Peseina o Ataata Lafoia ia Mou Ese Atu

“Taimi o le moe,” o le tala lea a Mamá ma ataata.

Sa alu atu Logan i totonu o lona potu. Sa fai lana tatalo ma tolotolo atu i le moega. Ona faitau lea e Mamá ia te ia o se tala. Sa moeiini lemu ona mata. E le’i umi ae moe o ia.

Ae sa i ai se miti taufaafefe a Logan. Sa na o ia i se nofoaga pogisa. Sa ia vaaia se sauai tele ma matautia ma nifo tetele. Sa foliga o le a oso mai ia te ia. Ona amata lea ona tamoe atu ia te ia!

Sa taumafai Logan e sola ese. Ae na se’e o ia ma pa’u ai! Sa faasolo ina latalata mai le sauai seia oo ina—

Sa ala a’e Logan ma nofo i luga o le moega. Sa ia soloiesea loimata mai ona mata ma vaaia ai o loo pogisa pea fafo.

Sa manao o ia e talanoa i ona matua e uiga i le miti. Ae sa ia lē manao e alu ese mai lona moega. O le pogisa na ia lagona ai e pei o loo lafi se sauai i se mea. Sa foliga taufaafefe ataata lafoia uma. O se taifau o loo ou i fafo sa foliga mai o se sauai o loo ou.

Sa toso a’e e Logan le ieafu i lona isu. Sa fefe tele o ia e minoi.

Sa manao o ia e toe moe. Ae o taimi uma lava e moeiini ai ona mata, na te vaaia ai foliga ita o le sauai ma nifo maai. Sa le mafai ona taofia lona tilotilo atu i ataata lafoia taufaafefe.

Ona ia vaaia lea o se ata i luga o le laulau i tafatafa o lona moega. O se ata o ia, o ona uso e toalua, o Papá, ma Mamá i fafo atu o le malumalu i Monterrey, Mekisiko. Sa foliga fiafia i latou.

Na faafuasei lava ona oso mai i lona mafaufau upu o lana pese Peraimeri e sili ona fiafia i ai. “Ou te fia vaai i le malumalu,” na amata ai ona pese filemu Logan. “Ou te ulu i ai i se aso. E lagona ai le Agaga ma ou tatalo ai.”*

A o pese o ia, sa mafaufau Logan i lena aso i le malumalu ma lona aiga. Sa ia lagonaina le toafilemu tele. Ona o le malumalu, ua mafai ai ona toe faatasi o ia ma lona aiga e faavavau.

Sa le mafai e Logan ona faalogoina le ou mai o le maile ona o lona leo. Sa moeiini ona mata ma faaauau pea ona pese. “E moni lava upu nei e faavavau aiga.” Sa ia lagonaina se filemu i lona loto lea na ataata ai o ia. Sa ia iloaina e leai se sauai.

Sa pogisa ma taufaafefe le potu. Ae o lenei ua avea ma se nofoaga toafilemu ma le saogalemu. Sa toe faalagolago atu Logan i lona aluga ma moe filemu ai.

Ina ua ala a’e o ia, ua susulu le la i fafo. Sa tu i luga o ia ma tilotilo atu i le susulu o le la o loo atagia mai ai lana ata o le malumalu. Sa ia faaleoina lana pese e sili ona fiafia i ai a o sauni mo le lotu.

A o agai atu i le lotu, sa ia ta’u atu i lona aiga lana miti taufaafefe ma le pese sa ia usuina. Sa faalogologo o ia i lauga ma usuina viiga i le falesa. Ua oo nei i le taimi e o ai i le Peraimeri.

Sa fiafia Logan e faalogologo i le piano. Ma o lenei ua ia iloa o nisi pese ua lava le malosi e mafai ai ona aveese atu sauai taufaafefe.

“O mai i le taimi o pesepesega,” o le tala lea a le taitai o le Peraimeri. “O le a se pese e tatau ona tatou usuina muamua?”

“Ou te iloa!” o le tala lea a Logan, ma sii maualuga lona lima i le ea. “Tatou usuina le ‘Ou te Fia Vaai i le Malumalu.’”

O Ata na tusia e Carolina Farías