Gikan sa YA Matag Semana
Nasagmuyo sa Modernong Kultura sa Pakig-date? 3 ka Butang nga Kinahanglan Nimong Mahibaloan
Ang tagsulat nagpuyo sa Montréal, Quebec, Canada.
Nakat-on ko og pipila ka sekreto nga makatabang nato sa pakig-date nga may gugma ug dili kahadlok.
Ganahan ko makig-date. Ganahan ko og gugma.
Ug ang ebanghelyo mao ang usa ka plano sa gugma ug kalipay. Apan usahay, kon maningkamot sa pagpakig-date ug mangita sa eksaktong tawo nga pakaslan, ang kultura sa pakig-date mahimong hinungdan sa mga babag.
Pananglitan, dinhi sa Montréal, naa mi suod nga grupo sa mga young adult. Kon makig-date ka sa usa ka tawo, ang uban maghisgot bahin niini, ug lisod ang pagkig-ilaila og mga tawo sa romantikong paagi nga dili kini tan-awon nga seryoso.
Samtang nakig-date ko sa lain-laing mga tawo, nakadungog ko og mga huhungihong sama sa, “Nangita si Nina og bana. Desperado na gyod siya nga magminyo!” Pero dili kana tinuod—naningkamot lang ko nga mas tuyoon gyod diha sa natad sa pakig-date. Ang pagtukod og pamilya usa sa akong mga prayoridad sa kinabuhi.
Ang tinuyo nga pakig-date wala magpasabot nga desperado ka na—kini mahitungod lang sa pagpaningkamot aron makita kon unsa nga mga relasyon ang Langitnong Amahan posibleng modala kanimo. Sama sa giingon ni Presidente Russell M. Nelson (1924–2025), “Ang Ginoo ganahan og paningkamot.”
Kon gibati nimo nga naglisod ka sa pagpakig-date, wala ka mag-inusara. Ania ang tulo ka butang nga buhaton samtang naningkamot ka nga tuyoon gyod sa imong pakig-date:
1. Hibaloi Kon Kinsa Ka
Gibati nako nga pipila kanato wala nakahibalo kon kinsa kita. Wala kita mahibalo kon unsaon pagkahimong atong kaugalingon, unsa ang atong mga tumong, o unsaon paghimo og mga desisyon nga may pagsalig. Kon kinsa kita nag-impluwensya sa atong kinabuhi, sa atong mga prayoridad, ug sa atong mga gimithi.
Si Elder Ronald A. Rasband sa Korum sa Napulog Duha ka Apostoles nangutana:
“‘Unsa nga mga butang ang inyong gipamalandongan?’ ‘Unsa nga mga butang ang mahinungdanon gayod kaninyo?’ ‘Unsa ang mga butang sa inyong kalag?’
“Ang mga butang sa atong kalag kasagaran mapatin-aw ug mapalambo pinaagi sa pagpangutana.”
Atol sa kolehiyo, ang akong marketing nga mga klase sa social media nagtudlo kanako mahitungod sa pagkaplag sa akong konsumidor [audience] ug sa pagtukod sa talagsaon nga mga kinaiya nga nakaimpluwensya sa gituohang personalidad, panagway, ug pamatasan sa usa ka brand [brand identiy]. Mahimo usab kining magamit sa kinabuhi! Wala kini magpasabot sa pagmugna og peke nga persona—nagpasabot kini sa imong pagka-ikaw, paglambo, ug pagkat-on kon unsaon nimo sa tinuoray nga pagkonektar sa uban.
Kon magpuyo kita isip mga disipulo ni Jesukristo, nahibalo kita unsa ang atong mga gimithi. Tanan kita naghimo sa samang mga pakigsaad ug nagsunod sa samang mga sugo. Ug ang nakanindot niini kay gawas sa mga personalidad ug interes, kon pareha kita og mga gimithi sa kalibotan nga puno sa lain-laing mga interes ug mga panan-aw, magkasinabot kita og maayo sa ubang mga disipulo ni Kristo sa pagpakig-date.
Kon imong tugotan ang imong balaan nga pagkatawo nga mohulma sa imong kinabuhi, makita nimo sa uban nga nagbuhat sa ingon.
2. Hibaloi Kon Unsay Imong Gusto
Nakig-date ko nga may intensiyon tungod kay ako adunay tumong nga magminyo sa kadugayan.
Si Presidente Nelson miawhag kanato “nga mosugod nga maghunahuna sa sangpotanan.” Ang pagsugod nga ang sangpotanan anaa sa hunahuna diha sa pagpakig-date nagpasabot sa paghibalo sa imong mga tumong. Unsa may katuyoan sa pakig-date? Nanghinaot nga makakaplag og potensyal alang sa usa ka relasyon nga mahimong mosangpot ngadto sa kaminyoon. Apan parehas ba ang inyong mga tumong? Pareson ba ang inyong mga kinaiya ug mga interes? Pangutan-a ang imong kaugalingon niining mga klase sa pangutana!
Aron mahibaloan kon unsang mga kalidad ang pangitaon, palamboa kini sa imong kaugalingon, tutok ngadto sa Langitnong Amahan, ug adto sa mga lugar diin naa ang balaan nga mga tawo (sama sa institute, simbahan, ug mga kalihokan ug komperensiya sa YSA).
Si Elder Jeremy R. Jaggi sa Seventy mihatag niining tambag sa mga young adult: “Kon pangitaon nato ang [Dios], mahatod kita ngadto sa uban kinsa usab nangita Kaniya. Mahinungdanon kini alang sa pagpalambo og lig-on, malungtaron nga panaghigalaay ug mga kaminyoon.”
3. Hibaloi Kon Unsaon Pagpakig-uban sa Uban
Niining kalibotan nga may limitasyon sa interaksiyon sa uban, ganahan ko mohinumdom sa tambag nga gihatag sa mga misyonaryo nga motan-aw sa mata, mopahiyom sa mga tawo, ug mangutana sa uban bahin sa ilang kaugalingon.
Ang kanunay nga pagtan-aw sa mga telepono nakaapekto sa paagi sa atong pakig-uban sa uban. Ug bisan kon gusto ka makigsulti sa mga tawo, ang kabalaka ug kahadlok mahimong mobabag.
Si Elder Neil L. Andersen sa Korum sa Napulog Duha ka Apostoles miingon: “Ang akong unang tambag nimo mao nga magmaisogon. Maningkamot sa imong kaugalingon nga mopalambo og tinagsa-tagsa nga panaghigalaay. Dili ka maghunahuna nga ang matag panaghigalaay kinahanglang molambo ngadto sa panag-uyab, apan daghan ang madiskobrehan sa tinagsa-tagsa nga pakiglambigit.”
Ang pag-ila-ila sa ubang tawo mahimong makahadlok, apan ang pagkaandam nga mogawas sa imong komportable nga kahimtang [comfort zone] sa kadugayan motabang kanimo sa pagkaplag sa imong gipangita.
Gibati ko ang dako nga kalipay sa pagka dili minyo karon, apan bisan sa akong paghigugma sa akong kinabuhi, adunay mga matarong nga mga tinguha nga akong gipaningkamotan nga makab-ot—kining mahangtorong kaminyoon. Nahibalo ko nga samtang padayon ko nga nagtukod og mga relasyon sa uban, naghimo og mga pagpili nga mosangpot sa maayong kaugmaon, ug nagsalig sa Ginoo, ang akong matarong nga mga tinguha matuman.