Kitang Tanan Gipanalanginan sa Impluwensya ug Hugot nga Pagtuo sa Kababayen-an

Minahal nga mga sister, nalipay ko nga makaapil niining talagsaong kalihokan sa Relief Society. Nagpasalamat ko sa tanang nahitabo. Ganahan ko sa mga mensahe nga gihatag nila ni Presidente Camille N. Johnson, Sister J. Anette Dennis, ug Sister Kristin M. Yee.

Napanalanginan ko og talagsaong mga babaye sa akong kinabuhi, ug mapasalamaton ko sa kahangtoran alang sa ilang impluwensya ngari nako. Ang akong pasalamat dili nako matukib. Sila nagtinguha sa labing maayo sa matag aspeto sa ilang kinabuhi apan naghatag og gibug-aton sa pagbati ug pagpasalamat sa gugma sa Dios sa ilang kinabuhi.

Ang akong asawa, si Mary, ang ehemplo niini ug naningkamot sa pagpakabuhi subay sa “nahayagan sa adlaw nga habig sa dalan.”

Gibati nako ang dakong responsibilidad sa pagpamulong nganha kaninyo nga talagsaong mga babaye. Anaa kaninyo ang akong gugma ug pagdayeg kon kinsa kamo ug sa inyong pasalig ngadto sa Ginoo ug sa Iyang Simbahan niining lisod nga kalibotan.

Minahal nga mga sister, palihog ayaw ipakaubos ang inyong gahom ug epekto sa inyong makahimo, mahigugmaon, ug sensitibo nga impluwensya ngadto niadtong inyong ikauban. Daghan ang inyong mapanalanginan samtang maningkamot kamo sa pagpuyo og Kristohanong kinabuhi.

Usahay, sa inyong sinsero nga tinguha sa pagsunod ni Jesukristo ug sa pagbuhat og maayo, tingali bation ninyo nga bisan giunsa ninyo pagpaningkamot og maayo o unsay inyong gihimo, dili kini igo. Usahay bisan sa kamatuoran nga ang tanan mibati nga kamo “husto gayod,” kamo mahimong mobati nga dili takos ug dili epektibo. Apan ang labing maayo nga buhat nga inyong gihimo, ang kamabination ug ang gugma nga inyong gipakita mao ang mga panalangin nga dili masukod alang niadtong adunay pribilihiyo nga makauban ninyo, ug igo na kini!

Kita nagpuyo sa samok nga panahon. Ang kalibotan sa pagkatinuod nagkaguliyang. Daghan sa mga hagit ang anaa diha sa espirituwal nga aspeto. Kini mao ang sosyal nga mga isyu nga kita isip mga indibidwal dili gayod makasulbad apan makaapekto kanato. Ang pag-awhag sa mga tawo sa pagpili sa matarong usa ka karaan na nga hagit. Sa kanunay adunay “kaatbang sa tanang butang.” Ang kalainan karon mao nga ang mga nagbiaybiay nga anaa sa “dako ug lapad nga gambalay” nagkakusog, mas mabingkilon, ug dili na kaayo maagwanta kaysa bisan unsang panahon sa akong kinabuhi.

Sa pagkatinuod, kini nga mga matang sa mga hagit anaa na kanunay. Usa ka tuig sa wala pa maorganisar ang Ang Simbahan ni Jesukristo sa mga Santos sa Ulahing mga Adlaw, si Propeta Joseph Smith naghubad sa Basahon ni Mormon. Ang Dios mipadayag ni Joseph ug ni Oliver Cowdery sa unsay anaa karon nga seksiyon 6 sa Doktrina ug mga Pakigsaad. Naglangkob kini sa tambag alang sa lisod nga mga panahon.

Ang Ginoo mihupay nila, “Ayaw kahadlok, gamay nga pundok; pagbuhat og maayo; tugoti nga ang yuta ug impyerno maghiusa batok kaninyo, kay kon kamo gitukod diha sa akong bato, dili sila magmadaogon.” Siya mitambag usab nila, “Tan-aw ngari kanako sa matag hunahuna; ayaw pagduhaduha, ayaw kahadlok. … Pagmatinud-anon, tumana ang akong mga sugo, ug kamo makapanunod sa gingharian sa langit. Amen.”

Sa paghunahuna og balik sa nahaunang mga Santos, kita natandog gayod sa kalisod nga ilang nasinati ug sa ehemplo nga ilang gihatag sa pag-ila sa gugma sa Dios ug sa pagpangalagad sa usag usa.

