Kahupayan diha ni Jesukristo

Welcome, minahal nga mga kaigsoonang babaye, ngadto niining selebrasyon sa pagkatukod ug sa buhat sa Relief Society.

Kining maanindot kaayo nga painting ni Michael Malm matahom kaayo nga nagpakita sa kababayen-an ug kalalakin-an, mga bata ug batan-ong katawhan—sa nagkadaiyang kaliwatan, lumadnon [ethnicity], ug panahon—sa pag-anhi sa atong Manluluwas, si Jesukristo. Kini ang buhat sa Relief Society: ang pagpalig-on sa pagkadisipulo diha ni Jesukristo ug sa pag-andam sa pagbalik ngadto sa presensiya sa atong langitnong mga ginikanan.

Kamo mao ang among igsoong mga babaye. Ug kami inyo usab.

Sa pagsugod niining debosyonal, kamo gipaila-ila ngadto sa Relief Society General Advisory Council. Sila gitawag ug gi-set apart sa pagpahimatngon ug pagtambag uban kanamo diha sa pagpangulo sa mga igsoong babaye sa Relief Society. Sama ninyo, sila mga kababayen-an sa talagsaong pagtuo—ilabina kon sila mag-atubang og mga kalisdanan ug mga hagit niining mortal nga kinabuhi. Kining tuiga, kamo makaangkon sa oportunidad nga mahimong madasig pinaagi nila diha sa gipagawas nga mga bidyo sa panaghisgotan uban niini nga sibya.

Sa tibuok kalibotan, kapin sa walo ka milyon nga kababayen-an ang nahisakop ngadto sa Relief Society. Pinaagi sa paghatag ug pagdawat og kahupay, sa temporal ug espirituwal, kita mas mapaduol ngadto ni Jesukristo ug mas mahisama Kaniya.

Kami nag-ampo nga ang Espiritu maanaa uban kaninyo samtang kamo maminaw sa among mga mensahe. Giandam namo kini nga naghunahuna kaninyo. Ug unya kita mahatagan og higayon nga makadungog gikan ni Elder Quentin L. Cook, usa ka sakop sa Korum sa Napulog Duha ka mga Apostoles. Kami nagmahal kaninyo, minahal nga kababayen-an diha sa ebanghelyo ni Jesukristo. Kamo mao ang among igsoong mga babaye.