Pagdumala sa Naglumba nga mga Prayoridad: Sharlene Miner

Ang akong labing dako nga mga prayoridad mao ang paghigugma sa Dios ug paghigugma sa uban. Si Presidente Benson nag-ingon nga kon atong unahon ang Dios, ang tanan nga mga butang mapahimutang sa tukma nilang dapit. Ang tinuod nga sitwasyon mao nga kita anaa sa nagkalain-lain nga kahimtang. Ang uban nato nagsuporta sa atong mga pamilya, ang uban nato wala pa maminyo, ang uban nato adunay mga anak, ang uban nato nagpuyo nga nag-inusara, ug ang uban adunay responsibilidad alang sa mga pamilya nga gawas sa ilang mga anak. Ang akong nakat-onan mao nga kon atong unahon ang Dios, nga ang tanan nga mga butang mapahimutang sa tukma niini nga dapit. Si Presidente Oaks miingon, “Ang atong mga prayoridad mas makita kon giunsa nato paggamit ang atong panahon.” Mao nga akong nahibaloan nga sa paghunahuna og maayo kon giunsa nako paggamit ang akong panahon, mas klaro nakong nakita kon ang akong kinabuhi nahisubay ba sa akong mga prayoridad.

Ako usa ka doktor alang sa emerhensiya, ug akong atimanon kadtong moadto sa ospital nga nasakit o mibati og sakit o bag-o lang nga naparalisar o nawagtangan og minahal sa kinabuhi tungod sa grabeng aksidente. Ang akong mga tumong mao ang unahon paghigugma ang Dios ug higugmaon ang uban. Ug mao nga sa mubo kaayo nga panahon, kinahanglan nako nga moestablisar og relasyon sa pagsalig ug kinahanglan nakong tabangan ang ubang tawo nga mobati sa gugma sa Dios. Kon moadto ko sa trabaho, dili ko maghunahuna og, “Unsaon nako pagpauswag ang akong karera samtang naa ko sa trabaho karon?” Ang akong pag-ampo matag adlaw sa dili pa ko moadto sa trabaho mao ang, “Unsaon nako pagtabang ang mga pasyente nga akong makita nga mabati ang gugma ni Jesukristo?” Importante usab kaayo nga kon ang mga tawo mobiya sa departamento sa emerhensiya human sa ilang interaksiyon nako, nga mabati nila ang gugma ni Jesukristo. Dili ko perpekto niini, apan istoryahan mo nako nga matag higayon nga moadto ko sa trabaho, matag higayon nga mobangon ko sa buntag, matag higayon nga ako adunay interaksiyon sa akong mga anak, kana mao ang akong pag-ampo, nga unta ilang mabati ang gugma sa Langitnong Amahan pinaagi nako.

Ako mopamatuod nga ang Langitnong Amahan nahigugma kaninyo. Siya nahigugma sa matag usa sa Iyang mga anak. Ako usab mopamatuod nga samtang kita magtinguha sa pagpakigbahin sa gugma ni Jesukristo ngadto sa uban, ang atong kaugalingong mga kasingkasing mapuno. Kita mapuno sa kahayag ni Jesukristo, ug sila mobati sa Iyang gugma pinaagi kanato.