Pagpaminaw sa Espiritu Santo

Gibuka ni Chim ang iyang katulugon nga mga mata. Hinapos na gayod sa semana!

“Panahon na nga momata, o kondili maulahi na kita,” mitawag si Mama.

Ganahan unta si Chim nga makatulog pa siya og mas dugay, apan karon mao ang adlaw sa pagpangompra. Kinahanglan niyang tabangan si Mama nga mopalit og pagkaon alang sa semana. Mao nga mibangon siya ug paspas nga mikaon sa iyang pamahaw.

Daghan og gibuhat si Mama alang kang Chim ug sa iyang duha ka igsoon nga lalaki. Bisi kaayo siya nga nagtrabaho, ug siya wala kaayoy panahon nga maanaa sa panimalay. Si Chim ug ang iyang mga igsoon nga lalaki nagtinabangay sa pagbuhat sa kadaghanan sa mga buluhaton sa panimalay. Malipayon si Chim nga motabang.

Sa dihang nabalik si Chim ug si Mama gikan sa merkado, gikinahanglan ni Mama nga mobiya na alang sa trabaho. Samtang wala siya, si Chim ug ang iyang mga igsoon nga lalaki nangandam alang sa Dominggo. Gipagawas ni Chim ang mga sapatos, pantalon, ug polo nga iyang sul-obon sa simbahan ugma. Ang iyang magulang nga lalaki, si Robin, mitabang kaniya sa pagplantsa sa iyang polo. Dayon nagluto sila og panihapon.

Nanglimpyo sa kosina si Chim sa dihang nauli si Mama. Makita siya nga kapoy kaayo.

“Dia ra, Ma.” Gitunolan siya ni Chim og usa ka panaksan sa init nga pagkaon.

Mipahiyom si Mama. “Salamat sa imong tabang karong adlawa. Murag lami ni!”

Pagkasunod buntag, mibangon og sayo si Chim ug nangandam alang sa pagsimba. Mahinamon siya nga makakita sa iyang mga higala sa Primary ug magkat-on mahitungod ni Jesukristo.

“Ma?” hinay siyang nanangpit, nanuktok sa iyang pultahan. “Mokuyog ka ba namo sa simbahan karon?”

“Dili,” miingon si Mama. “Gikinahanglan nakong motrabaho karong hapon.”

“OK.” Mibati nga masulub-on gamay si Chim. Hapit na usa ka tuig sukad miuban si Mama kanila ngadto sa simbahan. “Amping sa pagdrayb ug pag-ayo-ayo,” siya misulti kaniya.

“Andam na nga molakaw?” nangutana ang iyang manghod nga lalaki, si Mattew.

“Oo!” Gisul-ob ni Chim ang iyang mga sapatos ug midagan pagawas sa pultahan uban sa iyang mga igsoon nga lalaki aron makasakay sa bus.

Mibati nga malipayon si Chim sa dihang misulod siya sa bilding sa simbahan. Naningkamot siya nga maghunahuna mahitungod ni Jesukristo atol sa sakramento. Ug sa Primary, naningkamot gayod siya og maayo nga maminaw sa leksiyon ni Sister Ortega.

“Karon magkat-on kita mahitungod sa Espiritu Santo,” miingon si Sister Ortega. “Ang Espiritu Santo magdala kanato og mga mensahe gikan sa Langitnong Amahan. Sama sa usa ka radyo.”

Gitan-aw ni Chim ang hulagway sa usa ka radyo nga gigunitan ni Sister Ortega.

“Ang usa ka radyo molihok pinaagi sa pagdawat og signal ug paghimo niini nga mga tingog [sound waves] nga atong madungog,” siya mipasabot. “Kinahanglan nimong ipahimutang kini sa husto nga channel aron madunggan kini. Aron makadungog sa Espiritu Santo, gikinahanglan usab natong ipahimutang ang atong mga kasingkasing ug mga hunahuna ngadto sa husto nga channel. Unsaon nato sa pagbuhat niana?”

Ang tanan naghunahuna. Dayon miingon si Chim, “Pinaagi sa pagsunod ni Jesukristo ug pagtuman sa mga sugo.”

Mipahiyom si Sister Ortega. “Husto kana.”

Human sa pagsimba, mitabang pag-usab si Chim sa pagluto og panihapon. Maayo ang iyang gibati sa sulod samtang mitabang siya. Nasayod siya nga pinaagi sa pagserbisyo sa iyang pamilya, iyang gipahimutang ang iyang kasingkasing ngadto sa hustong channel aron mabati ang Espiritu Santo.

Sa dihang nauli si Mama, gigakos siya og maayo ni Chim. Dayon nag-ampo sila alang sa pagkaon ug nagsugod sa pagkaon.

“Tag-ana unsay akong nakat-onan sa simbahan karon,” miingon si Chim. Ganahan siya nga sultihan si Mama mahitungod sa Primary.

“Unsa man?” Nangutana si Mama.

“Nakat-onan namo ang mahitungod sa Espiritu Santo,” miingon si Chim. “Sama kini sa usa ka radyo. Kon motuman kita sa mga sugo, mahimo natong ipahimutang ang atong mga kasingkasing ngadto sa husto nga channel aron makapaminaw Kaniya.”

Mitando si Mama. “Nindot kana. Nan unsa man ang usa ka ehemplo sa pagsunod sa mga sugo?”

Mipahiyom si Chim. “Tabangan ang imong mama!” Mikatawa siya. “Gimahal ko ikaw, Ma.”

Mga paghulagway pinaagi ni Uran Duo