O Anika Lototoa

“Ua e sauni?” O le fesili lea a Tinā.

Sa luelue le ulu o Anika ma fusi lana pea meataalo. Sa ia aumaia i le lotu. Sa faamoemoe o ia o le a fesoasoani lea ia te ia ia maua le lototoa.

Sa i ai se vaega a Anika e fai i le polokalama a le Peraimeri i le asō. Ae sa fou o ia i lenei atunuu. Sa le’i tele se Igilisi e tautala ai o ia. Nai lo lena, o le a ia faia i le faaSipaniolo. Pe o le a malamalama ea tagata uma?

Sa fusi atu o ia e Mama. “Ou te iloa o loo e popole. Ae manatua, o le a mafuta le Agaga Paia ma oe! E le o tuua na o oe.”

O lena mea na maua ai e Anika sina lagona fiafia teisi. Sa ataata o ia i lana pea meataalo. O lona uiga o le a toatolu ai matou, sa ia mafaufau ai. O a’u, o la’u pea meataalo, ma le Agaga Paia!

I le polokalama a le Peraimeri, sa talanoa ai le vasega a Anika e uiga i mea sa latou aoaoina i lena tausaga. Sa latou o taitoatasi i le tulaga. E le’i umi ae oo i le taimi a Anika.

Sa ia fusiina lana pea meataalo. E mafai ona lototoa o ia!

“E suesue e lo’u aiga tusitusiga paia faatasi ma le Sau, Mulimuli Mai ia te A’u i po uma,” o le tala lea a Anika i le faaSipaniolo. Sa manava loloa o ia. “Sa matou aoaoina le auala na faamagalo ai e Iosefa Samita i latou na faatiga ia te ia. E mafai foi ona ou faamagalo atu i isi. I le suafa o Iesu Keriso, amene.”

Sa toe foi Anika i lona nofoa. Sa ataata atu lona faiaoga ia te ia ma lana pea meataalo. “Lelei tele,” sa ia musumusu mai ai. “Sa oulua lototoa uma!”

Sa lagona e Anika le mafanafana i lona loto. Sa lototoa o ia! Ma sa ia iloaina sa faatasi le Agaga Paia ma ia.

Ata na tusia e Katie Rewse