O Gaoioiga o le Sau Mulimuli Mai ia te A’u

“Ia manatua ua tele lava le taua o agaga i le silafaga a le Atua” (Mataupu Faavae ma Feagaia 18:10). O lona uiga e taua tagata uma i le Tama Faalelagi, e aofia ai ma oe! Tusi se ata o oe lava ia. Taumafai e teuteu i ni sapalai tusiata eseese! I le pito i luga, tusi ai “E Alofa le Atua ia te A’u.”

Ua fetalai mai Iesu Keriso e faalogo ia te Ia (tagai i le Mataupu Faavae ma Feagaiga 19:23). E manatua e tagata e lelei le faalogo mea na latou faalogo i ai. Nonofo i se lio. E tasi le tagata e musumusu atu se upu o le talalelei. E toe fai e le isi tagata ma faaopoopo i ai se upu fou. Alu faataamilo i le lio seia faaopoopo e tagata uma se upu e manatua!

Na toefuatai mai e Iesu Keriso Lana Ekalesia i aso nei i le tulaga sa i ai a o i ai o Ia i le lalolagi (tagai i le Mataupu Faavae ma Feagaiga 20). Faailoga ipu palasitika i faamanuiaga ua tatou maua o se vaega o le Ekalesia a Iesu Keriso, e pei o le perisitua, papatisoga, perofeta. Ona faaputu lea o au ipu i se olo maualuga!

E fiafia le Tama Faalelagi pe a tatou pepese mai o tatou loto (tagai i le Mataupu Faavae ma Feagaiga 25:12). Filifili ni pese a le Peraimeri e usu faatasi. Ia fai ni taga e o faatasi ma upu.

Ua maua e le perofeta faaaliga mai le Tama Faalelagi ma Iesu Keriso mo le Ekalesia (tagai i le Mataupu Faavae ma Feagaiga 28:7). Lolomi pe tusi se ata o le perofeta. I le pito i luga, tusi ai “Ua fai mai le perofeta …” Tusi pe tusi se ata o ni mea na aoaoina mai e lo tatou perofeta ia i tatou.