Ang nag-una o sinugdanang punto sa pagsuta sa atong kinabuhi ug pasalig sa ebanghelyo ni Jesukristo mao ang bunyag.

Kay daghan nato, gawas sa bag-ong mga kinabig ug sa mga bata pa kaayo, ang atong mga bunyag nahitabo daghang katuigan na ang milabay. Ang bantogan nga propeta nga si Alma maalamong namulong nato sa dihang siya miingon, “Ug karon tan-awa, sultihan ko kamo, … kon nakasinati kamo og kausaban sa kasingkasing, ug kon mibati kamo sa pag-awit sa awit sa matubsanon nga gugma, mangutana ko, mibati ba kamo niini karon?”

Si Alma nagpadayon uban sa tinuod nga mensahe nga may kalabotan gayod sa atong panahon. Nangutana siya sa mga Santos, “Kon sila mamatay, andam na ba sila nga mosugat sa Dios?” Dayon gipasabot og maayo ni Alma ang upat ka kinaiya aron mahimong walay sala sa atubangan sa Dios.

Una, kita ba adunay igo nga pagpaubos? Sa ingon niana, agi kini og tubag sa gikinahanglan alang sa bunyag, pagpaubos sa atong mga kaugalingon ug pagbaton og masulub-on nga mga kasingkasing ug mahinulsolon nga mga espiritu.

Ikaduha, giwagtang ba nato ang garbo? Sa paghisgot sa garbo, si Alma mitambag batok sa pagyatak sa Usa nga Balaan ilawom sa atong mga tiil ug pagpanghambog sa garbo, pagpahimutang sa atong mga kasingkasing diha sa kawang nga mga butang sa kalibotan ug diha sa mga katigayonan, nagtuo nga kita mas maayo kaysa uban, molutos niadtong mapaubsanon.

Ikatulo, giwagtang ba nato ang kasina? Alang niadtong adunay daghang panalangin apan wala mobati og kamapasalamaton tungod kay nagtutok ra sila sa unsay anaa sa uban, ang kasina mahimong labing makadaot. Ang kasina sa estilo sa kinabuhi mograbe kon ang kasikat ug kaadunahan mopuli sa pagtuo ug sa pamilya isip ang labing mahinungdanon nga tinguhaon sa kadaghanan sa katilingban.

Ikaupat, kita ba nagbiaybiay o naglutos sa usa ka igsoon? Sa kalibotan karon, makakita kita og daghan niini sa social media.

Aduna pa bay mas mahinungdanon sa mga isyu nga mitumaw sa atong panahon kaysa niini nga mensahe bahin sa garbo, kasina, ug mga pagpanglutos?

Ang dakong panaglalis sa tibuok kalibotan may kalabotan sa temporal, inadlaw-adlaw nga ekonomikanhong mga isyu. Apan wala kaayo maghisgot mahitungod sa pagbalik ngadto sa Kristohanong mga baroganan nga nagtutok sa pagpangandam sa pagsugat sa Dios, ug sa kahimtang sa atong mga espiritu. Kinahanglan nga ang atong kinabuhi motutok ug mohatag og dugang nga pagtagad sa espirituwal nga mga butang.

Kanunay ko nga madasig kon magrebyo ko sa mga panghitabo ngadto na sa pagpahinungod sa Templo sa Nauvoo. Nakadayeg ko ilabi na sa pagtuo sa mga sister. Ang makapatandog nga hiyas nga nagpatigbabaw mao ang pagtuo sa mga sister. Ang ilang pagtuo sa gipahiuli nga ebanghelyo ni Jesukristo ug sa Propeta sa Pagpahiuli, si Joseph Smith, ang labing talagsaon.

Kining mapahinungoron nga mga babaye nagpakita sa ilang pagtuo sa mahangtorong importansya sa pagtuga ug pagselyo diha sa templo pinaagi sa mga sakripisyo nga andam nilang himoon. Ilang gisakripisyo ang ilang panahon ug ang gamayng bahandi nga anaa nila. Sila usab, pinaagi sa pagsangon, mihimo sa unang ordinansa nga gipahigayon sa templo sa Nauvoo. Samtang mitabang sila sa pag-andam sa mga Santos sa pagbiya sa Nauvoo, daghan sa mga sister nagbilin og mga rekord sa pagtabang sa mga ordinansa sa templo sa tibuok adlaw ug dayon nagluto ug nanglaba sa gabii. Hinuon, ilang giklaro nga ang pagtuo ug kahibalo nga gihatag ngadto nila didto sa templo ang nakahimo nila nga magmaya samtang mibalhin ngadto sa wala pa mahibaloi nga lugar ug tabok sa kapatagan.

