O Le Vavegao le Masi

Sa malomaloā le matagi malulu, ma sa taavilivili solo le kiona i le taavale toso. Sa toso mai e Jane lona palanikeke manifinifi i ona tauau. Sa pēpē ona vae, ae sa savali pea o ia. Sa latou agai atu i le Aai o Sate Leki, Iuta.

Sa aoao Jane ma lona aiga e uiga i Le Ekalesia a Iesu Keriso o le Au Paia o Aso e Gata Ai i Egelani. Ina ua talosagaina e le perofeta tagata o le Ekalesia e o mai i Iuta, sa teuina e lona aiga tupe uma latou te mafaia e fai ai le malaga. Sa latou folau atu i le sami. O lenei sa latou malaga i taavale toso i luga o laufanua valevalenoa. Sa latou savavali mo ni nai masina, ma ua leai ni a latou meaai.

Na tafe ifo loimata i alafau o Jane. “Ua ou fiaai tele,” sa ia fai atu ai i lona tuagane matua o Tomasi. “Ou te manatu e le mafai ona ou toe savali i se isi laa!”

Sa tipi e Tomasi se fasi pa’u ua matala mai le uili o le taavale toso. “Ia, lamu le mea lea,” o lana tala lea. “O le a lelei mea uma.”

“Faafetai lava,” na musumusu mai ai Jane a o lamuina le fasi pa’u fefeu.

E le’i umi ae oo i le taimi e tolauapi ai mo le po. O nisi o alii na o atu e tutuli mo se pāfalo. Sa faamoemoe Jane o le a latou mauaina ni nai manu. Sa matuai leai se mea na i lona manava. A o latou faatalitali, sa faapotopoto faataamilo Jane ma lona aiga i se tamai afi, ua vaivai, fiaai, ma malulu.

“Fai se tatou tatalo,” na fai atu ai Jane.

Sa tootuli faatasi le aiga, ma sa tatalo Tina. “Tama oi le Lagi, e leai ni a matou meaai mo le afiafi. Faamolemole, fesoasoani mai ia i matou.”

Sa nonofo filemu Jane ma ona tuagane ma ona uso mo sina taimi. Ona nofo sa’o ane lava lea o Tina i luga.

“O le a?” Na fesili atu ai Tomasi.

“Lea faatoa ou manatua atu le mea lea.” Sa faanatinati atu Tina i le taavale toso ma tatala le pusa a le aiga. Ona ia tosoina mai lea i fafo o se tamai pusa uamea ma tatala. I totonu sa i ai ni masi malō se lua. O ni meaai totoe mai la latou malaga i le sami i ni masina na muamua atu.

Sa lagona e Jane le fiafia i lona loto. Sa i ai a latou meaai! “E mafai ona tatou vaevaeina i ni vaega laiti e faasoa atu,” o lana tala lea.

Ae ina ua latou taumafai, sa faigata tele ona gagau afa le masi.

“Sei tatou faataitai le mea lea,” o le tala lea a Tina. Sa ia tuuina masi i totonu o le ogaumu Holani ma saasaa atu sina vai itiiti i luga. Ona ia tapuni ma tuu atu le ulo mamafa i luga o malala.

Sa toe tatalo Jane ma lona aiga. Sa mafaufau o ia i le tala ia Iesu Keriso i tusitusiga paia, ina ua Ia fafagaina le lima afe i na o ni nai areto ma i’a. Sa ia iloa e mafai foi ona fesoasoani le Tama Faalelagi ia i latou.

Ina ua mavae sina taimi, sa tatala lemu e Tina le ulo. Sa faatumulia i meaai! Sa tele meaai e fafaga ai lo latou aiga atoa.

Sa fusi mau e Jane lona tina. “O se vavega lava!”

O Ata na tusia e Simini Blocker