Ang Gugma ug Kahayag sa Dios Makanunayon, Walay Pagkausab, ug Dili Matarog

Minahal kong mga sister, bisag asa kamo nagpuyo sa kalibotan, palihog hibaloi nga kami nahigugma kaninyo ug ang inyong Amahan sa Langit ug ang inyong Manluluwas nahigugma kaninyo. Nasayod ako nga usahay lisod nga mabati ang Ilang gugma. Naay mga panahon nga nasinati ko kana mismo. Apan mopamatuod ako kaninyo nga ang Ilang gugma alang kaninyo dili mausab. Anaa kini kanunay bisan sa mga ngitngit nga panahon sa inyong kinabuhi nga lisod kini nga mabati.

Kadaghanan nato ganahan sa matahom masanag nga mga adlaw, dili ba! Ang tanan nga mga kolor sa kinaiyahan mas nindot kon ang adlaw nagsidlak. Sa tingbugnaw nga panahon, gusto nato nga mobati sa adlaw diha sa atong mga nawong. Kini mopuno kanato sa kainit ug kahayag. Apan, dili malikayan, moabot ang madag-omon, ulanon, ug ngitngit nga mga panahon nga dili nato makita ang adlaw o bation ang kainit niini ug ang tanang maanindot nawad-an og bili ug katahom. Nianang madag-omon o unoson nga mga panahon o atol sa kangitngit sa kagabhion, nagduhaduha ba kita nga aduna ba gayoy adlaw? Nahadlok ba kita nga ang adlaw dili na gayod mohayag pag-usab? Siyempre dili! Nasayod kita nga sa higayon ang unos o ang kagabhion motapos, nga inig iway sa mga panganod, makita nato pag-usab ang nindot nga silaw sa adlaw ug bation ang kainit niini. Ang adlaw anaa diha kanunay, walay pagkausab ug dili matarog. Makanunayon kini.

Kini usa ka bililhon nga pagkasusama sa kahayag ug gugma sa atong Manluluwas alang kanato. Ang Iyang gugma naghatag nato og kaanindot ug kahulogan sa tanan diha sa atong mga kinabuhi. Ang Iyang gugma naghatag og kainit sa atong mga kalag ug paglaom alang sa umaabot. Apan sama ra nga adunay madag-omon, unoson, ug mangitngit nga mga panahon diin dili nato makita ang adlaw, sa tibuok natong mortal nga panaw, usab adunay mga madag-omon, unoson, ug mangitngit nga mga panahon dihang mahimong lisod nga mabati ang gugma sa Manluluwas o sa pagkakita sa Iyang kahayag. Mahimong adunay mga higayon nga bation nato nga ang atong Amahan sa Langit ug ang atong Manluluwas wala sa atong mga kinabuhi, ug mobati kita og tumang kahadlok nga Sila mibiya kanato, nga Sila wala nahigugma kanato, ug nga kita nag-inusara lang. Bisan si Joseph Smith ug ang Manluluwas Mismo nakasinati sa pagbati nga gibiyaan sa Dios.

Apan, akong mga sister, ako mopamatuod kaninyo nga walay makapahimulag kanato gikan sa gugma sa atong Langitnong Amahan ug ni Jesukristo! Ang Ilang kahayag ug Ilang gugma alang kanato makanunayon, walay pagkausab, ug dili matarog sama sa kahayag ug kainit sa adlaw. Dili kita angay nga mahadlok nga Sila mobiya kanato, tungod kay Sila dili mohimo niana gayod. Wala sa Ilang kinaiya ang paghimo niana.

Akong nahinumdoman ang pagbati nga nag-inusara gayod dihang mibalhin kami sa Mexico human mi gikasal sa akong bana. Sa unang higayon sa akong kinabuhi, nagpuyo ko layo sa akong panimalay ug gigikanan nga pamilya. Dili pa ko kaayo makasulti o gani makasabot sa pinulongan, mabdos ko sa among unang anak, ug ang akong bana kasagaran wala kay tua sa trabaho ug eskwelahan. Nakahinumdom ko nga mibati og grabeng kamingaw, nasalaag, ug kahadlok. Nagproblema ko sa akong pagbati kon ang akong Amahan sa Langit nakaila ba nako. Wala nako mabati ang kainit ug kahayag sa gugma sa akong Manluluwas. Misugod ko sa pagbati og kaguol, nawad-an og kadasig, ug kawalay paglaom.

Apan ang pipila nako ka sister sa Relief Society miabot aron sa pagluwas nako. Ila akong gigakos ug gitabangan ko nga mobati nga wala ako mag-inusara. Sila mihatag nako og pagdasig ug suporta pinaagi sa ilang mga pahiyom, mabination nga pagtimbaya, ug ligdong nga gugma, bisan ako wala makasabot sa ilang mga pulong ug sila wala makasabot nako. Apan tungod kay akong nabati ang ilang gugma ug pagdawat nako, mipapahawa kini sa mga panganod sa kangitngit nga akong gibati, ug misugod ko sa pagbati og usab sa gugma ug suporta sa akong Amahan sa Langit.

Sisters, kita makahimo niana alang sa usag-usa. Kitang tanan anak nga mga babaye sa langitnong mga ginikanan, ug kita nagkinahanglan sa usag-usa. Bisag asa pa kita nagpuyo, bisag unsa pa ang atong indibidwal nga mga sirkumstansiya, kita dili gayod unta mobati nga kita nag-inusara o nalain. Kita napalibotan sa atong mga espirituwal nga igsoong mga babaye ug mga lalaki. Kitang tanan mianhi sa yuta niining panahona nga magkauban, ug kita nagkinahanglan pag-ayo sa usag-usa. Ang tentasyon sa pagkompara ug sa paghukom sa usag-usa naggikan sa kaaway. Siya gusto nga mabahin kita tungod kay Siya nasayod sa dako nga kusog nga moabot samtang kita mobati og pagkahiusa, gugma ug suporta sa usag-usa. Kita makatabang sa usag-usa nga mobati sa gugma sa atong Manluluwas samtang kita maningkamot nga magkahiusa isip anak nga mga babaye sa Dios. Magtinabangay kita, motabang sa usag-usa, ug dungannga mopauli sa langit.

