Magpabilin nga Mapasaligon Bisan og Nag-atubang og Kahiubos, Kasakit, o mga Pagsulay: Elaine Thornton

Usahay gusto nato nga ang atong mga lider magpakita og pagkahingpit alang kanato, ug usahay gusto nato ang pagkahingpit sa atong kaugalingon. Ug kana usa ka lisod kaayo nga butang nga pangayoon tungod kay sukwahi kini sa plano sa ebanghelyo. Ug tingali importante kaayo nga hinumdoman nga ang mga gilaoman kinahanglan mao ang paglambo ug pagsabot ug paghigugma sa usag usa.

Pananglitan, kaniadto ako dunay lisod kaayo nga kasinatian uban sa usa ka lider, ug kini adunay sakit gayod kaayo nga epekto sa among pamilya. Ug ako nagpadayon gayod nga mibati niini ug kinahanglan nga motan-aw sa akong kaugalingon ug maghunahuna, “Sakit kaayo ang iyang gibuhat. Apan basin nakapasakit usab ko og mga tawo. Tingali nabuhat nako kana ug nagkinahanglan ko og kaluoy.” Busa kinahanglan kong mobalik lang sa unsay akong nahibaloan. Ug importante kaayo nga mahinumdom sa unsay atong nahibaloan. Kon wala pa kana mahitabo, dili unta ko makabalik sa akong mga pundasyon. Kon wala pa kana mahitabo, dili unta ko modangop sa Ginoo sa usa ka lawom, makahuloganon nga paagi. Mao nga nagpadayon lang ko sa pagtubo niana nga paglambo sa pag-ila sa akong Langitnong Amahan, akong Manluluwas. Ug sa tinuod, nganong kinahanglan man kong makaila Kaniya? Ako gusto gayod nga makaila Kaniya aron nga ako maparehas Niya.

Samtang kamo magpundok sa Relief Society ug samtang kamo magtinambagay, dapiton ko kamo nga aktibong moapil. Pagpakigsuod sa usa ka tawo nga dili parehas nimo og panghunahuna o usa ka tawo nga nanlimbasog sa ilang pagpamatuod. Usa ka tawo nga bag-o lang nadiborsyo. Usa ka tawo nga naghunahuna kon takos ba gayod kining tanan. Unsa kaha kon kita aktibong makigsuod? Tingali kita mahimong mapuslanon ngadto sa Manluluwas kon makat-onan nato nga—kon kita makat-on sa pagbuhat sa unsay Iyang nahibaloan unsaon sa pagbuhat. Ug kita isip mga sister makatanyag sa usag usa niining matang sa maayo nga grasya ug panaghiusa, makaamgo nga kitang tanan adunay usa ka butang nga hilom natong giantos. Ug tingali samtang kita magtinabangay ug himoon kini nga mas luwas nga dapit, kita mahimo pa gani nga mopakigbahin sa atong kaugalingon nga mga kalisod nga tingali dili unta nato buhaton aron ang usa ka sister makahibalo nga kita usab adunay mga panlimbasog. Ug kitang tanan kinahanglan nga matinuoron nga mopaambit ug usbon ang kultura sa pagpakaaron-ingnon nga perpekto ug pagtabang sa usag usa nga molambo. Ganahan ko kon ang usa ka tawo mopakigbahin nako, tungod niana ako makaduol niya ug moingon, “Uy, giunsa man nimo pagbuntog niini? Giunsa nimo kini pag-atubang? Salamat sa pagpakigbahin.” Ug kini mahimong usa ka matahom nga panag-inigsoonay sa kababayen-an kinsa nahigugma ug nakaila sa ilang Langitnong Amahan.