Dali, Sunod Kanako nga mga Kalihokan

“Ang bili sa mga kalag mahinungdanon sa panan-aw sa Dios” (Doktrina ug mga Pakigsaad 18:10). Kana nagpasabot nga ang tanan importante ngadto sa Langitnong Amahan, lakip kanimo! Pagdrowing og hulagway sa imong kaugalingon. Sulayi ang pagdayan-dayan niini gamit ang lainlaing mga suplay sa art! Sa kinaibabwan, isulat “Ang Dios Nahigugma Kanako.”

Si Jesukristo naghangyo kanato nga maminaw Kaniya (tan-awa sa Doktrina ug mga Pakigsaad 19:23). Ang maayo nga mga tigpaminaw makahinumdom sa unsay ilang nadunggan. Manglingkod nga mag-alirong. Usa ka tawo mohunghong og usa ka pulong sa ebanghelyo. Ang sunod nga tawo mosubli niini ug modugang og bag-o nga pulong. Libota ang sirkulo hangtod ang tanan nakadugang og pulong nga hinumdoman!

Si Jesukristo mipahiuli sa Iyang Simbahan karon ngadto sa kon unsa kini kaniadto sa dihang Siya anaa sa yuta (tan-awa sa Doktrina ug mga Pakigsaad 20). Sulati ang plastik nga mga baso og mga panalangin nga aduna kita isip kabahin sa Simbahan ni Jesukristo, sama sa pagkapari, bunyag, mga propeta. Dayon ipatong-patong ang inyong mga baso nga mahimong usa ka taas nga tore!

Ganahan ang Langitnong Amahan kon kita manganta gikan sa atong mga kasingkasing (tan-awa sa Doktrina ug mga Pakigsaad 25:12). Pagpili og pipila ka awit sa Primary nga kantahon og dungan. Paghimo og mga aksiyon nga mobagay sa mga pulong sa awit.

Ang propeta nagdawat og pagpadayag gikan sa Langitnong Amahan ug ni Jesukristo alang sa Simbahan (tan-awa sa Doktrina ug mga Pakigsaad 28:7). Pagprinta o pagdrowing og hulagway sa propeta. Sa ibabaw, isulat “Ang propeta nagsulti …” Pagsulat o pagdrowing og mga butang nga gitudlo kanato sa atong propeta.