Gikan sa YA Matag Semana
Akong mga Pakigbisog sa Kinatsila Nagtudlo Kanako Unsaon sa Pagsalig sa Ginoo
Ang Langitnong Amahan makatabang kanato nga mahimong makahimo, masaligon, ug malipayon sa atong pagpanaw sa mortalidad.
Duha ka tuig ang milabay, nakauli ko gikan sa akong misyon. Nagserbisyo ko sa Kinatsila og pinulongan nga wala’y naunang kasinatian sa Kinatsila gawas sa panagsa nga pakigtimbaya. Nahinumdom pa gihapon ko, pipila pa lang ka bulan, nagpahayag ko sa akong kasagmuyo sa akong presidente sa misyon nga naglisod gihapon ko sa pinulongan.
Nganong wala man ko gipanalanginan sa Langitnong Amahan og abilidad sa pagsulti og maayo kaayo aron mas epektibo nakong maserbisyohan ang Iyang mga anak? Segurado nga mao kana ang Iyang gusto.
Ang wala nako maamgohi niadto kay ang akong misyon dili diay ang pagkahimong perpekto nga instrumento sa usa lang ka gabii. Mahitungod kini sa pagkat-on og tulo ka baroganan nga akong gikinahanglan aron makaalagad sa Langitnong Amahan sa tibuok nakong kinabuhi.
Pag-ani sa Atong Gipugas
Ang mga kasulatan naghulagway sa usa ka baroganan nga usahay gitawag og balaod sa ani: “Ang ipugas sa tawo mao usab ang iyang anihon” (Mga Taga-Galacia 6:7).
Ang Dios interesado sa atong proseso sa pagkahimong mas sama Kaniya. Sama sa usa ka liso nga kinahanglan itanom, bisbisan, ug atimanon og maayo sa dili pa kini mamunga, ang pagbarog sa kinaugalingong paningkamot hinay-hinay nga maporma ug mapalambo.
Sa pagtan-aw sa nangagi, akong nakita nga ang pakigbisog sa pagsulti og Kinatsila nagtudlo kanako mahitungod sa adlaw-adlaw nga paghinulsol, pagtakda og tumong, ug paglahutay. Sa paglabay sa panahon, ang akong abilidad sa pagpakigsulti milambo labaw pa sa akong gihunahuna nga posible.
Motutok sa Panginahanglan sa Uban
Usahay maghunahuna kita nga ang pagbarog sa kinaugalingong paningkamot nagpasabot sa pagbuhat og mga butang nga mag-inusara. Ang akong misyon nagtudlo kanako nga ang sukwahi ang tinuod.
Sa akong misyon, ang akong mga relasyon mitubo sa talagsaong mga paagi samtang gitugotan nako ang uban nga motabang kanako. Apan walay relasyon nga mitubo og mas labaw pa kay sa relasyon uban sa akong Amahan sa Langit. Ang pagkat-on sa pagsandig ug pagsalig Kaniya nakapanalangin kanako sa daghang paagi.
Usa ka Dominggo, kinahanglan kong motudlo og leksiyon sa Kinatsila. Nabalaka kaayo ko nga maulawan ko ug nasagmuyo nga ang akong pinulongan dili kaayo maayo sama sa akong gusto. Dayon, sa dihang turno na sa akong kompanyon sa pagsulti, akong gibati ang Espiritu nga nagpahinumdom kanako: “Logan, kini nga leksiyon dili mahitungod kanimo; kini mahitungod sa paghigugma ug pagtudlo sa uban. Kalimti ang imong kaugalingon ug pagtrabaho na.”
Sa dihang gipokus nako ang akong atensyon sa gawas, ang mga pulong nagsugod sa pag-agos. Ang Espiritu anaa, dili tungod kay kalit lang ko nga nahimong perpekto nga magtutudlo apan tungod kay gibalhin nako ang akong pagtutok gikan sa akong kaugalingon ngadto sa mga tawo nga akong gihigugma ug giserbisyohan.
Salig ngadto sa Hardinero
Usahay mangutana ko sa akong kaugalingon, “Apan kon gusto sa Dios nga gamiton nato ang atong kabubut-on pinaagi sa paghimo og mga tumong ug paghimo og mga plano, nganong usahay daw maguba man ang akong mga plano ug mga tumong?”
Sa mga higayon nga sama niini, ganahan kong mohinumdom sa istorya nga gisaysay sa una ni Presidente Hugh B. Brown (1883–1975) bahin sa pagpul-ong sa sampinit nga currant.
Iyang gihanduraw ang sampinit nga nag-ingon, “‘Nindot kaayo ang akong pagtubo …, ug karon imo akong giputol.’”
Pamilyar ba kini?
Ang yanong tubag ni Presidente Brown sa sampinit mao kini: “‘Ako mao ang hardinero dinhi, ug ako nahibalo unsay akong gusto nga mahitabo nimo. … Sa umaabot nga panahon, kon mapuno ka na sa prutas, mohunahuna ka og balik ug moingon, “Salamat, Ginoong Hardinero, sa pagputol nako, sa paghigugma nako igo nga masakitan ko.”’”
Nakaagi na kog mga higayon nga ingon niana—nga ang mga tumong ug mga plano nga akong gibati nga maayo ug matarong kalit nga nabungkag. Niadtong mga higayona, nakakat-on ko sa pagsalig nga ang Dios mao ang hardinero sa akong kinabuhi. Makita niya ang akong potensyal bisan kon dili nako mahimo. Ang iyang "pagpul-ong" kanunay nga usa ka buhat sa gugma.
Nakahatag kini kanako og kahupayan nga mahibalo nga ang akong mahigugmaong Amahan sa Langit naggiya kanako padulong sa usa ka butang nga mas dako pa kay sa akong mahunahuna karon.
Ang Pagbarog sa Kinaugalingong Paningkamot Nagdala og Pag-uswag
Si Lehi mitudlo nga “ang mga tawo anaa, aron sila makabaton og kamaya” (2 Nephi 2:25). Ang pagbarog sa kinaugalingong paningkamot nagkinahanglan og hugot nga pagtuo, trabaho, ug pailob, apan bililhon gayod kini.
Kon motakda kita og mga tumong, mohimo og mga plano, molihok “sa [atong] gawasnon nga kabubut-on” (Doktrina ug mga Pakigsaad 58:27), ug mosalig sa Dios igo nga tugotan Siya nga usbon kadtong mga plano kon gikinahanglan, motubo kita ngadto sa mga tawo nga Iyang gitinguha nga kita mamahimo.
Mapasalamaton kaayo ko sa mga leksiyon nga akong nakat-onan atol sa akong misyon, ilabi na sa pagkat-on og bag-ong pinulongan. Samtang aktibo pa gihapon ko nga naghulat sa Ginoo sa ubang aspeto sa akong kinabuhi, nahibalo ko nga makasalig ako Kaniya.
Bisan asa ka pa sa imong pagpanaw padulong sa pagbarog sa kinaugalingong paningkamot, hinumdomi: Ang Ginoo wala magdahom nga imong buhaton ang tanan nga mag-inusara. Dapita Siya ngadto sa proseso. Pagkat-on sa mga tawo nga Iyang gibutang sa imong palibot. Pagmapailobon sa imong kaugalingon.
Inig abot sa panahon, imong makita nga samtang mosalig ka Kaniya, ang matag pakigbisog, matag paglangan, ug matag wala damha nga pagbag-o nakatabang kanimo nga mahimong mas takos, maloloy-on, ug puno sa kalipay.