Pagkaplag og Kalig-on ug Kahupayan diha ni Jesukristo: Dana Earl

Sa milabayng mga tuig, misugod ko sa pagsulat og istorya sa akong kinabuhi, kon kanus-a ko mibati sa Espiritu o mibati sa impluwensya sa Manluluwas sa akong kinabuhi o mibati sa Iyang kahupayan sa panahon nga magkinahanglan ko nga mobati Kaniya. Ug misugod ko sa pagsulat niini nga mga istorya tungod kay gusto nakong ihatag kini sa akong mga anak. Apan ang nahitabo atol sa proseso sa pagbuhat niini mao nga nakita nako ang impluwensya sa Dios diha sa akong kinabuhi. Nagsugod ko sa pagkakita pinaagi sa pagsulat niini nga mga kasinatian nga ang Dios anaa gayod alang nako, nga nakita nako ang Iyang kamot, nga duna ko niining talagsaon nga mga kasinatian, ug duna koy ebidensya nga Siya miatiman kanako ug nasayod ko nga Siya anaa gayod. Ug akong nahunahunaan nga mora kini og gagmayng mga gasa nga halos akong mahulagway nga gibutang sa akong bulsa, nga akong madala-dala bisan asa. Ug busa kon duna koy bati nga adlaw o bati nga bulan, pwede nakong kuhaon kana nga kasinatian ug moingon, “Nasayod ko. Tungod kay kadto nga kasinatian tinuod nakong naagian, ug wala ko magduha-duha tungod kay naangkon ko kana nga kasinatian. Ug anaa kini kanako, ug akoa kini.”

Ug sa akong hunahuna, nasayod ko, kumbinsido ko nga gusto sa Langitnong Amahan nga makasinati kita og mga kasinatian uban Kaniya. Nagtuo ko nga ang hinungdan nganong duna kitay mga kasulatan—aron duna kitay kasinatian uban Kaniya. Ug oo, biswal ko nga pagkatawo, mao nga dala-dala nako ang akong gamayng bulsa sa mga kasinatian. Ug ang matag usa niini, mahimo nakong hinumdoman kon kinahanglanon nako kini. Ug ang pagsulat niini nakatabang nako aron ako kining mahinumdoman. Ug sa panahon nga magkinahanglan ko niini, anaa dayon kini.

Busa ang rason nga gusto nakong makuha kini nga mga istorya ug tipigan kini sa akong kaugalingon isip usa ka pagpamatuod sa akong nasinati ug alang sa akong mga anak ug kaliwatan apan usab sa pagpamatuod sa akong Langitnong Amahan nga nakita nako Siya, nga ako nakakita ug nasayod. Gibati nako nga ang uban niini morag halok sa agtang. Gibati ko kini, ug nasayod ako niini. Ug gusto kong moila niana. Ug mao nga nagpadayon ko sa pagsulat niini aron mailhan nako nga nakita ko kini o nabati ko kini.