. “Ma ou te iloa e alofa o Ia ia te a’u. E alofa foi o Ia ia te oe, e tusa lava pe e te le talitonu ia te Ia.”

Na faatupulaia le malosi o le lagona mafanafana. Sa lagona e Zoe le fiafia ua tuputupu ae i totonu o ia.

E le’i umi ae uma le taimi o mea’ai mama, ma ua oo i le taimi e taaalo ai i fafo. Sa osooso atu Zoe i le malae taalo. Sa mulimuli atu nisi o tamaiti o lana vasega ia te ia.

“Sa ou fiafia i le mea na e fai atu ai ia Luna,” o le tala lea a se tasi teineitiiti.

“O a’u foi,” o le tala lea a se isi tamaitiiti. “E mafai faapefea foi ona ou talitonu ia Iesu?”

Sa ataata Zoe. “E mafai ona e alu i le lotu ma faitau tusitusiga paia e aoao atili ai e uiga ia te Ia! Ma e mafai ona e taumafai malosi e mulimuli i mea na Ia aoao mai.”

Sa fiafia Zoe sa maua le lototele e faasoa atu ai ona talitonuga. Sa ia iloaina o le a i ai pea Iesu Keriso iina e fesoasoani ia te ia ia lototoa.