Ako nagtuo nga ang atong Amahan sa Langit ug ang atong Manluluwas kanunay mopadala kanato og mga mensahe sa gugma ug suporta, apan daghang higayon wala kita moila sa mga mensahe tungod kay kita posibleng wala mangita niini. Ang pagkakita og langgam nga tamsi nga nagpabilin sa usa ka lugar sa gawas sa akong bintana, ang pagsaksi og nindot nga pagsalop sa adlaw, o ang pagkamatikod lamang sa tanang matahom ug mga talagsaong kinaiyahan sa kanunay motabang nako nga mobati sa Ilang gugma. Kon ang mga butang lisod ug ako mobati nga nawad-an og kadasig, usahay akong maila ang Ilang mga mensahe sa gugma ug suporta tungod sa usa ka piho nga bersikulo sa kasulatan nga nagtandog sa akong kasingkasing samtang ako nagbasa, o tungod sa usa ka makadasig nga pag-istoryahanay uban sa usa ka tawo o usa ka butang nga akong bation samtang maminaw sa mga pulong sa usa ka maanindot nga himno o sa makadasig nga awit.

Ganahan ko sa mga pulong sa usa sa atong bag-o nga mga himno: “Siya Nagbantay sa Langgam” Ang unang bersikulo nagsulti:

Ako mopamatuod ninyo nga ang Iyang mata wala lamang sa langgam apan anaa sa kada usa ug matag usa kaninyo. Ikaw usa ka gihigugma nga anak nga babaye sa Dios, ug ako mopamatuod nga dili gayod ka kalimtan. Ikaw nailhan, ikaw gihigugma, ug ang imong tingog kay mahinungdanon, ilabi na ngadto sa imong Amahan sa Langit ug ngadto sa Iyang Bugtong Anak. Sila hingpit nga nakasabot sa imong mga kasub-anan, sa imong mga luha, sa imong mga kaguol, ug sa imong kasakit. Ang inyong mga pag-ampo kanunay nga dunggon sa inyong mahigugmaong Langitnong Amahan.

Kining mortal nga panaw napuno sa mga hagit ug kalisod, lakip na ang mangawala sa daghang nagkadaiyang mga matang−mawala nga mga higala o mga minahal, pagkawala sa pisikal o kahimsog sa pangisip, sa pinansyal nga pagkawala, ug bisan sa pagkawala sa kapasidad ug sa kompiyansa. Ganahan ko sa gisuIti ni Elder Joseph B. Wirthlin mahitungod sa pagkawala: “Ang Ginoo mobalos sa matag matinud- anon sa matag mawala. Nga kana diin gikuha gikan niadtong kinsa nahigugma sa Ginoo mahimong idugang ngadto kanila sa Iyang kaugalingong pamaagi. Samtang kini dili moabot sa panahon nga kini atong gitinguha, ang matinud-anon mahimong masayod nga ang matag luha karon sa kataposan mahimong ibalik gatosan ka pilo uban sa mga luha sa kalipay ug pasalamat.”

Ug si Propeta Joseph Smith nagsulti, “Ang tanan nga nangawala kaninyo ihatag nganha kaninyo inig ka banhaw, basta magpadayon kamo nga matinud-anon. Pinaagi sa panan-awon sa Makagagahum, nakita nako kini.”

Ako mopamatuod nga tungod sa atong minahal nga Manluluwas ug sa Iyang maulaong sakripisyo, kadto nga mga saad tinuod. Kon magpabilin kamong matinud-anon sa Dios, ang tanang nangawala kaninyo sa ngadto-ngadto mabayran ra kaninyo, ug mohilak kamo sa kalipay ug pasalamat sa inyong Langitnong Amahan alang sa Iyang magantihong mga panalangin.

Kini nga bersikulo diha sa basahon sa Gipadayag kanunay midala nako og kahupay ug mitabang nako nga mabati ang gugma sa Dios, “Pahiran niya ang ilang luha ug wala nay kamatayon o kasubo, paghilak o kasakit kay nahanaw na man ang daang mga butang.” Hinumdomi usab kini nga saad: “Nasayod kita nga diha sa tanang butang nagbuhat ang Dios alang sa kaayohan niadtong nahigugma kaniya.” Unsa ka nindot ug makahupay nga mga pulong! Si Jesukristo mao ang kahayag ug ang kinabuhi sa kalibotan, ug Siya misaad nga samtang kita mosunod Kaniya, dili kita maglakaw sa kangitngit.

Ako mopamatuod kaninyo nga ang inyong Amahan sa Langit ug ang inyong Manluluwas dili gayod kamo kalimtan, bisan pa si kinsa kamo, bisan asa kamo nagpuyo, bisan unsa pa inyong kasamtangan nga mga sirkumstansiya, ug bisan unsa pa ang inyong nangagi. Ang Ilang kahayag ug Ilang gugma alang kaninyo makanunayon, walay pagkausab, ug dili matarog. Ug kon ang mga panganod ug ang mga unos moagi na diha sa inyong kinabuhi, inyong masayran nga Sila sa kanunay naa uban ninyo, bisan atol sa inyong labing ngitngit nga mga adlaw. Sa ngalan ni Jesukristo, amen.