Ang Kasulatan nga Mihatag og Kahayag ni Maja

Si Maja milingkod sa hagdanan sa ilang balay ug nanampiling. Ang adlaw misanag og hayag, init-init nga mga silaw sa tag-as nga kakahoyan. Ang baho sa hangin sama sa presko nga dahon sa pine.

Si mami migawas ug mitupad ni Maja. “Unsay imong gihunahuna?”

“Mopaambit unta ko og paborito nga kasulatan sa Primary,” miingon si Maja. “Apan wala koy paborito. Ug wala ko makahibalo unsa akong pilion.”

Mitando si Mami. “Ang pagpili og paboritong kasulatan lisod.” Mitan-aw siya sa mga kahoy, dayon mibarog. “Duna koy ideya.”

Si mami mibalik og sulod sa balay. Dihang migawas siya og balik, nagbitbit na siya sa iyang mga kasulatan. “Sugdan nato sa usa ka istorya. Unsa ang imong paborito nga istorya sa kasulatan?”

Naghunahuna si Maja bahin niini. “Ganahan ko sa dihang si Jesus mibisita sa mga Nephita.”

Mipakli si Mami sa mga pahina sa Basahon ni Mormon. “Kana nga istorya nagsugod sa 3 Nephi.” Iyang gitudlo ang pahina. “Magpuli-puli ta og basa ug mamili og bersikulo nga atong ganahan.”

Mitando si Maja ug naminaw samtang nagbasa si Mami. Nagbasa siya mahitungod ni Jesukristo nga mitawag sa Iyang mga disipulo. Nagbasa siya mahitungod sa mga tigpasiugda og kalinaw ug pag-ampo.

Dayon turno na ni Maja. Sa dihang nabasa niya ang usa sa mga bersikulo, mihunong siya. Nabati niya nga murag ang adlaw misanag paigo aron mapuno ang iyang kasingkasing.

Mihangad siya kang Mami. “Ganahan ko ana.”

“Ako sab. Unsa ang imong nagustohan niini?” Si Mami nangutana.

Mikibo si Maja samtang mipahiyom. “Bahin kini kang Jesus. Ug nakapalipay lang gyod kini nako.”

Mibalos sa pagpahiyom si Mami. “Maayo kana nga paagi nga makita ang imong paborito nga kasulatan. Ganahan ka bang mopakigbahin niana sa Primary?”

Naghinam-hinam nga mitando si Maja. “Mahimo bang tabangan ko nimo sa pagkat-on niini?”

“Siyempre!” Miingon si Mami.

Si Mami ug si Maja nagpraktis ug usa-usa ka pulong lang sa. Samtang nagtuon sila, ang mga langgam mihuni sa kakahoyan, nga murag sila nagkat-on usab.

Sa tibuok semana, si Maja sige og praktis sa iyang bag-ong paborito nga kasulatan. Sa buntag sa Dominggo, mibati siya og gamay nga kakulba. Mipraktis siya og sulti sa iyang kasulatan samtang naa sa taas nga biyahe padulong sa simbahan.

Adunay pipila lamang ka bata sa Primary uban ni Maja. Apan sa dihang misulod siya sa klasrom, nabati ni Maja ang kakulba sa iyang dughan.

Sa panahon sa iyang turno nga mopakigbahin, mitindog si Maja og miginhawa og lawom. “Tan-awa, Ako mao ang balaod, ug ang kahayag,” miingon siya. “Tan-aw ngari kanako, ug lahutay hangtod sa kataposan, ug ikaw mabuhi; kay ngadto kaniya nga molahutay hangtod sa kataposan Ako mohatag og kinabuhi nga dayon.”

Sa dihang nahuman na si Maja, milingkod siya ug mipahiyom. Nahimo niya kini! Ang kakulba nawala, ug ang kainit, nindot nga pamati mibalik. Nahibalo siya nga ang iyang paborito nga kasulatan mopabati kaniya niana nga pagbati sa panahon nga kinahanglanon niya kini.

Mga paghulagway pinaagi ni Chloe Dominique