“O Auala e 5 e Taulimaina ai Lagona Tetele,” Uo, Mati 2025, 38–39.
O Auala e5 e Taulimaina ai Lagona Tetele
O le olaga e mafai ona faigata i nisi taimi! O le lagonaina o lagona tetele, e pei o le faanoanoa ma le popole, o se vaega o mea tatou te oo i ai ao ola ai i le lalolagi.
I tusitusiga paia, ua tatou aoao ai e oo lava i le Faaola sa lagona foi le faanoanoa i nisi taimi (tagai i le Ioane 11:32–36). Sa mafatia Iesu Keriso i ituaiga uma o tiga. Ona o lenei mea, ua Ia silafia tonu ai ou lagona. Na te silafia lelei foi le auala e fesoasoani ai ia te oe. (Tagai i le Alema 7:11–12)
O mea nei e lima e fesoasoani pe a e lagona le lotovaivai.
1
Tatalo i le Tama Faalelagi mo se fesoasoani.
Pe a e tatalo mo se fesoasoani, e mafai e le Tama Faalelagi ma Iesu Keriso ona taialaina oe (tagai i le Alema 37:36–37). E alolofa i La’ua ia te oe ma mananao e lagolagoina oe!
2
Ia manatua e alofagia oe.
Na aoao mai Iesu e faapea “ua tele lava le taua o agaga i le silafaga a le Atua” (Mataupu Faavae ma Feagaiga 18:10). O lona uiga e alofagia ma tāua oe i le Tama Faalelagi!
3
Alu i fafo!
Na faia e le Tama Faalelagi ma Iesu Keriso se lalolagi matagofie mo i tatou. O le taalo i fafo e fesoasoani ia te oe e tuputupu a’e ai i le soifua maloloina ma le malosi, ma e mafai foi ona fesoasoani ia te oe e te lagona ai le lelei ma le toamalie.
4
Tusi i lalo po o a ou lagona.
O le tausia o se api talaaga e mafai ona fesoasoani ia te oe e manatua ai lesona e te aoaoina i le olaga. E mafai foi ona fesoasoani ia te oe e malamalama atili ai i ou lagona.
5
Talanoa i se tagata matua faatuatuaina.
Pe a e talanoa i se tasi e uiga i ou lagona, e mafai ona latou fesoasoani e faamanatu atu ia te oe lou faapitoa. E mafai foi ona fesoasoani ia te oe e iloa ai le auala e maua ai le lagolagosua e te manaomia.
O nisi taimi, e tusa lava pe ua uma ona faia nei mea, atonu e te lagonaina pea le faanoanoa. Atonu e manaomia ona e talanoa i se fomai e fesoasoani ia te oe e maua ai se lagona lelei. Ma e mafai foi ona e talosagaina se faamanuiaga faaleperisitua. E tusa lava po o le ā, e lē o tuua lava na o oe! E alolofa le Tama Faalelagi ma Iesu Keriso ia te oe. La te mananao e faamanuia oe ma fesoasoani ia te oe.
O Ata na tusia e Stephanie Mackay