Gikan sa YA Matag Semana
3 ka Kamatuoran sa Ebanghelyo nga Naghatag Kanako og Paglaom Kon Bation nga ang Kalibotan Walay Paglaom
Ang mga kamatuoran sa ebanghelyo kanunay nga makahatag kanato og paglaom bisan pa sa kawalay kasegurohan.
Sa dihang una nakong nakita sa online ang termino nga "Mga Mormon" sa nag-edad ako og 18, hapit tanan nakong nabasa negatibo. Apan adunay usa ka butang bahin niini nga relihiyon nga mitawag sa akong atensiyon bisan pa man. Niadtong panahona, layo ko sa panimalay ug nabalaka bahin sa akong kaugmaon.
Nagdako ko nga Kristiyano, apan ang akong simbahan walay giporma nga doktrina, ug gibati nako nga adunay kulang. Mao nga nakahukom ko nga magtuon og lain-laing relihiyon, ug gibati nako ang impresyon nga magkat-on pa og dugang mahitungod niini nga pagtuo.
Wala madugay akong nadiskobrehan ang “Duol kang Kristo” nga pahina ug nakakat-on og dugang mahitungod sa Ang Simbahan ni Jesukristo sa mga Santos sa Ulahing mga Adlaw. Nakaingon ko nga lahi kini sa akong natun-an kaniadto. Dihang nakigkita ko sa mga misyonaryo, ang doktrina nga ilang gitudlo kanako daw husto.
Ang mga kamatuoran sa ebanghelyo nagtudlo kanako kon unsaon, isip mga disipulo ni Jesukristo, nga kita kanunay nga makabaton og paglaom. Aniay tulo lamang niadto nga mga kamatuoran.
1. Ang Pagpakigdait Makausab sa Kalibotan
Sa dihang nahibaloan sa akong mga ginikanan nga nakigkita ko sa mga misyonaryo, gidid-an nila ang mga misyonaryo sa pag-adto sa among balay. Dili sila gusto nga magpabunyag ko, ug sa dihang ilang nahibaloan nga naa koy kopya sa Basahon ni Mormon, dihay panaglalis, ug giguba ang akong kopya. Naguol kaayo ko.
Apan nahunahuna nako kon unsa ang reaksyon sa Manluluwas, ug gipili nako nga magpakahilom ug magmalinawon.
Gusto nakong sundon ang tambag ni Presidente Russell M. Nelson (1924–2025) “sa pagpili nga mahimong tigpasiugda og kalinaw, karon ug sa kanunay.”
Nahibalo ko nga ang Manluluwas mitabang nako sa pagtubag sa akong pamilya uban sa kaluoy imbis sa kasuko.
Sa dihang nabunyagan ko, sa akong kasorpresa, nangayo og pasaylo ang akong mga ginikanan. Natandog sila kon giunsa nako pagtubag sa dihang ilang giguba ang akong Basahon ni Mormon, ug among giayo ang among relasyon.
Kini nagpakita kanako kon sa unsang paagi ang gugma nga putli makapausab sa mga tawo. Kon ang usa ka tawo molihok nga maawayon apan nakadawat og gugma isip balos, kana nga gugma makapausab kanila.
2. Ang Ginoo Nahibalo Kanato
Bisan og nakaplagan ko na ang kamatuoran nga akong gipangita, ang akong kaugmaon dili pa gihapon segurado. Mibati ko nga nag-inusara.
Human nagtambong sa institute usa ka adlaw, nakahukom ko nga mag-ampo alang sa tabang nga makakita og maayong mga higala nga modala nako nga mas maduol kang Kristo. Paglabay sa mga bulan, akong naamgohan nga ako gilibotan og mga tawo nga nagtabang kanako sa espirituhanong paagi. Dili lang sila ordinaryo nga mga higala apan mga tawo nga mihigugma ug misuporta kanako.
Nianang panahona, giawhag ko nga moserbisyo og misyon, apan nagduha-duha ko tungod sa daghang rason. Usa ka gabii diha koy damgo nga nagserbisyo ko og misyon sa Dominican Republic. Niining klaro kaayo nga damgo, nagserbisyo ko sa uban ug mibati og dakong gugma alang kanila.
Sa dihang nimata ko, naghandom ko sa mga tawo nga wala pa nako mailhi ug sa lugar nga wala pa nako naadtoan. Gibati nako nga kinahanglan nakong pangitaon ang mga tawo nga nangita og paglaom ug giya. Mao nga gisumite nako akong mga papeles.
Sa dihang naabot ang akong call, nakatawa ko sa hingpit nga kakurat pagbasa nako niini. Gitawag ko nga moserbisyo sa Dominican Republic—ang lugar nga akong gidamgo!
Sa makausa pa, nahibaloan nako nga ang Ginoo naggiya kanako. Ang pagserbisyo og misyon mahimong usa ka dakong sakripisyo, apan misalig ko nga ang Dios mohatag og paagi. Makahadlok nga dili kanunay makakita og klaro nga dalan padulong sa unahan, apan ang pagkasayod nga Siya nahibalo kanako naghatag kanako sa paglaom nga kinahanglan akong magpadayon.
3. Kita Kanunay Makabaton og Paglaom diha kang Kristo
Usa sa mga kasulatan nga akong ganahan mao ang gikan ni Apostol Pablo:
“Kay giluwas kita tungod niining maong paglaom. Apan kon makita nato ang atong gilaoman, dili kana nato matawag nga paglaom. Kay lauman pa ba diay ang nakita na?
“Apan kon molaom kita sa wala nato makita, magpaabot kita nga mapailubon …
“Nasayod kita nga diha sa tanang butang nagbuhat ang Dios alang sa kaayohan niadtong nahigugma kaniya.” (Mga Taga-Roma 8:24–25, 28).
Ang paglaom usa ka buhat sa hugot nga pagtuo. Bisan kon dili nato makita ang diha-diha nga mga kausaban o mahibalo unsay mahimong mahitabo, kon kita adunay paglaom sa mga saad sa Dios, Siya kanunay nga anaa ra, naggiya kanato ngadto sa matahom nga mga panalangin.
Nagkat-on pa ko, apan nahibalo ko nga si Jesukristo naghatag kanako og kusog sa pagsunod Kaniya. Gitabangan Niya ako nga higugmaon ang uban bisan kon kini lisod. Gitudloan Niya ako nga magmapailobon ug mosalig sa Iyang tayming. Labaw sa tanan, gihatagan Niya ako og paglaom—dili lang alang sa akong kinabuhi karon apan alang usab sa akong kaugmaon.
Kon ang kalibotan bation nga walay paglaom, nagtuo ko nga Siya makahatag usab kanimo sa samang paglaom.