Unsay Nakapahimong Hilabihan ka Espesyal sa Pasko sa Pagkabanhaw? Gugma

Sa wala pa ko nahimong sumusunod ni Jesukristo, naghunahuna ko kon ngano nga ang Pasko sa Pagkabanhaw ingon ka mahinungdanon nga holiday ngadto sa ubang tawo.

Apan karon akong nahibaloan nga ang Pasko sa Pagkabanhaw usa ka simbolo sa gugma—ang gugma nga si Jesukristo aduna alang sa Langitnong Amahan ug alang sa matag usa kanato.

Ang Pasko sa Pagkabanhaw nagpakita og lawom nga koneksiyon tali sa Amahan ug sa Anak. Kon wala ang milagro sa Pag-ula ni Jesukristo ug ang nagsunod nga Pagkabanhaw, wala gayoy paagi nga kita makabalik ngadto sa atong Langitnong Amahan. Si Jesukristo nahigugma sa Amahan ug sa matag usa kanato sa hilabihan nga Iyang giantos ang “mga sakit ug mga kasakit ug mga pagtintal sa matag matang” (Alma 7:11) aron makabalik kita ngadto sa Langitnong Amahan.

Ang labing mahinungdanong mensahe sa Pasko sa Pagkabanhaw mao ang gugma. Kinahanglang higugmaon nato ang uban sa paagi sa paghigugma sa Langitnong Amahan ug ni Jesukristo kanato. Ang Pasko sa Pagkabanhaw nagpahinumdom nato nga tan-awon gayod unsay panginahanglan sa uban.

Mas mohigugma. Mas mopasaylo. Mas moserbisyo.

Sama sa gipakigbahin ni Elder Dieter F. Uchtdorf sa Korum sa Napulog Duha ka Apostoles: “Pundokon nato ang tanang anak sa Dios nga andam nga pundokon ug nangita sa kamatuoran. Dili ang atong pisikal nga hitsura, ang atong politikal nga mga panglantaw, ang atong kultura, o gigikanan ang naghiusa nato. … Kini ang atong komon nga tumong, ang atong gugma alang sa Dios ug sa silingan, ang atong pasalig ngadto ni Jesukristo ug sa Iyang gipahiuli nga ebanghelyo.”

Ang Dios dili magtan-aw atong sosyal nga kahimtang apan kon si kinsa kita isip mga indibidwal. Ang pagkahibalo niini ug ang pagbati sa Iyang gugma pinaagi niining matahom nga holiday nakapahimo nako nga gusto nga ipakigbahin usab kini ngadto sa uban.

Nagserbisyo ko karon isip presidente sa korum sa mga elder, ug ako adunay kahigayonan nga ipadangat ang samang gugma nga akong nasinati ngadto sa ubang mga miyembro sa akong ward.

Isip usa ka ward, among nabantayan nga kon ang mga tawo magpalayo sa mga baroganan sa ebanghelyo, mag-atubang sila og daghang makadaot nga mga tentasyon.

Sa pagbuntog niini, ang among bishop naghimo og kanunay nga mga pagbisita diin mopili kami og usa ka pamilya ug moadto sa ilang panimalay sa pagtudlo ug pagkat-on ug dungan. Kini nga mga pagbisita nakapausab sa daghang kinabuhi tungod kay anaa ang diwa sa kamaya ug kalingawan. Makita ninyo kon unsa gayod ka lingaw ang mga tawo pinaagi sa pagtan-aw sa ilang mga mata. Usa kini ka butang nga angayan gayod sa pagdayeg, ug kami naningkamot og maayo niini.

Ang akong pagtuo mas nalig-on sa matag adlaw. Samtang nagserbisyo ko sa uban, labi na atol niini nga mga pagbisita, gibati nako kanunay nga konektado ngadto sa Manluluwas, kinsa miluwas sa matag usa kanato pinaagi sa Iyang kaandam sa pagbuhat sa Iyang Pag-ula. Kon maningkamot ko sa pagtagad sa uban sama sa Iyang gihimo, Siya ug ang Langitnong Amahan usab motudlo nako ug molig-on sa akong pagtuo.

Si Jesukristo mao ang akong kaluwasan. Siya mihatag nako og kahigayonan nga mahimong usa ka tawo nga lahi. Siya nahigugma nako, ug Siya mipakita nako sa Iyang gugma. Si Jesukristo ug ang Iyang milagro sa Pasko sa Pagkabanhaw mao ang mga simbolo sa gugma, balaang pagtahod, kaluwasan, kaandam, ug kamapaubsanon.

Si Jesukristo buhi. Siya molihok diha sa atong kinabuhi pinaagi sa mga disipulo nga nagserbisyo isip Iyang mahigugmaong mga kamot. Siya nabanhaw aron kita makabalik sa pagpuyo uban sa atong Langitnong Amahan.

Hangopa Siya.

Hangopa ang Iyang milagro sa Pasko sa Pagkabanhaw.

Hangopa ang Iyang gugma.

Ug ipakigbahin kanang hingpit nga gugma ngadto niadtong anaa sa inyong palibot.