Pagkaplag og Kalig-on ug Kahupayan diha ni Jesukristo: Hannah Miller

Nakadawat kog tawag sa akong igsoong babaye nga kinahanglan kong mouli aron makakita pa ko sa akong papa sa dili pa siya mamatay. Ang among pamilya nagpuasa nianang adlawa alang sa milagro, ug pagkahuman gyod sa among pagpuasa, nanamilit mi sa among papa, ug namatay dayon siya. Ug bisan pa niana nga higayon, nasayod ko nga ang milagro mao nga nakabaton siya og kahupayan gikan sa iyang mortal nga sakit ug sa iyang mga hagit. Ug naghunahuna ko sa kasakit nga nasinati sa among pamilya. Apan ang Ginoo dali kaayong mihatag kanamo og kahupayan. Kasagaran pinaagi sa minahal nga mga higala ug pamilya nga naghatag og dako kaayo nga kahupayan ug panag-uban atol nianang lisod, lisod nga panahon alang kanamo.

Ug samtang naghunahuna ko niini nga kasinatian, nagtuon ko—nagtuon ko sa kasulatan diha sa Basahon ni Mormon. Sa Mga Pulong ni Mormon, ug bersikulo 17 ug 18, naghisgot kini kabahin ni Hari Benjamin, nga adunay lisod kaayo nga buluhaton sa paghimo og kalinaw diha sa katilingban. Ug ganahan ko sa giingon niini. Kini nag-ingon, “Si hari Benjamin usa ka tawo nga balaan, ug siya ang naghari sa iyang katawhan subay sa pagkamatarong; ug adunay daghang tawo nga balaan diha sa yuta.” Ug dayon kini nag-ingon, “Pinaagi sa tabang niini, si hari Benjamin, pinaagi sa paghago sa tibuok gahom sa iyang lawas ug sa galamhan sa tibuok niyang kalag, ug sa mga propeta usab, sa makausa pa mipasiugda og kalinaw sa yuta.”

Ug naghunahuna ko bahin niining hugpong sa mga pulong nga “uban sa tabang niini” ug kon unsa ka sagad nga makasinati ko niini nga mga hagit sa akong kinabuhi diin dili ko kini mabuhat kon wala ang tabang sa balaan nga mga lalaki ug mga babaye nga anaa aron molingkod tupad nako, magbangutan uban nako, mohupay nako samtang nagbarog kami isip mga saksi sa Dios. Usahay ang atong mga pag-ampo murag wala madungog. Murag mabati nga kini wala matubag, basin gani wala madungog sa Ginoo. Apan gusto ko nga mopakigbahin og pagpamatuod nga kadtong mga pag-ampo gidungog ug tubagon kini sa paagi nga hingpit. Tungod kay ang Ginoo nag-atiman kaninyo, nag-atiman Siya sa inyong mga pag-ampo, nag-atiman Siya sa mga butang nga nakapabug-at sa inyong hunahuna ug kasingkasing, nag-atiman Siya sa unsay nakapabalaka ninyo sa gabii. Ug kadtong mga tubag moabot. Moabot kini.