Dako na Kaayo alang sa Primary?

“Welcome sa Primary!” Si Sister Agbor, ang lider sa Primary nilang Gift, mibarog sa atubangan sa lawak. “Karon atong kat-onan ang awit nga ‘Maghigugmaay.’”

Nagsugod ang musika, ug ang mas manghod nga mga bata nag-andam aron mokanta. Apan si Gift nakahibalo na niini nga awit. Gikanta na niya kini sa daghan na kaayo nga higayon! Wala gayod siya ganahi nga mokanta niini karon.

Gikapoy na si Gift sa Primary. Siya mas magulang, mas taas, ug mas dako kay sa uban nga mga bata. Ang iyang mga higala sa simbahan tanan anaa na karon sa Young Women. Siya adunay hapit usa pa ka tuig sa dili pa siya makakuyog nila sa mga klase ug mga kalihokan sa Young Women.

Samtang nanganta ang tanan, si Gift naghilom. Iyang giyamyam ang pipila ka pulong sa awit, apan na-busy siya sa paghunahuna.

Dayon nakaideya siya. Tingali kon makig-istorya siya sa bishop, siya tugtan na sa bishop nga moadto sa Young Women og sayo aron makauban niya ang iyang mga higala.

Nakit-an ni Gift si Bishop Achombi pagkahuman sa simba. “Kumusta, Bishop,” miingon siya. “Wala na gayod nako gibati nga nahisakop pa ko sa Primary. Mas dako ug mas magulang na ko kay sa uban nga mga bata. Mahimo ba nga magsugod na lang ko og adto sa Young Women?”

Mipahiyom si Bishop Achombi. “Nakahibalo ko nga ang pagbalhin ngadto sa Young Women makapahinam,” miingon siya. “Apan makasugod lang ka og adto sa tuig nga ikaw mahimong 12. Gikasubo ko.”

Miduko og tan-aw si Gift ngadto sa iyang mga sapatos. “OK.”

“Ang Primary swerte kaayo nga anaa ka nila,” miingon ang bishop. “Paminaw nako ang mas manghod nga mga bata nakadayeg kaayo nimo. Makahimo ka og kalainan ngadto nila.”

Sa nahabilin sa adlaw, mibati og kaguol si Gift. Ang usa ka tuig taas nga panahon aron mobati og kamingaw diha sa Primary.

Apan si Gift mas naghunahuna mahitungod sa unsay gisulti ni Bishop Achombi. Ang uban nga mga bata midayeg ba gayod niya? Wala gayod niya kini mabantayi kaniadto.

Pagkasunod semana, si Gift miwara-wara sa pagpanamilit sa iyang mga higala samtang sila naglakaw padulong sa kwarto sa Young Women. Nanghupaw siya ug milakaw paingon ngadto sa klasrom sa Primary.

“Gift,” miingon si Sister Agbor, “andam ka ba nga motabang nako sa pagtudlo sa awit alang karong semanaha?”

“Ah, sige,” miingon si Gift. “Unsa nga awit ang atong kat-onan?”

“‘Ako Anak sa Dios,’” miingon si Sister Agbor. “Salamat sa imong tabang! Paminaw nako ang mga bata malingaw nga magkat-on gikan nimo.”

Sa dihang nagsugod na ang higayon sa pagpanganta, si Gift mibarog sa atubangan sa lawak. “Karon kamo tudloan nako sa usa sa akong paborito nga mga awit,” miingon siya. Gitabangan niya ang mga bata nga makat-on sa mga pulong. Dayon gikanta niya ang awit kauban nila. Samtang sila nanganta, mibati si Gift og kainit ug kalipay sa iyang kasingkasing. Nasayod siya nga gibati niya ang Espiritu Santo.

Sa wala madugay, hapit na mahuman ang klase sa Primary! Human sa panapos nga pag-ampo, nagsugod na si Gift og lakaw ngadto sa hawanan. Gusto niya nga pangitaon ang iyang mga higala human sa ilang klase sa Young Women ug mangumusta.

Apan usa sa gagmay nga mga batang babaye mipahunong niya. “Salamat sa imong pagkanta uban kanamo!” Gigakos niya si Gift. “Gusto ko nga maparehas nimo inig dako nako.”

Mipahiyom si Gift. Dili gihapon siya makahulat nga moadto na sa Young Women, ug nanghinaot siya nga paspas ra ang sunod tuig. Apan nakahibalo siya nga naa gihapon siyay makat-onan ug mahimo nga maayo nga mga butang sa Primary.

Ug seguro sakto si Bishop Achombi. Makahimo siya og kalainan.

Mga paghulagway pinaagi ni Simini Blocker