Ang mga babaye sa kasaysayan adunay mas dakong responsibilidad sa panimalay ug sa mga anak ug sa ingon nagtinguha sa seguridad ug kalig-on. Ang pagtuo sa mga sister sa pagkaandam nga mopahawa sa Nauvoo alang sa wala pa mahibaloi nga umaabot makadasig.

Ang girekord nga mga pagbati ni Sister Bathsheba Smith, samtang nangandam siya sa pagbiya, makapatandog kaayo. Nakasinati siya nga ang mga manggugubot naglaray batok sa mga Santos sa Missouri ug didto siya sa pagkamatay ni Apostol David W. Patten. Samtang nag-atubang sa pagbakwit sa Nauvoo, siya misulat:

“Ang akong kataposan nga gibuhat diha niana nga mahal nga lugar mao ang paglimpyo sa mga kwarto, pagsilhig sa sawog, ug pagpahimutang sa silhig diha sa naandan nga butanganan niini luyo sa pultahan. Dayon uban sa mga pagbati sa akong kasingkasing … , hinay nakong gisirad-an ang pultahan ug miatubang sa wala mahibaloi nga umaabot, … miatubang niini uban ang hugot nga pagtuo sa Dios ug uban ang dakong kaseguroan nga sa kataposan maestablisar ang ebanghelyo diha sa Kasadpan ug sa tinuod, malungtarong mga baroganan niini, kaysa akong gibati niadtong lisod nga mga talan-awon sa Missouri.”

Girekord ni Sister Smith ang kakabos, mga sakit, ug labihan nga kalisod nga giantos sa mga Santos samtang nagpaingon sila sa kasadpan. Niadtong Marso 1847, ang iyang inahan namatay, ug pagkasunod bulan ang iyang ikaduhang anak nga lalaki, si John, natawo. Ang iyang rekord kabahin niana mubo ra, “Siya ang akong kataposan nga anak, ug siya nabuhi lamang sulod sa upat ka oras.”

Sa kaulahian sa iyang kinabuhi, siya nahimong matron sa Templo sa Salt Lake ug ang ikaupat nga presidente sa Kinatibuk-ang Relief Society.

Kon ang usa ka tawo motino sa labing mahinungdanong mga hiyas sa atong pioneer nga mga sister, kini mao ang ilang dili matarog nga pagtuo diha ni Jesukristo.

Ako naghunahuna nga ang mga babaye sa Simbahan karon sama ra kalig-on ug kamatinud-anon. Kon tan-awon pinaagi sa klarong panglantaw, ang pagtuo usa ka pagpahayag sa gugma ug pagpasalamat alang sa Manluluwas. Tungod sa Iyang maulaong sakripisyo, walay kasagmuyo nga dili masulbad ug sa tinuod lang walay kalapasan nga dili mahimong ayohon. Kon atong itutok ang atong pagtuo diha ni Jesukristo ug magpabilin sa dalan sa pakigsaad atong makab-ot ang atong mahangtorong mga tumong.

Ang mga kahimtang sa kalibotan karon mas nagkinahanglan og lig-on nga pagkakabig sa indibidwal ug makapalig-on nga pagtuo ngadto sa Langitnong Amahan ug ni Jesukristo ug sa Iyang Pag-ula. Ang doktrina ug mga kasulatan sa Simbahan naghatag og dinasig nga mapa sa dalan aron matabangan kamo sa paghimo og matarong nga mga pagpili. Ang propeta sa Ginoo, si Presidente Dallin H. Oaks, naghatag og piho nga giya alang sa atong panahon. Ang Ginoo miandam kanato, pagtulun-an human sa usa ka pagtulun-an, alang sa peligro nga mga panahon nga atong giatubang karon.

Bisan unsa pa ang atong mga pagsulay, uban sa abundang espirituwal nga giya nga anaa nato karon, kita mahimong dili mapasalamaton kon kita dili malipay sa atong mga panalangin.

Salamat sa kon kinsa kamo ug unsay inyong gihimo. Ako mosaksi nganha kaninyo nga si Jesukristo mao ang Manluluwas ug Manunubos sa kalibotan. Siya buhi ug naghatag sa gugma ug giya nga atong gikinahanglan aron makabalik ngadto Kaniya. Ako mopamatuod gayod niini sa ngalan ni Jesukristo, amen.