Kinahanglan ba Ko nga Mahimong Hingpit?

Hinay nga milakaw si Henry padulong sa Primary room. Iyang mga tiil daw bug-at samtang nagpadulong siya sa lingkoranan.

Iyang magtutudlo, si Brother Rass, mipahiyom niya. “Andam ka na ba nga moistorya bahin sa mga templo?” siya nangutana.

“Oo,” mitubag si Henry.

Nganong nakaingon man ko ato? Naghunahuna si Henry samtang milingkod siya. Siya wala mibati nga andam. Gayod.

Ang mga kaubanan nga Primary ni Henry nagtuon sa kanta nga “Gusto ko nga Makita ang Templo.” Ang iyang klase gihangyo nga mag-istorya kabahin sa pag-adto sa templo.

Apan naguol si Henry. Gusto siya nga moadto sa templo inig ka dako na niya, apan gibati niya nga daghan kaayo siya og nabuhat nga sayop.

Usa-usa, ang mga higala ni Henry mibarog. Malipayon ug naghinam-himan sila samtang nag-istorya kabahin sa pag adto sa templo sa umaabot. Mas naglain ang pamati ni Henry.

Dayon oras na para mokanta. Si Henry mikanta uban sa Primary: “Samtang bata pa mangandam ko; Kini katungdanan ko.”

Unsaon man nako pag-andam nga moadto sa templo kon daghan kaayo ko og nabuhat nga mga sayop? Naghunahuna si Henry. Mas nalup-og siya sa iyang lingkoranan.

Sa dihang nahuman ang kanta, si Brother Ross nagpaduol. “OK ra ka?” iyang gipangutana si Henry.

Mitan-aw si Henry sa iyang mga kamot. Dayon hinay siyang misulti, “Gusto kong moadto sa templo, apan nahadlok ko nga dili ko angayan.” Miginhawa siya og lawom. “Dili ko permi makasinabot sa akong pamilya. Makalimot ko og tuman sa akong mga buluhaton sa balay. Daghan kaayo ang akong nabuhat nga mga sayop. Kinahanglan ba gayod ako nga mahimong hingpit?”

Mabination nga mipahiyom si Brother Rass. “Ang mahimong takos aron makaadto sa templo wala nagpasabot nga ikaw mahimong hingpit. Mahimo kitang takos pinaagi sa pagsalig kang Jesukristo ug kinasingkasing nga maningkamot sa pagtuman sa mga sugo. Kitang tanan makabuhat og sayop, apan makahinulsol kita ug mahimong limpyo na usab.”

Mas tul-id na ang paglingkod ni Henry.

“Nakaseguro ko nga ang Langitnong Amahan nalipay nimo sa imong paningkamot nga mahimong buotan,” miingon si Brother Rass.

Naghunahuna si Henry sa mga maayong butang nga iyang nabuhat niining semanaha. Nagluto siya og panihapon uban ang iyang Mama, nagtabang sa iyang igsoong babaye sa iyang asignatura [homework] sa eskwelahan, ug miingon og kumusta ngadto sa bag-o nga batang lalaki sa eskwelahan.

Ang mga kabug-at sa kabalaka ni Henry hinay-hinay nga nigaan. Nasayod siya nga ang Espiritu Santo nagtabang kaniya nga mobati og kalinaw.

Sa dihang turno na ni Henry nga mopakigbahin, mipahiyom siya og mibarog. “Gusto ko mopadayon sa paghinulsol ug mahimong mas sama ni Jesukristo aron usa ka adlaw makasulod ko sa templo,” siya miingon.

Malipayon si Henry samtang milingkod siya. Puhon, makabuhat siya og sagrado nga mga pakigsaad ngadto sa Dios sa sulod sa templo. Gusto niyang buhaton ang labing maayo aron maandam!

Mga paghulagway pinaagi ni Gail Armstrong