Giunsa sa Akong Relasyon sa Dios Pagtabang Nako gikan sa usa ka Problemado nga Pagkabata ngadto sa Pagdala sa Papel ni Kristo

Samtang nagpuyo sa usa ka puy-anan para sa mga walay balay, gipaila-ila kami ngdadto sa Ang Simbahan ni Jesukristo sa mga Santos sa Ulahing mga Adlaw. Gihigugma nako ang ebanghelyo. Bisan og nanlimbasog gihapon kami sa misunod nga pipila ka tuig, kon tutokan nako og mas maayo ang pagtukod nako og relasyon sa Dios, mas nigaan ang akong mga palas-anon.

Wala koy kontak sa akong papa, ug tungod kay ang akong mama nanlimbasog sa wala matambali nga mga sakit sa pangisip, kanunay adunay kasuko sa among panimalay.

Dili nako mapugngan ang akong mga hagit, apan kanunay akong makakaplag og kalinaw nga pagbati sa akong relasyon sa Dios ug ni Jesukristo. Usa kadto ka emosyonal nga pagbati nga walay makailog. Gimahal nako ang hilom nga mga gutlo sa pag-ampo, pagbasa sa mga kasulatan, ug pagsulat sa akong journal, ug kon magkalisod na kaayo sa balay, modangop ko ngadto sa kahilom sa kinaiyahan.

Sama sa gitudlo ni Elder Sandino Roman sa Seventy:

“Pag-ampo ngadto sa inyong Langitnong Amahan ingon og kini mao ang unang higayon. Ipahayag ang inyong gugma ug pasalamat alang sa Iyang mga panalangin. …

“Kon kamo sinsero ug mapaubsanon, madungog ninyo ang Iyang tubag ug magsugod sa usa ka personal ug malungtaron nga relasyon ngadto sa Langitnong Amahan ug ni Jesukristo.”

Kon maggahin ko og oras uban sa Dios, makita nako ang Iyang impluwensiya sa akong kinabuhi, ug mao kadto ang tinubdan sa akong paglaom. Usahay kon ang akong relasyon sa akong inahan sakit ug ang akong kaugmaon daw walay paglaom, mag-ampo ko alang sa tabang, ug ang Espiritu mopasalig kanako.

Kanang balaan nga relasyon nakapadasig nga impluwensiya sa akong kinabuhi, lakip na ang akong pag-arte. Niadtong 12 anyos pa ko, naaghat ko nga mag-audition alang sa papel sa batan-ong Jesus sa mga Bidyo sa Biblia. Gusto kaayo ko labaw pa sa tanan nga ilarawan ang Manluluwas nga akong gihigugma. Akong gi-rekord ang akong audition sa usa ka gubaon nga digital camera, nagsul-ob sa pughaw nga pula [pink] nga bathrobe ni mama, ug gipadala kini.

Wala nako makuha ang papel nga akong gusto, apan wala gyod ko nawad-i og paglaom nga makaalagad gihapon ko sa Ginoo pinaagi sa pag-arte. Mapasalamaton ko nga naa koy gagmay nga mga tahas sa ubang mga proyekto sa Simbahan. Sa kataposan, nag-audition ko pag-usab nga modala sa papel sa Manluluwas—niining higayona isip usa ka young adult alang sa kampanya sa Simbahan alang sa Pasko sa Pagkabanhaw nga “Dakong Gugma.”

Samtang nagpuasa ko ug nangandam sa espirituhanong paagi alang sa akong audition, naghunahuna ko sa tanan nga nahimo sa Manluluwas para nako. Gihatag nako ang akong labing maayong interpretasyon kon kinsa gayod ang Manluluwas ngari nako, nagtutok sa kalipay, gugma, kalinaw, ug pagkadili hakog nga nahibaloan nako nga hingpit Niyang gipadayag.

Ug napilian ko nga modala sa papel sa Manluluwas. Makahuloganon kini nga higayon sa dihang naghunahuna ko kon giunsa ako pag-aghat nga mosulay sa laing papel niadtong batan-on pa ko. Makita nako kon unsa ka aktibong naapil ang Langitnong Amahan sa mga detalye sa akong kinabuhi, kanunay nga naggiya kanako sa unahan.

Ang akong relasyon sa Manluluwas nakaimpluwensya kon giunsa nako Siya paghulagway—tungod kay nakaila ko Kaniya. Hilabihan ang Iyang tinguha sa pagdala og kalinaw ug kaayohan niadtong mga nag-antos ug nanginahanglan sa Iyang kahayag.

Nahibalo ko nga ang akong paghulagway sa Manluluwas dili gayod mahitungod kanako. Nagtabang ko sa mga tawo nga makita ug makaila ni Jesukristo sa paagi nga akong gilaoman nga makapalig-on sa ilang pagtuo ug paglaom diha Kaniya, ang Prinsipe sa Kalinaw.

Ang mga hagit sa kinabuhi makapabati kanimo nga walay paglaom ug nagbulag gikan sa imong mas taas nga katuyoan. Apan kon imong hinumdoman ang imong balaan nga pagkatawo ug relasyon uban ni Kristo, ang matag interaksyon nimo sa uban, ang matag proyekto nga imong trabahoon, ug ang matag lakang nga imong himoon makapaduol kanimo sa Manluluwas.

Bisan kon ang mga kalainan nagbatok kanimo, kon ikaw konektado ngadto sa Langitnong Amahan ug ni Jesukristo, makakaplag ka og kalipay, kahulogan, ug direksyon sa bisan unsang mga kahimtang. Makaangkon ka og “hingpit nga kahayag sa paglaom” (2 Nephi 31:20). Hingpit Silang nahigugma kanimo. Ug Sila naggiya kanimo.

Ingon ana ang kanunay nga paghatag og suporta sa Langitnong Amahan ug ni Jesukristo alang kanako. Ug nasayod ko nga tungod Kanila, ma-OK ra gayod ang tanan.