Gi-feature nga Debosyonal
Dawata nga Malipayon ang Wala Damha nga Mesiyas
Ang malumong si Kristo mosulod sa inyong kinabuhi sa matag usa, kon modawat kamo Kaniya.
Hunahunaa ang makasaysayanong Dominggo sa Lukay sa dihang si Jesukristo, ang Hari sa mga hari, misulod nga madaugon apan mapaubsanon ngadto sa balaang siyudad sa Jerusalem.
Ang mga kadalanan napuno sa mga tawo nga nagpundok sa Jerusalem alang sa pista sa Pagpalabay. Kusog nga mikaylap ang balita nga moabot si Jesus nga taga-Nazaret, ug kini nakamugna og kahinam.
Makahunahuna ka ba unsa ang gibati sa mga disipulo sa Manluluwas? Mao kini ang higayon nga ilang gipaabot! Sa kataposan, giila na sa mga tawo si Jesus nga mao ang gisaad nga Mesiyas. Sa kataposan natapos na ang paghulat! Ang mga anak sa Israel makalingkawas tungod kay miabot na ang ilang Hari!
Ang mga tawo napuno sa kahinam og pinaabot—apan nagpaabot ba sila sa husto nga mga butang?
Sayop nga mga Pagdahom
Hinuon, pagkadugayan ang mga singgit sa pagdayeg ug kalipay mihunong, sama sa kanunay nga mahitabo sa kinabuhi. Nagkatibulaag ang pundok sa katawhan. Ang mga tawo mibalik sa ilang naandan nga mga kalihokan.
Sa maong panahon, si Jesus mihimo og hilom nga Kataposang Panihapon uban sa Iyang Apostoles. Siya mitudlo kanila, miawhag kanila, ug miampo alang kanila. Mihatag Siya kanila sa ordinansa sa sakramento, usa ka butang nga Siya mahinumdoman.
Dayon milakaw Siya paingon sa tanaman nga gitawag og Getsemani, ug didto—nag-inusara—Iyang gidala sa Iyang Kaugalingon ang mga sala sa kalibotan. Gitumban Niya “nagbinugtong sa pagpuga sa mga nasod sama sa ubas,” ug walay usa ka tawo nga uban Kaniya (Isaias 63:3).
Sa kataposan sa sunod nga adlaw, si Jesus gilansang sa krus taliwala sa duha ka komon nga mga kawatan, nag-antos sa mabangis ug makauulaw nga kamatayon. Imbis nga pagsimba, Siya karon nakadawat og pagbiaybiay. “Kon tinuod siya ang Hari sa Israel,” miingon ang mga tawo, “kinahanglang manaog siya sa krus karon dayon aron motuo kita kaniya” (Mateo 27:42).
Ang ubang tigpaniid siguradong naglibog gayod. Dili ba kini ang sama nga tawo kinsa maoy nakaingon sa tanang kaguliyang pipila ka adlaw ang milabay? Dili ba Siya man unta ang atong Manluluwas? Unsaon man Niya pagluwas kanato kon Siya dili gani makaluwas sa Iyang Kaugalingon Mismo?
Uban sa kaayohan sa panlantaw, klaro natong makita nga ang mga tawo adunay sayop nga mga gilaoman mahitungod sa tinuod nga misyon ni Jesus.
Kon ang mga Butang Daw Dili Mohaom
Wala ba kitang tanan nakasinati og panagsa nga pagkadiskonekta tali sa atong gilaoman sa kinabuhi ug unsa gayod ang nahitabo? Dili ba kabahin na sa atong kinabuhi ang wala damhang mga sorpresa?
Ang ebanghelyo ni Jesukristo mao ang ebanghelyo sa taas nga mga gimithi.
Apan dili kini ikatingala nga dili kini kanunay nga mohaom sa gubot, kalibotanon nga mga reyalidad sa mortalidad.
Sa usa ka hingpit nga kalibotan, ang tanan kanunay nga motuman sa mga sugo sa Dios. Sa usa ka hingpit nga kalibotan, kitang tanan mobati nga bulahan ug malipayon, ug ang matag matinud-anon nga sakop sa Ang Simbahan ni Jesukristo sa mga Santos sa Ulahing mga Adlaw adunay lig-on ug makatagbaw nga kaminyoon ug pamilya.
Apan ang tinuod mao nga ang pipila kanato nag-atubang og komplikado, makahadlok nga mga hagit nga naghimo niining mga panalangin nga daw imposible nga makab-ot.
Busa unsa may atong buhaton kon ang matahom, unibersal, mahangtorong mga mithi sa ebanghelyo mosumpaki sa masakit, indibidwal, mortal nga mga reyalidad sa kinabuhi?
Adunay labing menos duha ka butang nga angay nimong hinumdoman:
Ayaw gayod pagbiya sa sulundon.
Ayaw ibalewala ang tinuod.
Dili sayon para sa atong mortal nga mga hunahuna ug mga pagbati nga mohupot sa duha ka konsepto nga daw nagkasumpaki.
Busa, aron masulbad ang pagkadiskonekta sa atong mga hunahuna, dali kitang moingon: “Kon ako nag-antos, seguradong may nahimo akong sayop.” O “Kon wala nako makita ang mga panalangin nga akong gilaoman, ang mga saad dili tingali tinuod.”
