Lagonaina o le Faanoanoa

Sa toso e Savannah palanikeke i luga o lona ulu. O le asō sa o se aso faigata tele.

I le taimi o le aoga ananei, sa le mafai e Savannah ona taulai atu i se mea. Sa ia lagonaina le vaivai, lē fiafia, ma le faanoanoa. Sa i ai se avega mamafa i lona manava lea sa le mafai ona mou ese atu. E oo ane i le faaiuga o le aso, na pau lava le mea sa manao o ia e fai o le totolo i lalo o lana kesi ma lafi.

Talu ai nei lava, na toetoe lava o taimi uma na lagona ai e Savannah le faanoanoa. Sa taumafai ana uo e faafiafia o ia, ae o nisi taimi sa le fia faatasi ai Savannah ma i latou. Sa foliga fiafia i latou i taimi uma. O nisi taimi sa ia manatu ai o le a sili atu lo latou fiafia e aunoa ma ia.

O le a le mea o faaletonu ia te a’u? Sa mafaufau Savannah. Aisea e le mafai ai ona ou fiafia e pei o isi tagata uma?

Sa ia lagonaina le malulu ma le tuuatoatasi e pei o ao puaoa i fafo. Ma o lenei sa na ona manao lava e moe.

Sa faalogo Savannah ua matala le faitotoa o lona potumoe.

“Savannah,” o le tala lea a Tinā, a o nofo atu i le faatausiusiuga o le moega, “o le a le mea ua tupu?”

“E leai se mea,” o le tala lea a Savannah. “Ua na o lo’u lelavā lava.”

“E te mo’i?” O le fesili lea a tina. “Ou te popole mo oe.”

“O lea ou te OK,” o le tala lea a Savannah.

“Ua lelei.” Na tu i luga Tinā. “Ia manatua e mafai ona e talanoa mai ia te a’u e uiga i soo se mea. Ou te alofa ia te oe.”

Sa nofo Savannah i le moega seia oo i le taimi o le meaai o le afiafi. O lena po, sa le mafai ona moe o ia. E le’i mafai ona taofiofi e lona faiai le mafaufau solo i mea uma.

O le aso na sosoo ai sa ia lagonaina pea le vaivai. O se isi aso umi. Sa taunuu Savannah i le fale mai le aoga ma nofo i le laulau o le umukuka. Sa ia mapuea ma tilotilo atu i fafo o le faamalama. Sa toe kiona foi.

“Savannah?”

Sa liliu atu Savannah ma sa faateia i le vaai atu ia Tinamatua o sau i totonu o le potu.

“Talofa, Tinamatua,” o le tala lea a Savannah. “O le a lau mea o fai iinei?”

Sa nofo ane i lalo Tinamatua. “Sa manao lou tina ou te sau,” o lana tala lea. “O loo popole o ia ia te oe.”

“O lo’u lēlavā lava . Ae, o loo ou manuia,” o le tala lea a Savannah.

Sa ataata lemu Tinamatua. “Na ou fai atu ea ia te oe e uiga i le taumafanafana na ma siitia ai ma Tamamatua?”

“Leai, ailoga,” sa faimai ai Savannah.

“Sa ou faanoanoa i taimi uma lava,” o le tala lea a Tinamatua. “Sa ou manao ia ou fiafia, ae ou te le’i popole lava i se mea. Sa ou lagona le tuuatoatasi.”

“Ae sa i ai Tamamatua ma lo’u tina ma oe.” Sa autilo ifo Savannah i lalo i ona seevae. “Aisea sa e lagona ai le tuuatoatasii?”

“Sa le mafai ona ou iloa le mea o loo tupu,” o le tala lea a Tinamatua. “E le’i tupu muamua lena mea. Sa iu lava ina ou alu i le fomai.”.

“O le a le mea ua tupu?”

Sa faauouo mai o ia e Tinamatua. “Sa ou iloaina sa ou maua i le atuatuvale.”

“Oi, sa na o lou lagona lava o le faanoanoa?” Na fesili ai Savannah.

“Leai, o le atuatuvale e sili atu nai lo le na o le lagonaina o le faanoanoa,” o le faamalamalama mai lea a Tinamatua. “O lo’u faanoanoa sa foliga mai e le’i mou ese atu lava. Sa ou tauivi e fai mea uma sa masani ona ou faia. Ma sa faigata ona ou fesootai ma isi tagata, e oo lava i lo’u lava aiga. Sa matuai o’u manaomia le fesoasoani.”

Sa ea a’e Savannah i luga. “O le a le ituaiga fesoasoani?”

“Sa faamatala mai e le fomai le mea na tupu, ma sa ma faia faatasi se fuafuaga e fesoasoani ia te a’u ia ou maua ai se lagona lelei,” o le tala lea a Tinamatua. “Ae o nisi taimi ou te lagona ai pea le faanoanoa. Sa tele se taimi na ou faaaluina e tatalo ai. Ina ua ou tuuatoatasi, sa ou vaai faalemafaufau i le Faaola o nofo i o’u tafatafa. Sa lelei o’u faalogona i le mafaufau ia te Ia.”

Sa tilotilo atu Savannah i le kiona i fafo ma gatete. “Ou te lagona foi le faanoanoa tele. Ou te taumafai ia ou lagona le fiafia, ae o nisi taimi ou te le mafaia, ona ou ita ai lea ia te a’u lava ia ona o lena lagona.”

“Ou te iloa, la’u pele.” Na fusi mai e Tinamatua ia Savannah. “O o’u lagona foi na i nisi taimi. Ae e le o tuua na o oe. Ou te alofa ia te oe, e alofa ou matua ia te oe, ma e alofa le Tama Faalelagi ma Iesu Keriso ia te oe. La’ua te malamalama i lou tiga ma o le a le tuua lava oe.”

Atonu e sa’o Tinamatua, sa mafaufau ai Savannah. E le o tuua na o a’u. O le mamafa o le manava o Savannah sa le’i matua mamafa tele.

“Ou te manatu e tatau ona ou talanoa ia Tina,” o le tala lea a Savannah. “E manao foi o ia e fesoasoani mai ia te a’u.”

“O se manatu lelei lena.” Sa uu e Tinamatua le lima o Savannah.

Sa ataata Savannah ma faalagolago atu i le tauau o Tinamatua. Sa le’i toe lagonaina e ia le malulu ma le tuuatoatasi.

O Ata na tusia e Marina Pessarrodona