Maisogon nga Anika

“Andam ka na ba?” Si Mami nangutana.

Mitando si Anika ug gigakos ang iyang teddy bear. Dad-on niya kini ngadto sa simbahan. Naglaom siya nga motabang kini kaniya nga mobati nga mas maisogon.

Si Anika adunay bahin nga isulti sa programa sa Primary karon. Apan bag-o lang siya dinhi niini nga nasod. Dili kaayo siya makasulti og Iningles. Isulti hinuon niya kini sa Kinatsila. Makasabot ba kaha ang tanan?

Si Mami migakos niya. “Kahibalo ko nga gikulbaan ka. Apan hinumdomi, ang Espiritu Santo magauban kanimo! Wala ka mag-inusara.”

Kana nakapaarang-arang og gamay sa gibati ni Anika. Mipahiyom siya sa iyang teddy bear. Nan tulo na kami, naghunahuna siya. Ako, akong teddy bear, ug ang Espiritu Santo!

Atol sa programa sa Primary, ang klase ni Anika naghisgot mahitungod sa unsay ilang nakat-onan nianang tuiga. Tagsa-tagsa silang miadto sa pulpito. Wala madugay turno na ni Anika.

Gigakos niya ang iyang teddy bear. Mamahimo siyang magmaisogon!

“Ang akong pamilya nagtuon sa mga kasulatan uban sa Dali, Sunod Kanako matag gabii,” miingon si Anika sa Kinatsila. Miginhawa siya og lawom. “Nakat-onan namo kon sa unsang paagi si Joseph Smith mipasaylo niadtong kinsa nakasakit kaniya. Makapasaylo usab ako sa uban. Sa ngalan ni Jesukristo, amen.”

Mibalik si Anika ngadto sa iyang lingkoranan. Ang iyang magtutudlo mipahiyom kaniya ug sa iyang teddy bear. “Maayo kaayo,” siya mihunghong. “Kamong duha maisogon kaayo!”

Mibati si Anika og kainit sa iyang kasingkasing. Nagmagmaisogon siya! Ug nasayod siya nga ang Espiritu Santo nag-uban kaniya.

Mga paghulagway pinaagi ni Katie Rewse