Apan tingali adunay laing paagi sa pagtan-aw sa mga butang. “Kay sama nga ang kalangitan habog kay sa yuta, ang akong mga laraw habog kay sa inyong mga laraw, ug ang akong hunahuna kay sa inyong hunahuna” (Isaias 55:9)?
Sakaa ang Bukid, Tan-awa ang mga Butang sa Lahi nga Paagi
Nakabantay ka ba kon unsa ka lahi ang hitsura sa mga butang gikan sa mas habog nga lugar? Kon makaabot ka sa kinatumyan ug motan-aw balik sa walog, dili ba katingalahan kon unsa ka gamay tan-awon ang tanan?
Ang Dios nagdapit kanato sa pagsunod sa Iyang dalan ngadto sa mas taas ug mas balaan nga panglantaw. Imong makita ang kalibotan ug ang mga hagit niini gamit ang lahi nga mga mata; imong makita ang mga butang sa konteksto sa tibuok nga paglalang ug sa plano sa kaluwasan.
Minahal kong mga higala, anaa kamo sa usa ka bahin sa inyong kinabuhi diin importante nga mga desisyon ang kinahanglan nga himoon: may sangpotanan nga mga pagpili sa edukasyon ug panarbaho, kinsa ang pakaslan, ug kanus-a magsugod sa pagtukod og pamilya. Alang niining tanan nga mga pagpili kinahanglan nimo ang mga panalangin sa langit ug ang giya sa Espiritu Santo. Ug naa kini didto. Anaa kini. Sunda ang sundanan nga gitudlo sa Ginoo ngadto kang Oliver Cowdery: “Tun-an og maayo sa imong hunahuna; dayon … mangutana sa [Dios] kon husto ba kini” (Doktrina ug mga Pakigsaad 9:8).
Ikaw adunay utok ug kasingkasing. Ug mahibaloan nimo.
Busa palihog pangayo og mga panalangin ug giya sa imong Langitnong Amahan. Ipakigbahin ngadto Kaniya ang imong mga paglaom, mga damgo, ug mga tinguha. Apan sa pagbuhat niini, seguroha nga Iyang makita nga wala nimo kini buhata sa imong paagi. Hangyoa Siya nga ablihan ang imong mga mata aron makita ang mga butang sa Iyang paagi. Mao kana ang panahon nga magsugod na pag-agos ang mga tubag. Mao kana ang panahon nga mosaka ka sa bukid ug magsugod sa pagtan-aw sa mga butang gikan sa mas taas nga panglantaw—bisan sa panglantaw sa Langitnong Amahan.
Makita nimo nga daghang butang nga murag dako ug makahadlok pero sa tinuod gagmay ra ug dili kaayo makahulga.
Sa samang higayon imong madiskobrehan ang mahangtorong kahulogan sa pipila ka butang nga mura og gamay sa imong mortal nga mga mata.
Sa atong mga pag-ampo atong gisunod ang ehemplo nga gipakita sa Manluluwas alang kanato didto sa Tanaman sa Getsemani sa dihang Siya nag-ampo, “Amahan, … dili ang akong pagbuot, kondili ang imo, ang matuman” (Lucas 22:42).
Ang mga tubag sa imong mga pag-ampo moabot ra. Niini ako mopamatuod. Tingali dili sa imong paagi, apan segurado sa Iyang paagi. Usahay moabot kini pinaagi sa usa ka kasulatan, usa ka sagrado nga pagbati, o sa mga pulong sa usa ka gisaligan nga tawo, apan moabot ra gyod kini.
Ang Ginoo tinuod nakaila kanimo. Nasayod Siya sa imong kasingkasing. Nakaila Siya sa imong ngalan. Kini nga mga gutlo diha kanimo mahimong mahisama niadtong balaan, malinawon nga gutlo sa usa ka matahom nga buntag sa tingpamulak sa gawas sa usa ka walay sulod nga lubnganan sa dihang usa ka batan-ong babaye naghilak ug ang nabanhaw nga si Jesus mitawag kaniya sa iyang ngalan (tan-awa sa Juan 20:16).
Mabati ba nimo si Jesus, uban sa Iyang malumong tingog, nagtawag sa imong ngalan? Hinumdomi, ang Manluluwas nahibalo sa imong ngalan. Nahigugma Siya kanimo.
“Tan-awa, ang Imong Hari Nagaanhi Kanimo”
Niadtong Dominggo sa Lukay, ang madaugong pagsulod ni Jesus sa Jerusalem nakadani og panon sa katawhan. Usa kadto ka mahimayaon ug kulbahinam nga higayon. Apan mas importante pa gyod ang gibuhat ni Jesus human Siya misulod sa Jerusalem—bisan tuod kadaghanan niini gihimo sa hilom, pribado, bisan wala mamatikdi sa kadaghanan sa mga tawo.
Mahimong dili kini ang unsay gilaoman sa mga tawo sa Mesiyas. Apan mao kini ang gisaad sa Dios. Ug mao kini ang sa mga tawo—katawhan, ikaw ug ako—ang tanan natong gikinahanglan. Kadto ang langitnong gasa ug ang maulaong sakripisyo nga gikinahanglan sa katawhan, sa tanang mga anak sa Dios.
“Tan-awa,” miingon ang propeta Zacarias, “moanha kanimo ang imong hari” (Zacarias 9:9).
Sama sa Iyang pagsulod nga madaugon sa Jerusalem, ang malumong Kristo mosulod sa inyong kinabuhi sa tagsa-tagsa, kon dawaton ninyo Siya.