Ua Toefuataiina le Perisitua.

E mafai ona e faitauina le tala lenei i le Iosefa Samita—Talafaasolopito 1:66–73 ma le Mataupu Faavae ma Feagaiga 27:12.

O Iosefa Samita o loo talanoa atu ia Oliva Kaotui ma se lio o le mafaufau o loo faaalia ai Keriso o asiasi atu i sa Nifaē

Ina ua uma ona maua e Iosefa Samita papatusi auro, sa amata ona ia faaliliuina. Na tusia e Oliva Kaotui mea na ia fai mai ai. A o la galulue, sa la’ua iloa ai sa finagalo Iesu Keriso ia papatisoina tagata uma.

O loo tatalo Iosefa Samita ma Oliva Kaotui i le togavao

Sa mafaufau Iosefa ma Oliva po o ai na i ai le mana o le Atua e papatiso ai tagata. Sa la’ua o atu i le togavao e tatalo ma ole atu i le Atua.

Agelu ma ona lima i luga o le ulu o Iosefa Samita

A o la’ua tatalo, sa faaali mai se agelu. Sa ia faapea mai o ia o Ioane le Papatiso, o le na papatisoina Iesu Keriso i aso ua leva. Sa Ia tuuina atu ia Iosefa ma Oliva le Perisitua Arona ina ia mafai ona la papatisoina ai isi. O le perisitua o le mana a le Atua. E faaaogaina e faamanuia ai fanau a le Atua.

O Iosefa Samita o loo papatisoina Oliva Kaotui

Sa ta’u atu e Ioane le Papatiso ia Iosefa ma Oliva ina ia papatisoina. Sa la’ua o atu i se vaitafe ma papatiso ai e le tasi le isi. Ina ua la’ua o mai i fafo mai le vai, sa faatumulia i la’ua i le Agaga Paia. Sa la’ua matuai fiafia lava!

Ua tuu atu e agelu e toatolu o latou lima i luga o le ulu o Iosefa Samita

Mulimuli ane, na ō mai ai isi agelu. O Aposetolo e toatolu a Iesu Keriso—Peteru, Iakopo, ma Ioane—na tuuina atu ia Iosefa ma Oliva le Perisitua Mekisateko. O lea la ua mafai e Iosefa ma Oliva ona tuuina atu le meaalofa o le Agaga Paia i isi.