“5 ka Paagi sa Pagdumala sa Lisod nga mga Emosyon,” Higala, Marso 2025, 38–39.
5 ka Paagi sa Pagdumala sa Lisod nga mga Emosyon
Ang kinabuhi mahimong lisod usahay! Ang pagbati og lisod nga mga emosyon, sama sa kaguol ug kabalaka, kabahin sa atong kasinatian sa pagpuyo dinhi sa yuta.
Diha sa mga kasulatan, atong makat-onan nga bisan ang Manluluwas mibati usab nga magul-anon usahay (tan-awa sa Juan 11:32–36). Si Jesukristo miantos sa tanang matang sa kasakit. Tungod niini, Siya tukma gayod nga nasayod kon unsa ang inyong gibati. Siya usab tukma gayod nga nasayod kon unsaon sa pagtabang kaninyo. (Tan-awa sa Alma 7:11–12.)
Ania ang lima ka butang nga makatabang kon mobati kamo nga masulub-on.
1
Pag-ampo sa Langitnong Amahan alang sa tabang.
Kon mag-ampo kamo alang sa tabang, ang Langitnong Amahan ug si Jesukristo makagiya kaninyo (tan-awa sa Alma 37:36–37). Nahigugma Sila kaninyo ug gusto nga mosuporta kaninyo!
2
Hinumdomi nga kamo gihigugma.
Ang mga kasulatan nagtudlo kanato nga “ang bili sa mga kalag mahinungdanon sa panan-aw sa Dios” (Doktrina ug mga Pakigsaad 18:10). Kana nagpasabot nga kamo gihigugma ug importante sa Langitnong Amahan!
3
Adto sa gawas!
Ang Langitnong Amahan ug si Jesukristo mihimo niining matahom nga kalibotan alang kanato. Ang pagdula sa gawas makatabang kaninyo nga motubo nga himsog ug lig-on, ug kini makatabang usab kaninyo nga mobati nga mas maayo ug mas relaks.
4
Isulat kon unsa ang inyong gibati.
Ang pagtipig og journal makatabang kaninyo nga makahinumdom sa mga leksiyon nga inyong makat-onan sa kinabuhi. Makatabang usab kini kaninyo nga mas makasabot kon unsa ang inyong gibati.
5
Pakig-istorya sa usa ka kasaligan nga hamtong.
Kon kamo makig-istorya ngadto sa usa ka tawo mahitungod sa unsay inyong gibati, makatabang sila sa pagpahinumdom kaninyo kon unsa kamo kaespesyal. Makatabang usab sila kaninyo nga masayod kon unsaon sa pagkuha sa suporta nga inyong gikinahanglan.
Usahay, bisan human sa pagbuhat niining mga butanga, tingali mobati gihapon kamo nga magul-anon. Mahimong kinahanglan kamong makig-istorya sa usa ka doktor nga motabang kaninyo nga mobati nga arang-arang. Ug kanunay kamong makapangayo og panalangin sa pagkapari. Bisan unsa pa man, kamo wala mag-inusara! Ang Langitnong Amahan ug si Jesukristo nahigugma kaninyo. Gusto Sila nga mopanalangin kaninyo ug motabang kaninyo.
Mga paghulagway pinaagi ni Stephanie Mackay