Ang Milagro sa Biskwit

Ni Julia A. Anderson

“Amahan sa Langit, kami walay pagkaon alang sa panihapon. Palihog tabangi kami.”

Usa ka tinuod nga istorya gikan sa USA.

Gihulagway nga litrato sa usa ka pioneer nga batang babaye ug usa ka paghulagway sa usa ka tapok sa gahi nga mga biskwit

Ang grabe katugnaw nga hangin nagdahunog, ug niyebe nagtuyok-tuyok palibot sa karomata. Gibira ni Jane ang iyang nipis nga habol palibot sa iyang mga abaga. Ang iyang mga tiil naminhod, apan nagpadayon siya sa paglakaw. Nagpadulong sila ngadto sa Siyudad sa Salt Lake, Utah.

Si Jane ug ang iyang pamilya nakakat-on mahitungod sa Ang Simbahan ni Jesukristo sa mga Santos sa Ulahing mga Adlaw didto sa England. Sa dihang ang propeta mihangyo sa mga miyembro sa Simbahan nga moadto sa Utah, ang iyang pamilya mitigom sa matag gamay nga salapi nga ilang matigom aron makahimo sila sa pagbiyahe. Milawig sila tabok sa kadagatan. Karon nagbiyahe sila pinaagi sa karomata tabok sa kapatagan. Naglakaw sila sulod sa pipila ka bulan, ug hurot na ang ilang pagkaon.

Mitulo ang mga luha sa mga aping ni Jane. “Gutom na kaayo ko,” gisultihan niya ang iyang magulang nga lalaki nga si Thomas. “Murag dili na ko makalakaw og laing lakang!”

Giputol ni Thomas ang usa ka piraso sa lawlaw nga panit sa baka gikan sa ligid sa karomata. “Dia, usapa kini,” miingon siya. “Ma-OK ra kini.”

“Salamat,” mihunghong si Jane samtang giusap niya ang gahi nga panit nga piraso.

Sa wala madugay panahon na nga ipahimutang ang kampo alang sa gabii. Pipila sa mga lalaki mibiya aron sa pagpangayam og buffalo. Nanghinaot si Jane nga makakita sila og pipila. Ang iyang tiyan mibati nga walay sulod gayod. Samtang naghulat sila, si Jane ug ang iyang pamilya nagpundok libot sa usa ka gamay nga kalayo, gikapoy, gigutom, ug gitugnaw.

“Mag-ampo kita,” miingon si Jane.

Magkauban nga nangluhod ang pamilya, ug nag-ampo si Mama. “Amahan sa Langit, kami walay pagkaon alang sa panihapon. Palihog tabangi kami.”

Si Jane ug ang iyang mga igsoon nga lalaki ug mga igsoon nga babaye hilom nga naglingkod sa usa ka higayon. Dayon mas tul-id nga milingkod si Mama.

“Unsa man?” Nangutana si Thomas.

“Nakahinumdom lang ko og usa ka butang.” Nagdali og adto si Mama ngadto sa karomata ug miabli sa kaban sa pamilya. Dayon gipagawas niya ang usa ka gamay nga puthaw nga kahon ug giablihan kini. Sa sulod adunay duha ka gahi kaayo nga mga biskwit. Sobra kini gikan sa ilang paglawig sa lawod pipila na ka bulan kaniadto.

Nagsugod nga mibati og dakong kahinam si Jane. Sila adunay pagkaon gayod! “Mapikas-pikas nato kini ngadto sa mas gagmay nga mga piraso aron ipakigbahin,” miingon siya.

Apan sa dihang ilang gisulayan, ang mga biskwit gahi gani kaayo nga tungaon.

“Sulayan nato kini,” miingon si Mama. Gibutang niya ang mga biskwit sa Dutch nga kaldero ug gibuboan kini og gamay nga tubig. Dayon gibutang niya ang tabon ug gibutang ang bug-at nga kaldero ibabaw sa mga baga.

Pioneer nga pamilya nga nagpundok libot sa usa ka kaldero ibabaw sa kalayo

Si Jane ug ang iyang pamilya nag-ampo pag-usab. Naghunahuna siya sa istorya ni Jesukristo diha sa mga kasulatan, sa dihang Iyang gipakaon ang lima ka libo uban lamang sa pipila ka mga tinapay ug mga isda. Nasayod siya nga ang Langitnong Amahan makatabang usab kanila.

Taudtaod, hinay nga giablihan ni Mama ang kaldero. Napuno gayod kini og pagkaon! Adunay daghan nga ikapakaon sa ilang tibuok pamilya.

Gigakos og maayo ni Jane ang iyang inahan. “Usa kini ka milagro!”