Faalogoina o le Agaga Paia

Sa taumafai Chim e pupula ona mata fiamoe. Ua oo i le faaiuga o le vaiaso!

“Taimi o le nofo i luga, a leai o le a tatou tuai,” o le valaau mai lea a Tinā.

Sa moomoo Chim e mafai ona umi atu lona moe, ae o le aso lenei o le aso o le maketi. Sa manaomia ona ia fesoasoani ia Tinā e faatau ni meaai mo le vaiaso. O lea na ia tu ai i luga ma faatopetope le ’ai o lana meaai i le taeao.

Sa tele mea na faia e Tinā mo Chim ma ona uso e toalua. Sa pisi tele o ia i le galuega, ma sa le tele sona taimi e i ai i le fale. Sa galulue faatasi Chim ma ona uso e faia le tele o feau. Sa lagona e Chim le fiafia e fesoasoani atu.

Ina ua toe foi mai Chim ma Tinā mai le maketi, sa tatau ona alu ese atu Tinā mo le galuega. A o alu ese atu o ia, sa sauni Chim ma ona uso mo le Aso Sa. Sa faatulaga e Chim seevae, ofuvae, ma le ofutino o le a ia ofuina i le lotu taeao. Sa fesoasoani lona uso matua o Robin ia te ia e ‘auli lona ofutino. Ona latou faia lea o le taumafataga o le afiafi.

Sa faamama e Chim le umukuka ina ua sau Tinā i le fale. Na foliga matuā lelava lava o ia.

“Ia lea, Tinā.” Sa tuu atu e Chim ia te ia se ipu o meaai vevela e ai.

Na ataata Tinā. “Faafetai mo lau fesoasoani i lenei aso. E foliga manaia lenei meaai!”

O le taeao na sosoo ai, na ala vave ai Chim ma sauni mo le lotu. Sa fiafia o ia e vaai i ana uo i le Peraimeri ma aoao e uiga ia Iesu Keriso.

“Tina?” sa ia valaau lemu mai ai, ma tuitui atu i lona faitotoa. “E te sau ma matou i le lotu i le asō?”

“E le mafai,” sa fai atu ai Tinā. “E tatau ona ou faigaluega i le aoauli nei.”

“Ua lelei.” Sa lagona e Chim sina faanoanoa laitiiti. Ua toeitiiti atoa le tausaga talu ona faatasi Tinā ma i latou i le lotu. “Ia ave ma le saogalemu le taavale ma ia manuia le aso,” na ia fai atu ai ia te ia.

“Ua e sauni e alu?” o le fesili lea a lona uso laitiiti o Mattew.

“Ioe!” Sa fai e Chim ona seevae ma tamoe atu i fafo o le faitotoa ma ona uso e o i le pasi.

Sa fiafia Chim ina ua savali atu i totonu o le falelotu. Sa taumafai o ia e mafaufau ia Iesu Keriso i le taimi o le faamanatuga. Ma i le Peraimeri, sa ia taumafai malosi atili e faalogologo i le lesona a Sister Ortega.

“O le asō tatou te aoaoina ai e uiga i le Agaga Paia,” o le tala lea a Sister Ortega. “E aumai e le Agaga Paia ia i tatou savali mai le Tama Faalelagi. E tai pei o se leitio.”

Sa tilotilo atu Chim i le ata o se leitio sa uuina i luga e Sister Ortega.

“E ola se leitio e ala i le mauaina o se faailo ma liua i ni peau galugalu o le ‘ea e mafai ona tatou faalogoina,” sa ia faamatala mai ai. “E tatau ona e setiina i le alaleo sa’o e faalogo ai. Ina ia lagona le Agaga Paia, e manaomia foi ona tuu o tatou loto ma mafaufau i le ala sa’o. E faapefea ona tatou faia lena mea?”

Sa mafaufau tagata uma. Ona fai mai lea o Chim, “E ala i le mulimuli ia Iesu Keriso ma tausi poloaiga.”

Na ataata Sister Ortega. “E sa’o lena.”

Ina ua uma le lotu, sa toe fesoasoani Chim e toe fai le meaai o le afiafi. Sa ia lagonaina le mafanafana i totonu a o ia fesoasoani atu. Sa ia iloaina o le auauna atu i lona aiga, ua ia tuuina atu ai lona loto i le ala sa’o e lagona ai le Agaga Paia.

Ina ua taunuu atu Tinā i le fale, sa fusi tele o ia e Chim. Sa latou nonofo i lalo faamanuia meaai, ma amata ona aai.

“Mate mai mea na ou aoaoina i le lotu i le asō,” o le tala lea a Chim. E fiafia o ia e ta’u atu ia Tinā e uiga i le Peraimeri.

“O le a?” O le fesili lea a Tinā.

“Sa matou aoao e uiga i le Agaga Paia,” o le tala lea a Chim. “E pei lava o se leitiō. A tatou tausia poloaiga, e mafai ona liliu atu o tatou loto i le alaleo sa’o e faalogo ai ia te Ia.”

Sa lue atu le ulu o Tinā. “Lelei tele. O le a la se faataitaiga o le tausia o poloaiga?”

Sa ataata Chim. “Fesoasoani i lou tina!” Na ata o ia. “Ou te alofa ia te oe, Tinā.”

O Ata na tusia e Uran Duo